Star Maa New Serial: స్టార్ మా సీరియల్స్ కు తెలుగు ఆడియెన్స్ లో మంచి క్రేజ్ ఉంది. అలాంటి ఛానెల్ నుంచి కొత్తగా ఏ సీరియల్ వచ్చినా అభిమానులు ఆసక్తిగా చూస్తారు. ఇప్పుడు సోమవారం (మార్చి 10) నుంచి భానుమతి పేరుతో మరో కొత్త సీరియల్ ను ఈ ఛానెల్ ప్రేక్షకుల ముందుకు తీసుకొస్తోంది. మరి ఈ సీరియల్ ఏంటి? ఎప్పుడు చూడాలన్న విషయాలు తెలుసుకోండి.

భానుమతి సీరియల్ టైమ్ ఇదే

స్టార్ మా ఛానెల్ భానుమతి మా ఇంటి మాలక్ష్మీ పేరుతో ఈరోజు (మార్చి 10) నుంచే కొత్త సీరియల్ ప్రారంభిస్తోంది. సోమవారం నుంచి శనివారం వరకు ప్రతి రోజు సాయంత్రం 6 గంటలకు ఈ సీరియల్ ప్రసారం కానుంది. ఈ విషయాన్ని గత కొన్ని రోజులుగా చెబుతూ వస్తున్న స్టార్ మా.. సోమవారం కూడా తన ఎక్స్ అకౌంట్లో ట్వీట్ చేసింది.

“ఎవరూ ఆపలేని స్ఫూర్తి కలిగిన ఓ అమ్మాయి. అన్ని అడ్డంకులను అధిగమించి భానుమతి ఉన్నత శిఖరాలను అధిరోహించగలదా? ఆమె స్ఫూర్తిదాయక ప్రయాణం ఈరోజే మొదలవుతుంది. ప్రతి సోమవారం నుంచి శనివారం వరకు సాయంత్రం 6 గంటలకు కేవలం మీ స్టార్ మాలో” అనే క్యాప్షన్ తో ఓ కొత్త పోస్టర్ రిలీజ్ చేస్తూ ఈ విషయాన్ని వెల్లడించింది.

భానుమతి సీరియల్ గురించి..

భానుమతి సీరియల్ గురించి గతంలోనే స్టార్ మా ఛానెల్ ఓ స్పెషల్ నోట్ రిలీజ్ చేసింది. అందులో ఏముందంటే.. “సీరియల్ అంటే కేవలం వినోదం మాత్రమే కాదు విలక్షణమైన కథతో పాటు వ్యవస్థపై నమ్మకం, సంప్రదాయాల పట్ల గౌరవం, పోరాటతత్వం వంటి విలువలతో కూడుకున్నది ఉండేలా స్టార్ మా ముందు నుంచి అడుగులు వేస్తూ వస్తోంది.

ఈ క్రమంలో స్టార్ మాలో అందించిన పాత్రలు సాహసం, ధైర్యం, ఆత్మవిశ్వాసం, నమ్మకం, బాధ్యత, నిజాయతీ, కరుణ, దయ వంటి వాటిని మనకు చూపిస్తూ వచ్చాయి. వీటి కోవలోకి మరో కొత్త పాత్ర వచ్చి చేరబోతోంది. ఆ పాత్రే ‘భానుమతి’. మనం ఎగరాలని బలంగా అనుంటే రెక్కలు వాటంతట అవే వస్తాయని రుజువు చేసే అమ్మాయి కథే ఇది” అని అందులో స్టార్ మా పేర్కొంది.

భానుమతి స్టోరీ ఇలా..

చదువే జీవితానికి వెలుగు చూపించే దీపం అని నమ్మే అమ్మాయే భానుమతి. బాగా చదువుకుని డాక్టర్ కావాలనేది ఆమె కల. తన లక్ష్యాన్ని చేరుకునే క్రమంలో భానుమతి ఎలాంటి సవాళ్లను ఎదుర్కొంది.. వాటిని ధైర్యంగా ఎలా అధిగమించిందో చెప్పే కథ ‘భానుమతి’.

తెలుగు సంప్రదాయాల ప్రకారం మన కుటుంబాల్లో ఆడపిల్లను ఇంటి మహాలక్ష్మిగా భావిస్తుంటాం. అందుకనే ‘భానుమతి’ కథకి ‘మా ఇంటి మాలక్ష్మి’ అనే ట్యాగ్ లైన్‌ను పెట్టారు. ఈ సీరియల్ ప్రతి సోమవారం నుంచి శనివారం వరకు ప్రసారం అవుతుంది.

సత్యభామ సీరియల్ స్థానంలోనే..

స్టార్ మాలో సుమారు ఏడాదిన్నరగా సాగుతున్న సత్యభామ సీరియల్ స్థానంలో ఈ భానుమతి రానుంది. ఈ సత్యభామ సీరియల్ గత శనివారం (మార్చి 8)తో ముగిసింది. 346 ఎపిసోడ్ల పాటు ఈ సీరియల్ సాగింది.

మొదట్లో మంచి టీఆర్పీ రేటింగ్స్ సొంతం చేసుకున్న సత్యభామ.. తర్వాత క్రమంగా పతనమవుతూ వచ్చింది. దీంతో స్టార్ మా ఆ ఛానెల్ కు సడెన్ గా ముగింపు పలికింది. స‌త్య‌భామ సీరియ‌ల్‌లో నిరంజ‌న్‌, దేబ్జానీ మోద‌క్‌ జంట‌గా క్రిష్, స‌త్య అనే క్యారెక్ట‌ర్స్‌లో న‌టించారు. స‌త్య‌భామ సీరియ‌ల్ 2023 డిసెంబ‌ర్ 18న మొద‌లైంది.