Online Leaked Movies Before Theatrical Release: ఏళ్లకు ఏళ్లు వెచ్చించి ఎంతో కష్టపడి సినిమాలను తెరకెక్కిస్తుంటారు దర్శకనిర్మాతలు. వాటికోసం హీరో, హీరోయిన్స్ నుంచి కొన్ని వేల మంది కష్టపడుతుంటారు. అలాంటి సినిమాలు థియేట్రికల్ రిలీజ్ కాకుండేనే లీక్ అయిన సందర్భాలు చాలా ఉన్నాయి.

బాక్సాఫీస్ రిజల్ట్

వాటిలో ఎక్కువగా తెలుగులో చాలా పాపులర్ అయిన స్టార్ హీరోలే సినిమాలు ఉండటం గమనార్హం. అలా రిలీజ్‌కు ముందే లీక్ కావడంతో ఎన్నో సినిమాల ఫలితాలు మారిపోయాయి. వాటిలో కొన్ని హిట్ అయితే మరికొన్ని ప్లాప్‌గా నిలిచాయి. మరి అలా థియేట్రికల్ రిలీజ్‌కు ముందు ఆన్‌లైన్ లీక్ అయిన స్టార్ హీరో సినిమాలు ఏంటీ, వాటి బాక్సాఫీస్ రిజల్ట్ ఏంటో ఇక్కడ తెలుసుకుందాం.

అత్తారింటికి దారేది

పవర్ స్టార్ పవన్ కల్యాణ్, డైరెక్టర్ త్రివిక్రమ్ శ్రీనివాస్ కాంబినేషన్‌లో జల్సా తర్వాత వచ్చిన సినిమా అత్తారింటికి దారేది. సమంత, ప్రణీత సుభాష్ హీరోయిన్స్‌గా నటించిన ఈ సినిమాకు దేవి శ్రీ ప్రసాద్ సంగీతం అదించారు. 2013 సెప్టెంబర్ 27న థియేటర్లలో విడుదలైన ఈ సినిమా భారీ ఘన విజయం సొంతం చేసుకుంది.

అయితే, అత్తారింటికి దారేది సినిమా విడుదలకు ముందే దాదాపుగా 45 నిమిషాల ఫుటేజ్ ఆన్‌లైన్‌లో లీక్ అయింది. అత్తారింటికి దారేది సినిమాకు పనిచేసిన టెక్నిషీయనే మూవీని లీక్ చేశారు. సినిమా ప్రారంభంలో వచ్చే ఆ 45 నిమిషాల వీడియో నెట్టింట్లో తెగ చక్కర్లు కొట్టింది. అయితే, లీక్ అయినప్పటికీ అత్తారింటికి దారేది సినిమా భారీ హిట్ అందుకుంది.

ఎవడు

మెగా పవర్ స్టార్ రామ్ చరణ్, ఐకానిక్ స్టార్ అల్లు అర్జున్ ఇద్దరు కనిపించిన సినిమా ఎవడు. వంశీ పైడిపల్లి దర్శకత్వం వహించిన ఈ సినిమాలో కాజల్ అగర్వాల్, శ్రుతి హాసన్, అమీ జాక్సన్ హీరోయిన్స్‌గా అలరించారు. దీనికి కూడా దేవి శ్రీ ప్రసాద్ సంగీతం అందించారు. 2014 జనవరి 12 సంక్రాంతికి కానుకగా ఎవడు థియేట్రికల్ రిలీజ్ అయింది.

అయితే, ఆ విడుదలకు ఒక్కరోజు ముందు రాత్రి ఆన్‌లైన్‌లో ఎవడు లీక్ అయింది. దాంతో సినిమాను వాయిదా కూడా వేద్దామనుకున్నారు. కానీ, రిలీజ్ చేయడమే మంచిదనుకుని థియేటర్లలో విడుదల చేశారు. రూ. 35 కోట్ల బడ్జెట్‌తో తెరకెక్కిన ఎవడు బాక్సాఫీస్ వద్ద హిట్‌గా నిలిచింది.

బాహుబలి ది బిగినింగ్

దర్శక ధీరుడు రాజమౌళి తెరకెక్కించిన అతి గొప్ప చిత్రాల్లో ముందుండే సినిమా బాహుబలి ది బిగినింగ్. పాన్ ఇండియా స్టార్ ప్రభాస్, దగ్గుబాటి రానా, అనుష్క, తమన్నా, రమ్యకృష్ణ, నాజర్, సత్యరాజ్ వంటి ప్రముఖ నటులు యాక్ట్ చేసిన బాహుబలి ఏ రేంజ్‌లో హిట్ అందుకుందో తెలిసిందే. ప్రభాస్‌ను పాన్ ఇండియా స్టార్‌గా చేయడానికి అడుగు పడింది ఈ సినిమాతోనే.

బాహుబలి సినిమాలో నటించినవారందరికి ఎనలేని గుర్తింపును తీసుకొచ్చింది. అంతటి ఘన విజయం సాధించిన బాహుబలి సినిమా కూడా థియేటర్ రిలీజ్‌కు ముందు ఆన్‌లైన్ లీక్ అయింది. బాహుబలి క్లైమాక్స్‌ను తన ఫ్రెండ్స్‌కు చూపిద్దామన్న ఉత్సాహంలో సినిమాకు పని చేసిన టెక్నిషియన్ ఒకరు లీక్ చేశారు.

కానీ, కట్ చేస్తే.. 2015 జూలై 10న విడుదలైన బాహుబలి ప్రపంచస్థాయిలో హిట్ అయింది. అయితే, రిలీజ్‌కు ముందు ఆన్‌లైన్‌లో లీక్ అయిన ఈ మూడు సినిమాలు హిట్ కొట్టాయి.