చైనాలో జరిగిన ఒక షాకింగ్​ ఘటన ఇప్పుడు వైరల్​గా మారింది! ఓ మహిళ కొన్ని నెలల పాటు ఏకంగా 36మందిని డేట్​ చేసింది. పెళ్లి చేసుకుందామని చెప్పి, వారి చేత ఇళ్లు కొనిపించింది. ఆ తర్వాత మాయమైపోయింది. వారిలో చాలా మంది ఇప్పుడు హోం లోన్​లు కట్టుకోలేక ఇబ్బంది పడుతున్నారు! అసలేం జరిగిందంటే..

ఇదీ జరిగింది..

చైనాలోని షెన్​హెన్​ అనే ప్రాంతానికి చెందిన అటాఓ (పేరు మార్చడం జరిగింది).. ఆన్​లైన్​ డేటింగ్​ యాప్​లో గతేడాది మార్చ్​లో లియు జియా అనే మహిళను కలిశాడు. తన వయస్సు 30ఏళ్లు అని, తాను హునన్​ రాష్ట్రానికి చెందిన మహిళ అని, కానీ ఉద్యోగం రిత్యా షెన్​హెన్​లో పనిచేస్తున్నట్టు ఆ వ్యక్తికి చెప్పింది లియు జియా. కొన్ని రోజుల్లోనే వారిద్దరు ప్రేమలో పడ్డాడు. వారిద్దరు పెళ్లి చేసుకోవాలని నిర్ణయించుకున్నారు.

ఇక్కడే అటాఓకి లియు ట్విస్ట్​ ఇచ్చింది! పెళ్లి ప్రతిపాదనతో తన తల్లిదండ్రులను కలిసే ముందు మంచి ఇల్లు కొనాలని అటాఓకి లియు చెప్పింది. అవసరమైతే డౌన్​పేమెంట్​ కింద తాను 30,000 యువాన్​ (రూ. 3.3లక్షలు) ఇస్తానని చెప్పి హుయిజౌ అనే ప్రాంతంలో ఇల్లు కొనాలని ప్రతిపాదించింది. సరిగ్గా ఆ సమయంలోనే అక్కడి డెవలపర్స్​.. ఇళ్ల మీద 1,00,000 యువాన్​ల (రూ. 11లక్షలు) సబ్సిడీ ఇస్తున్నట్టు ప్రకటించారు.

అది మంచి డీల్​ అని అటాఓ అనుకున్నాడు. మరి లియు డబ్బులు ఇచ్చిందో, లేదో తెలియదు కానీ.. అటాఓ మాత్రం ఇల్లు కొన్నాడు. అంతే! ఇల్లు కొన్న తర్వాత లియు మాయమైపోయింది. అటాఓతో మాట్లాడటం కట్​ చేసింది. అతడి నెంబర్​ని బ్లాక్​ చేసింది.

ఇంటి ఓనర్​షిప్​ సర్టిఫికెట్​లో మాత్రం లియు తన పేరు రాకుండా చూసుకుంది.

36మంది బాధితులు..!

లియు బారిన పడిన వ్యక్తుల లిస్ట్​ చాలా పెద్దదే! వాంగ్​ అనే ఇంటి పేరు ఉన్న ఓ వ్యక్తి కూడా లియు గురించి చెప్పుకుని తన బాధను బయటపెట్టాడు.

“నేను ఇల్లు కొన్న తర్వాత లియు నాతో మాట్లాడటం మానేసింది. బిజీగా ఉన్నానని అంటూ, ఏదో ఒక కారణంతో నన్ను దూరం పెట్టింది. చివరికి నన్ను బ్లాక్​ చేసింది,” అని వాంగ్​ చెప్పుకొచ్చాడు.

ఇలా మొత్తం మీద 36మందిని లియు మోసం చేసిందని అటాఓ చెప్పాడు. బాధితుల వయస్సు 30ఏళ్ల కన్నా ఎక్కువ ఉంటుందని, వారందరు ఉద్యోగం రిత్యా షెన్​హెన్​లో పనిచేస్తున్నారని వెల్లడించాడు. లియు చేసిన పనికి తన మీద ఆర్థిక భారం విపరీతంగా పెరిగిపోయిందని, తనకు వస్తున్న జీతంలో నెలకు 4,100 యువాన్​లు (సుమారు రూ. 50వేలు) హోం లోన్​కే వెళ్లిపోతోందని అటాఓ చెప్పుకొచ్చాడు.

“ఇప్పుడు ఇక నేను జీవితంలో గర్ల్​ఫ్రెండ్​ కోసం చూడను,” అని అటాఓ అంటున్నాడు.

మరో విషయం ఏంటంటే.. ఈ 36మంది చేత హుయిజౌలోని రెండు రెసిడెన్షియల్​ కాంప్లెక్స్​లలో (జియు జింగ్​ టాయ్​, హఓ యూ షాంగ్​ యున్​) ఇళ్లు కొనిచ్చింది లియు.

సోషల్​ మీడియాలో వైరల్​..

లియు అనే మహిళ 36మందిని మోసం చేసి, వారి చేత ఇళ్లు కొనిపించిందన్న వార్త చైనా సోషల్​ మీడియాలో ఇన్​స్టెంట్​గా వైరల్​ అయ్యింది. చాలా మంది ఆందోళన వ్యక్తం చేస్తుంటే, ఇంకొందరు మాత్రం ఫన్నీగా కామెంట్లు పెడుతున్నారు.

“లియుకి బెస్ట్​ సేల్స్​ పర్సన్​ ఆఫ్​ రియల్​ ఎస్టేట్​” అని బిరుదు ఇవ్వాలని నెటిజన్లు అంటున్నారు.

మరికొందరు మాత్రం, ముందు వెనుక చూడకుండా మహిళను నమ్మిన పురుషులును విమర్శిస్తున్నారు. జీవితంలో ఇంత అజాగ్రత్తగా ఎలా ఉంటారని నిందిస్తున్నారు.

మరి ఈ వ్యవహారంపై మీరేం అంటారు?