ఆర్జీ కర్ రేప్-మర్డర్ కేసు బాధితురాలి తల్లిదండ్రులు దాఖలు చేసిన తాజా పిటిషన్‌ను సుప్రీంకోర్టు ఈ నెల 17న విచారించనుంది. గత ఆగస్టులో కోల్కతాలోని ఆర్జీ కర్ మెడికల్ కాలేజ్ అండ్ హాస్పిటల్లో పోస్ట్ గ్రాడ్యుయేట్ ట్రైనీ డాక్టర్ (31) హత్యాచారానికి గురైన సంగతి తెలిసిందే.

ఆగస్టు 9న ఆస్పత్రి ఆవరణలో ఆమె మృతదేహం లభ్యమైంది. మహిళపై అత్యాచారం చేసి హత్య చేశారని ఆరోపించారు. ఈ ఘటనపై దేశవ్యాప్తంగా నిరసనలు వెల్లువెత్తాయి.

జనవరిలో ఆర్జీ కర్ అత్యాచారం, హత్య కేసులో ఏకైక దోషి, కోల్కతా పోలీసు పౌర వాలంటీర్ సంజయ్ రాయ్‌కు కోల్కతాలోని సీల్దాలో గల కోర్టు జీవిత ఖైదు విధించింది. 50 వేల జరిమానా కూడా విధించింది. రాయ్ కు మరణశిక్ష విధించాలని కోరుతూ సెంట్రల్ బ్యూరో ఆఫ్ ఇన్వెస్టిగేషన్ (సీబీఐ), రాష్ట్ర ప్రభుత్వం రెండూ కలకత్తా హైకోర్టులో అప్పీళ్లు దాఖలు చేశాయి. 

రాయ్ కు ట్రయల్ కోర్టు విధించిన యావజ్జీవ కారాగార శిక్షను సవాలు చేస్తూ రాష్ట్ర ప్రభుత్వం దాఖలు చేసిన అప్పీలును విచారణకు స్వీకరించడానికి కలకత్తా హైకోర్టు ఫిబ్రవరి 7న నిరాకరించింది. 

ప్రధాని మోదీని కలవాలనుకుంటున్న తల్లి

తమ కుమార్తెకు న్యాయం చేయాలంటూ తాను, తన భర్తతో కలిసి ప్రధాని నరేంద్ర మోదీని వేడుకుంటామని బాధితురాలి తల్లి వెల్లడించారు. శనివారం అంతర్జాతీయ మహిళా దినోత్సవం సందర్భంగా ఆమె మాట్లాడుతూ పశ్చిమబెంగాల్‌లో మహిళల భద్రతపై ప్రశ్నలు లేవనెత్తారు.

ప్రధానిని కలిసి ఈ విషయంలో జోక్యం చేసుకోవాలని, చనిపోయిన తమ బిడ్డకు న్యాయం చేయాలని కోరుతామని వివరించారు.

“మా అమ్మాయి పెద్ద కలలు కనింది. ఆమె ఇలా చనిపోతుందని మేము ఎప్పుడూ అనుకోలేదు. ఆమె మమ్మల్ని వదిలి ఏడు నెలలు అయింది. కానీ న్యాయం ఎక్కడుంది? మా వద్ద డెత్ సర్టిఫికేట్ కూడా లేదు’ అని ఆమె పేర్కొన్నారు.