Aamir Khan Girlfriend: బాలీవుడ్ స్టార్ హీరో ఆమిర్ ఖాన్ తన 60వ బర్త్ డేకు ఒక రోజు ముందు గట్టి షాకే ఇచ్చాడు. ఆ మధ్య తన రెండో భార్య కిరణ్ రావ్ కు విడాకులు ఇచ్చేసిన అతడు.. ఒంటరిగా ఉన్నాడనుకుంటే.. సడెన్ గా కొత్త గర్ల్‌ఫ్రెండ్ ను పరిచయం చేశాడు. గురువారం (మార్చి 13) ముంబైలోని హోటల్లో మీడియాతో చిట్ చాట్ సందర్భంగా తన కెరీర్, జీవితం గురించి మాట్లాడుతూ గౌరి గురించి చెప్పాడు.

ఆమిర్ ఖాన్ గర్ల్‌ఫ్రెండ్ ఈమే..

ఆమిర్ ఖాన్, గౌరి ఇద్దరూ కలిసి మీడియాతో మాట్లాడటం విశేషం. నిజానికి ఈ ఇద్దరూ 25 ఏళ్ల కిందటే తొలిసారి కలుసుకున్నారట. అయితే మధ్యలో టచ్ లో లేకుండా పోయి.. రెండేళ్ల కిందట మళ్లీ కలుకున్నట్లు ఆమిర్ చెప్పాడు. అయితే తమ ఇద్దరి మధ్య రిలేషన్షిప్ మాత్రం 18 నెలల కిందట మొదలైనట్లు ఆమిర్ వెల్లడించాడు.

మీకు ఇన్నాళ్లుగా తెలియకుండా దాచాను చూశారా అంటూ మీడియా వాళ్లతో ఆమిర్ సరదాగా అన్నాడు. ఆమెను తమ ప్రపంచానికి తగినట్లుగా సిద్ధం చేయడానికి ప్రయత్నించానని, ఆమెకు ప్రైవేట్ సెక్యూరిటీని కూడా ఏర్పాట్లు చేసినట్లు తెలిపాడు.

పెళ్లి, పిల్లాడు కూడా..

నిజానికి గౌరికి కూడా ఇప్పటికే పెళ్లి కావడం విశేషం. అంతేకాదు ఆమెకు ఆరేళ్ల బాబు కూడా ఉన్నాడు. గతంలో ఆమె బెంగళూరులో తన భర్తతో కలిసి ఉండేది. తన పిల్లలు కూడా గౌరిని కలిశారని, వాళ్లు సంతోషంగా ఉన్నారని ఆమిర్ ఖాన్ చెప్పాడు. ఈ సందర్భంగా తన లగాన్ మూవీ డైలాగ్ గుర్తు చేస్తూ.. భువన్‌కు తన గౌరీ దక్కిందని అనడం విశేషం.

నిజానికి గత నెల రోజులుగా రెడిట్ లో ఆమిర్ ఖాన్, గౌరి డేటింగ్ రూమర్లు వస్తూనే ఉన్నాయి. ఆమిర్ గతంలో రీనా దత్తా, కిరణ్ రావ్ లను పెళ్లి చేసుకున్నాడు. రీనాతో జునైద్, ఇరా అనే సంతానం కలగగా.. కిరణ్ తో ఆజాద్ అనే కొడుకు పుట్టాడు. రెండేళ్ల కిందట ఆమిర్, కిరణ్ విడిపోయారు. అయితే ఇప్పటికీ ఫ్రెండ్లీగానే కలిసి తిరుగుతున్నారు. ఆమె డైరెక్ట్ చేసిన లాపతా లేడీస్ సినిమాను ఆమిరే నిర్మించాడు.