కార్తీక దీపం 2 నేటి (మార్చి 10) ఎపిసోడ్‍లో ఏం జరిగిందంటే.. ఆస్తులను పంచేందుకు శివన్నారాయణ వీలునామా రాశాడని చెప్పేందుకు కార్తీక్ ఇంటికి వస్తాడు శ్రీధర్. తన భార్య కాంచన, కొడుకు కార్తీక్‍కు ఈ విషయం చెప్పి వాటా దక్కేలా గొడవ పెట్టాలనే ప్లాన్‍తో అడుగుపెడతాడు. టిఫిన్ బండిపై మిర్చీ పునుగులు వేద్దామనుకుంటున్నామని అనసూయ అంటుంటే.. శ్రీధర్ ఎంట్రీ ఇస్తాడు. కోట్లకుకోట్లు చేజారిపోయేలా ఉన్నాయని చెబుతాడు. ఇంతలో కావేరి కూడా వస్తే కుర్చీ వేసి మర్యాదలు చేస్తుంది దీప. తనను పట్టించుకోవాలని శ్రీధర్ అడుగుతాడు. వీలునామా విషయం చెబుతాడు.

బాధ్యత లేని తండ్రి ఉంటే ఇలాగే ఉంటుంది

సమయానికి బాగా వచ్చావని, లేకపోతే కార్తీక్, దీప రెస్టారెంట్‍కు వెళ్లిపోయేవారని సవతి కావేరితో అంటుంది కాంచన. కాఫీ తెమ్మంటారా అని అనసూయ అడిగితే.. చీపురు కట్ట అనసూయ బూజులు దులుపుకో అని వెటరిస్తాడు శ్రీధర్. కార్తీక్ బాబు జూజు దులిపేయనా అని శ్రీధర్‌ను ఉద్దేశించి అనసూయ అంటే.. ఇది గాలికి పోయే బూజు దులపాల్సిన అవసరం లేదంటాడు కార్తీక్. అందుకే మీ జీవితాలు ఇలా ఉన్నాయని శ్రీధర్ అరుస్తాడు. “నీలాంటి బాధ్యత లేని తండ్రి ఉంటే ఎవరి జీవితాలు అయినా ఇలాగే ఉంటాయి” అని కార్తీక్ అంటాడు. ఇంటికి వచ్చిన మనిషితో ఇలా మాట్లాడొద్దని కుర్చీ వేయాలని కాంచన అంటుంది.

ముందు మీరు కూర్చొండని దీప అంటే.. ఎందుకు ఉల్లిపాయలు కట్ చేసేందుకా అని శ్రీధర్ అంటాడు. రెస్టారెంట్‍లో తనతో ప్లేట్లు కడిగించడం, కూరగాయలు కట్ చేయించిన విషయంపై వెటరిస్తాడు. ముందు ఎందుకు వచ్చారో చెప్పారని శ్రీధర్‌ను కార్తీక్ అడుగుతాడు.

అన్యాయాన్ని ఆపేందుకు వచ్చా

“మనకు జరగబోయే అన్యాయాన్ని ముందుగా ఆపడానికి వచ్చా” అని శ్రీధర్ అంటాడు. అన్యాయం గురించి మీరు మాట్లాడుతున్నారా అని అనసూయ కౌంటర్ వేస్తుంది. అవసరమైన వాళ్లు తప్ప అందరూ మాట్లాడుతున్నారంటూ శ్రీధర్ చిరాకు పడతాడు. తను మా అక్క అని కాంచన అంటే.. కావేరి మీ చెల్లి.. అంతా చెమ్మచెక్కా ఆడుకోండని శ్రీధర్ అంటాడు. నేను చెప్పేది విని చావండ్రా అని శ్రీధర్ అరిస్తే.. చెప్పి చావండని కార్తీక్ అంటాడు.

వీలునామా రాసేశారు

యావదాస్తికి సంబంధించిన మీ తాత శివన్నారాయణ వీలునామా రాయించారని కార్తీక్‍తో చెబుతాడు శ్రీధర్. ఎవరెవరికి ఏం రాశారో ఎంత రాశారో రేపు తెలుస్తుంది. అయితే ఏంటని కాంచన అంటుంది. ఇప్పుడే నిలదీస్తే సమానమైన వాటాలు వస్తాయని శ్రీధర్ చెబుతాడు. ఎవరికి అని కార్తీక్ ప్రశ్నిస్తే.. మనకి అంటాడు శ్రీధర్. మేము, మన అనే పదాల్లో మీరు లేరని తేల్చేస్తాడు కార్తీక్.

