అమెరికా ఉపాధ్యక్షుడు జేడీ వాన్స్, ఆయన సతీమణి ఉషా వాన్స్ ఈ నెలలో భారత్ లో పర్యటిస్తారని అమెరికన్ న్యూస్ పోర్టల్ పొలిటికో తెలిపింది. ఉపాధ్యక్షుడిగా జేడీ వాన్స్ కు ఇది రెండో విదేశీ పర్యటన కాగా, అమెరికా సెకండ్ లేడీగా ఉషా వాన్స్ భారత్ లో పర్యటించడం ఇదే తొలిసారి. మాలిక్యులర్ బయాలజిస్ట్ అయిన ఉషా వాన్స్ తల్లి, మెకానికల్ ఇంజనీర్ అయిన తండ్రి ఆంధ్రప్రదేశ్ నుంచి అమెరికా వెళ్లారు.

ఫిబ్రవరిలో జేడీ వాన్స్ ఫ్రాన్స్, జర్మనీలను సందర్శించారు. అక్రమ వలసలు, మత స్వేచ్ఛ, ఎన్నికలను తిప్పికొట్టడంపై ఐరోపా ప్రభుత్వాలను ఆ సందర్భంలో విమర్శించారు.

ఆసక్తికరం

భారత్, అమెరికాల మధ్య వాణిజ్య చర్చల నేపథ్యంలో జేడీ వాన్స్ భారత పర్యటన ఆసక్తి రేకెత్తించనుంది. అమెరికా అధ్యక్షుడు డొనాల్డ్ ట్రంప్ ఈ నెలలో బ్రెజిల్, భారతదేశం, చైనా వంటి దేశాల నుండి అధిక సుంకాలను ఉదహరించారు. పరస్పర సుంకాల ప్రణాళిక ఏప్రిల్ 2 నుండి అమల్లోకి వస్తుందని చెప్పారు. వాణిజ్య చర్చల ద్వారా పరిష్కారం లభిస్తుందని భారత అధికారులు ఆశాభావం వ్యక్తం చేశారు.

అమెరికా కాంగ్రెస్ సంయుక్త సమావేశంలో ప్రసంగిస్తూ పరస్పర సుంకాల గురించి ట్రంప్ చేసిన వ్యాఖ్యలు వాణిజ్య యుద్ధాలు, ప్రపంచ ఆర్థిక వృద్ధిపై వాటి ప్రభావంపై భయాందోళనలను పెంచాయి.

భారత్, అమెరికాలు ఒకరికొకరు మార్కెట్ యాక్సెస్ పెంచుకోవడం, టారిఫ్, నాన్ టారిఫ్ అడ్డంకులను తగ్గించడం, సప్లై చైన్ ఇంటిగ్రేషన్ పెంచడంపై దృష్టి సారిస్తాయని కేంద్ర మంత్రి జితిన్ ప్రసాద మంగళవారం పార్లమెంటుకు తెలిపారు.

2025 చివరినాటికి ద్వైపాక్షిక వాణిజ్య ఒప్పందం (బీటీఏ) పూర్తవుతుందని భావిస్తున్న నేపథ్యంలో కేంద్ర వాణిజ్య మంత్రి పీయూష్ గోయల్ నేతృత్వంలోని ప్రతినిధి బృందం తన అమెరికా పర్యటనను ముగించుకున్న కొద్ది రోజులకే ఈ వ్యాఖ్యలు చేయడం గమనార్హం.

పరస్పర ప్రయోజనాల కోసం ఆటోమొబైల్స్ (మోటార్ బైకులు, కార్లు) వంటి వస్తువులపై అసాధారణమైన అధిక సుంకాలను తగ్గించడానికి భారతదేశం అంతర్ మంత్రిత్వ శాఖల చర్చలు జరుపుతోందని హెచ్ టి నివేదించింది.