కెనడా టొరంటో పియర్సన్​ అంతర్జాతీయ విమానాశ్రయంలో షాకింగ్​ ఘటన చోటుచేసుకుంది! ప్రతికూల వాతావరణ పరిస్థితుల్లో ల్యాండింగ్​కి ప్రయత్నించిన డెల్టా ఎయిర్​లైన్స్​కి చెందిన విమానం క్రాష్​ అయ్యింది. ఆ వెంటనే ఆ భారీ విమానం తలకిందులుగా పడిపోయింది. ఈ ఘటనలో 18మంది గాయపడ్డారు.

అసలేం జరిగింది..?

పియర్సన్ విమానాశ్రయంలో మంచు నేలపై ల్యాండ్ అవుతుండగా కూలిపోయిన డెల్టా ఎయిర్​లైన్స్ (ఎండీవర్ ఎయిర్ ఫ్లైట్​ 4819) విమానం నుంచి ప్రయాణికులను బయటకు తీస్తున్న పలు వీడియోలు సోషల్ మీడియాలో వైరల్​గా మారాయి. భయాందోళనకు గురైన ప్రయాణికులు గ్రౌండ్ సిబ్బంది సాయంతో విమానం నుంచి బయటకు వస్తున్న దృశ్యాలు ఈ వీడియోలో ఉన్నాయి.

అమెరికాలోని మిన్నెసోటా రాష్ట్రంలోని మిన్నియాపోలిస్ నుంచి 76 మంది ప్రయాణికులు, నలుగురు సిబ్బందితో బయలుదేరిన ఎండీవర్ ఎయిర్ ఫ్లైట్​ 4819.. స్థానిక కాలమానం ప్రకారం సోమవారం మధ్యాహ్నం కెనడాలోని అతిపెద్ద నగరంలో ల్యాండ్ అయ్యేందుకు ప్రయత్నించి క్రాష్​ అయ్యింది.

డెల్టా ఎయిర్​లైన్స్​ విమానానికి ప్రమాదం జరిగిన సమయంలో అందులో 80మంది ఉన్నట్టు సమాచారం. ప్రమాదంలో మొత్తం 18మంది గాయపడ్డారు. వీరిలో ముగ్గురి పరిస్థితి విషమంగా ఉంది (ఒక చిన్నారి, 60ఏళ్ల పురుషుడు, 40ఏళ్ల మహిళ). క్షతగాత్రులంతా ప్రస్తుతం టొరంటోలోని ఆసుపత్రిలో చికిత్స పొందుతున్నారు.

కాగా ఈ ఘటనలో ఇప్పటివరకు ఎలాంటి ప్రాణ నష్టం సంభవించలేదు.

డెల్టా ఎయిర్​లైన్స్ విమాన ప్రమాదానికి గల కారణాలు, రెక్కలు తెగిపోయిన విమానం తలకిందులుగా ఎలా పడిందనే దానిపై విమానయాన సంస్థ ఇంకా ఎలాంటి వివరణ ఇవ్వలేదు.

ప్రమాదం తర్వాత డెల్టా ఎయిర్​లైన్స్ విమానం చుట్టూ మంటలను ఆర్పడానికి అగ్నిమాపక సిబ్బంది ప్రయత్నిస్తున్నట్లు మరో వైరల్ వీడియోలో కనిపించింది.

“సీట్లకు వేలాడుతూ కనిపించారు..”

ఈ ఘటనతో షాక్​ అయిన ప్రయాణికులు ఇప్పుడు ఒక్కొక్కరుగా తమ అనుభవాన్ని సోషల్​ మీడియాలో పంచుకుంటున్నారు.

“మా విమానం ల్యాండింగ్​ సమయంలో క్రాష్​ అయ్యింది. తలకిందులుగా పడి ఉంది,” అని సంబంధిత విమానం ఫొటోలను ఓ ప్యాసింజర్​ తన ఫేస్​బుక్​ అకౌంట్​లో పోస్ట్​ చేశారు. “అంతా బాగానే ఉన్నట్టు కనిపిస్తోంది. చాలా మంది ఓకే-ఓకేగా ఉన్నారు. మేమంతా దిగుతున్నాం,” అని రాసుకొచ్చారు.

“ముందు మేము నేలకు క్రాష్​ అయ్యాము. ఆ తర్వాత పక్కకు పడిపోయాము. ఆ తర్వాత తలకిందులుగా పడిపోయాము,” అని మరో ప్రయాణికుడు పేర్కొన్నారు. “విమానం తలకిందులు అవ్వడంతో చాలా మంది సీట్ల నుంచి వేలాడుతూ కనిపించారు. వారికి మేము సాయం చేశాము,” అని ఆ ప్రయాణికుడు వెల్లడించాడు.