పెద్దాయనను నిలదీద్దాం

మీ నాన్న మీద కోపంతో ఉన్నాడు, ఇలాంటి సమయంలో ఆస్తి పంపకాలు జరుగుతున్నాంటే మీకు నష్టం జరగడం ఖాయం అని శ్రీథర్ అంటాడు. నష్టం జరగకూడదని అంటే నా మాట విని నాతో రండి.. పెద్దయానను నిలదీద్దాం అని చెబుతాడు. దీంతో మీకు సంబంధం ఏంటని కాంచన అంటే.. “నువ్వు నా భార్యవి కాదా.. వీడు నా కొడుకు కాదా. మీకు అన్యాయం జరుగుతుంటే ఊరుకుంటానా” అని శ్రీధర్ చెబుతాడు.

వద్దన్న కాంచన, కార్తీక్

తన తండ్రి శివన్నారాయణ వద్ద ఆస్తి వాటా అడిగేందుకు కాంచన అంగీకరించదు. తాము అన్నీ వదులుకొని వచ్చామని, ఆ ఆస్తి అవసరం లేదని చెబుతుంది. “వదుకున్నామంటే.. వద్దనుకున్నట్టే కదా” అని కాంచన అంటుంది. ఆస్తి ఇచ్చినా తనకు అవసరం లేదని కార్తీక్ చెబుతాడు. ఈ తలపొగరుతోనే అంతా పోగొట్టుకుంటున్నావని శ్రీధర్ అంటే.. ఇది ఆత్మాభిమానం అని బదులిస్తాడు కార్తీక్. ఇక సంపాదించుకునేదంతా నాదే అని కార్తీక్ చెబుతాడు.

కార్తీక్.. చేతల మనిషి

ఇదంతా చేతకాని వాళ్లు చెప్పే మాటలు అని శ్రీధర్ కొట్టిపారేసేలా అంటే.. “కార్తీక్ బాబు మాటల మనిషి కాదు.. చేతల మనిషి. కాస్త లేటైనా ఇచ్చిన మాటను వదిలిపెట్టరు. అన్నింటికీ జవాబు ఉంటుంది. అందరికీ బదులు ఉంటుంది” అని దీప చెబుతుంది. పద్ధతిగా వార్నింగ్ ఇస్తున్నావని శ్రీధర్ అంటాడు. నా జోలికి వస్తే నా భార్య ఊరుకోదు అని కార్తీక్ అంటే.. నేను నోరు తెరిస్తే నా భార్యలు ఊరుకోరని శ్రీధర్ విసుక్కుంటాడు.

శ్రీధర్ ప్లాన్ అట్టర్ ప్లాఫ్

మా నాన్న ఎవరికి ఆస్తి రాస్తాడన్నది ఆయన సొంత విషయం అని తేల్చేస్తుంది కాంచన. మీకు ఏం రాకపోయినా సరేనా అని శ్రీధర్ అడుగుతాడు. ఆత్మాభిమానం కోసం అన్నీ వదులుకొని కొడుకుతో మా అమ్మ వచ్చేసిందని, ఆస్తి అగడదని కార్తీక్ అంటాడు. వెళ్లండని చెబుతాడు. వీలునామాలో ఏముంతో తెలిశాక మాట్లాడుకుందామని అంటాడు. నా కొడుకు కావాల్సింది సంపాదించుకుంటాడని కాంచన చెబుతుంది. “ఆఖరిసారిగా చెబుతున్నా.. నా మాట వింటే మీ వాటా వచ్చేలా చేస్తా” అని శ్రీధర్ అంటాడు. అవసరం లేదని, బయటికి వెళ్లాలని కార్తీక్ చెబుతాడు.

ఆస్తి కోసం శివన్నారాయణతో కార్తీక్, కాంచన గొడవ పడేలా చేసి, తనకు ఎంతో కొంత వాటా వచ్చేలా చేసుకోవాలని అనుకున్న శ్రీధర్ ప్లాన్ ఫెయిల్ అవుతుంది. కార్తీక్ వెళ్లమని చెప్పడంతో పదా అని కావేరితో కోపంగా అంటాడు శ్రీధర్. కార్తీక్ ఇంటి నుంచి వెళ్లిపోతాడు. వీలునామా గురించి ఎవరు చెప్పారని కార్తీక్ అడిగితే.. పారిజాతం తమ ఇంటికి వచ్చి చెప్పిందని కావేరి బదులిస్తుంది. అందరికీ చెప్పి బయలుదేరుతుంది.

నీ మాటే నా మాట

కార్తీక్ నువ్వేమంటావ్ రా అని కాంచన అడుగుతుంది. నీ మాటే నా మాట అమ్మ.. అది వాళ్ల ఆస్తి.. వాళ్లకు నచ్చిన నిర్ణయాన్ని తీసుకోనువ్వు అని కార్తీక్ అంటాడు. ఎంత కాదనుకున్నా శివన్నారాయణకు కార్తీక్ సొంత మనవడు.. ఆస్తి తప్పకుండా రాస్తాడని మనసులో అనుకుంటుంది అనసూయ.

టెన్షన్‍లో శ్రీధర్.. కావేరి కౌంటర్లు

శివన్నారాయణ ఎవరికి ఎంత ఆస్తి రాశాడో అనే టెన్షన్‍ పెరిగిపోయి పుషప్స్ చేస్తుంటాడు శ్రీధర్. ఈ విషయాన్ని మనసులో అనుకుంటాడు. ఎవరి పేరు మీద రాస్తే మీకేంటి అని కావేరి ప్రశ్నిస్తుంది. దీంతో ఈ విషయం నీకెలా తెలిసిందని శ్రీధర్ ఆశ్చర్యపోతాడు. ఆ తర్వాత శ్రీధర్ మనసులో అనుకునే విషయాలను చెప్పేస్తూ కౌంటర్లు వేస్తుంది కావేరి. “అక్క పేరు మీద ఆస్తి రాస్తే.. ఆమె తీసుకోదు కాబట్టి.. మాయ చేసి అది నీ పేరు మీద రాయించుకోవాలని ప్లాన్. మీరు అక్క దగ్గరికి వెళ్లి ఎందుకు అంత హడావుడి చేశారని వాళ్లకు తెలియకపోయినా నాకు తెలుసు” అని కావేరి అంటుంది. గట్టిగా అనకే అని శ్రీధర్ అంటాడు. మీరు ఆస్తి గురించి ఆలోచిస్తే కార్తీక్‍కు చెబుతానని కావేరి అంటుంది. మనసులో అనుకున్నది ఎలా చెబుతున్నావని, నా బాడీలో మైండ్ రీడర్ చెప్పి పెట్టావా అని శ్రీధర్ అడుగుతాడు. ముఖం చూస్తే అర్థమవుతోందని కావేరి అంటుంది.

కార్తీక్, దీపపై సత్యరాజ్ ప్రశంసలు

రెస్టారెంట్‍ను అద్భుతంగా నడుపుతున్నారని, మంచి పేరు వచ్చిందని కార్తీక్, దీపపై రెస్టారెంట్ ఇచ్చిన సత్యరాజ్ ప్రశంసలు కురిపిస్తాడు. మూడు నెలలు టైమ్ ఇస్తే వారంలోనే లాభాల్లోకి తెచ్చేశారంటూ ఆనందిస్తాడు. వంటలు బాగున్నాయంటూ చాలా మంది తనకు ఫోన్లు చేస్తున్నారని అంటాడు. వంటలు బాగున్నాయని దీపను పొగుడుతాడు సత్యరాజ్.

మేడ్ ఫర్ ఈచ్ అదర్‌కు ఉదాహరణ మీరు

సత్యరాజ్ రెస్టారెంట్ మార్కెటింగ్ విషయంలో మాకు ఐడియా ఉందని, ఓకే అంటే చేస్తామని కార్తీక్ చెబుతాడు. ఏదైనా చేయండని సత్యరాజ్ అంటాడు. ఇంతకీ ఏం చదువుకున్నావని దీపను సత్యరాజ్ అడుగుతాడు. ఐదో తరగతి వరకే చదివి మానేశానని దీప చెబుతుంది. చదివించే ఐదే అయినా లెక్కలు బాగా వచ్చని కార్తీక్ చెబుతాడు. వంటల్లో అయితే కాలేజీలో అడుగుపెట్టకుండానే మాస్టర్ డిగ్రీ సాధించిందని దీప గురించి అంటాడు.

తన తండ్రి వద్ద వంటలు నేర్చుకున్నానని, అప్పట్లో టిఫిన్ సెంటర్ కూడా నడిపానని సత్యరాజ్‍తో దీప చెబుతుంది. “విచిత్రం చూశావా.. చిన్నతనం నుంచి వంటలను వంటబట్టించుకున్న నువ్వు.. వంటల గురించి చదువుకున్న కార్తీక్.. ఇద్దరూ భార్యభర్తలు అయ్యారు. మేడ్ ఫర్ ఈచ్ అదర్ పదానికి బెస్ట్ ఎగ్జాంపుల్ మీరే” అని సత్యరాజ్ చెబుతాడు. దీంతో దీప, కార్తీక్ సంతోషిస్తారు. ఉప్పూకారంలా ఇద్దరూ కలిసి సంతోషంగా ఉండాలని చెబుతాడు. మీ రూపంలో నమ్మకం దొరికిందంటూ సత్యరాజ్ వెళ్లిపోతాడు.

కార్తీక్ మాటలు.. దీప మళ్లీ కన్‍ఫ్యూజన్

కార్తీక్‍తో ఓ మాట చెప్పాలని దీప అంటుంది. నువ్వు ఏదైనా అడగవచ్చు దీప.. నువ్వు ప్రాణదాతవు కదా అంటూ మళ్లీ ఆట పట్టించడం మొదలుపెడతాడు కార్తీక్. “పెద్ద ప్రాణదాత.. చిన్నప్రాణ దాత అంటూ భలే ఆటపట్టిస్తారు” అని దీప అంటుంది. ఫొటో ఉందని చూపించడం లేదని చెబుతుంది. ఫొటో కోసం ప్యాంట్ జేబులో వెతికావ్ కదా అని కార్తీక్ అంటే.. దుస్తులు ఉతికేందుకు పేపర్లేమైనా ఉన్నాయేమో చూశానంటుంది దీప. నా చెవిలో పూలు ఏమైనా ఉన్నాయా అని కార్తీక్ అంటాడు.

చిన్నప్పుడు ఎవరినైనా నీళ్లలో పడితే కాపాడావా అని కార్తీక్ అడుగుతాడు. ఈత వచ్చా అంటాడు. చిన్నప్పుడు తన ప్రాణాలు కాపాడిన పాప.. దీపే అని తెలిసినా ఆ విషయం చెప్పకుండా దాగుడుమూతలు కొనసాగిస్తాడు కార్తీక్. అతడి మాటలకు దీప మళ్లీ కన్‍ఫ్యూజ్ అవుతుంది. నిజం తెలిసిందా అని అనుకుంటుంది. తనకు ఈతరాదని చెబుతుంది. కలిసి ఈత నేర్చుకుందామని, కోనేట్లో ట్రై చేద్దామా అని అంటాడు. “కార్తీక్ బాబుకి నేను చిన్నప్పుడు తనను కాపాడిన ప్రాణదాతను అనుమానం వచ్చిందా. మాటలు అన్నీ అలాగే ఉన్నాయ్” అని దీప మనసులో అనుకుంటుంది. ఇద్దరూ ఒకరి కళ్లలో ఒకరు చూసుకుంటారు.

వాళ్ల ఇష్టం

నన్ను చిన్నప్పుడు కాపాడిన ప్రాణదాత దొరికితే ఆవిడ కోసం తిరిగి ఏదో ఒకటి చేయాలని కార్తీక్ అంటాడు. నా మెడలో మూడు ముళ్లు వేశారు.. ఇంకేం చేయాలని మనసులో అనుకుంటుంది దీప. ఏదో అడగాలన్నావ్ అని కార్తీక్ అంటే.. “మీ తాతయ్య వీలునామా” అని దీప అంటుంది. వాళ్ల ఆస్తులు ఏం చేసుకుంటారో వాళ్ల ఇష్టమని కార్తీక్ చెబుతాడు. నువ్వు బంధాల గురించి ఆలోచిస్తున్నావని, వాటా రాస్తేనే బంధం ఉన్నట్టు కాదు కదా అని చెబుతాడు. కూతురితో బంధం ఉంచుకుంటాడో తెంచుకుంటాడో ఆయనిష్టం అని అంటాడు. శివన్నారాయణ ఆయనకు నచ్చినట్టు వీలునామా రాసుకోమమని, నాకు ఏం సంబంధం లేదని కార్తీక్ చెబుతాడు. దీంతో కార్తీక దీపం 2 నేటి (మార్చి 10) ఎపిసోడ్ ముగిసింది.