Quota to Muslims: ముస్లిం కాంట్రాక్టర్లకు టెండర్లలో 4 శాతం రిజర్వేషన్లు కల్పించేందుకు ఉద్దేశించిన కర్ణాటక ట్రాన్స్పరెన్సీ ఇన్ పబ్లిక్ ప్రొక్యూర్మెంట్ (కేటీపీపీ) చట్ట సవరణకు కర్ణాటక కేబినెట్ ఆమోదం తెలిపింది. పట్టణ ప్రాంతాల్లో చేపట్టిన మాదిరిగానే అన్ని అనధికార గ్రామీణ ఆస్తులకు ‘బి’ ఖాతాలను అందించడానికి ఉద్దేశించిన కర్ణాటక గ్రామ స్వరాజ్ అండ్ పంచాయతీరాజ్ (సవరణ) బిల్లుకు కూడా కేబినెట్ ఆమోదం తెలిపింది. ఖాతాలు లేని సుమారు 90 లక్షల గ్రామీణ ఆస్తులకు ఈ బిల్లు వర్తిస్తుందని భావిస్తున్నారు.

ఫ్లవర్ ఆక్షన్ బెంగళూరు

అంతర్జాతీయ ఫ్లవర్ ఆక్షన్ బెంగళూరు (ఐఎఫ్ఏబీ) కోసం హెబ్బాళ్ లొ వ్యవసాయ శాఖకు చెందిన 4.24 ఎకరాల భూమిని రెండేళ్ల పాటు అద్దె లేకుండా ఇచ్చే ప్రతిపాదనపై కేబినెట్ చర్చించినట్లు విశ్వసనీయ వర్గాలు తెలిపాయి. జనవరి అగ్నిప్రమాదం తర్వాత బెంగళూరు బయోఇన్నోవేషన్ సెంటర్లో పునర్నిర్మాణం, పరికరాల భర్తీకి రూ.96.77 కోట్ల ఆర్థిక సహాయాన్ని ఆమోదించడంపై కూడా చర్చలు జరిగాయి.

పబ్లిక్ సర్వీస్ కమిషన్ పై కూడా..

కర్ణాటక పబ్లిక్ సర్వీస్ కమిషన్ ను సంస్కరించే చర్యలపై కేబినెట్ చర్చించినట్లు విశ్వసనీయ వర్గాలు తెలిపాయి. కేపీఎస్సీ పునరుద్ధరణకు తీసుకోవాల్సిన చర్యలను సూచించేందుకు నిపుణుల కమిటీని ఏర్పాటు చేయాలని, కేపీఎస్సీ సభ్యులను నియమించేందుకు సెర్చ్ కమిటీని ఏర్పాటు చేయాలని నిర్ణయించారు.

కొత్త యూనివర్సిటీల మూసివేత?

గత బీజేపీ ప్రభుత్వ హయాంలో రాష్ట్రంలో ఏర్పాటు చేసిన కొత్త విశ్వవిద్యాలయాల మూసివేయాలా? లేదా కొనసాగించాలా? అనే విషయంపై మంత్రివర్గ ఉపసంఘం నివేదిక ఆధారంగా నిర్ణయం తీసుకుంటామని కర్ణాటక ముఖ్యమంత్రి సిద్ధరామయ్య శుక్రవారం శాసనసభలో తెలిపారు. రాష్ట్రంలోని ప్రభుత్వ విశ్వవిద్యాలయాల స్థితిగతులను సమీక్షించేందుకు ఉపముఖ్యమంత్రి డీకే శివకుమార్ నేతృత్వంలోని మంత్రివర్గ ఉపసంఘం తన నివేదికను ప్రభుత్వానికి సమర్పించాల్సి ఉంది. బీజేపీ ఎమ్మెల్యే, మాజీ ఉన్నత విద్యాశాఖ మంత్రి సీఎన్ అశ్వథ్ నారాయణ్ వాయిదా తీర్మానం కింద ఈ అంశంపై చర్చించాలని అసెంబ్లీలో కోరినప్పుడు ముఖ్యమంత్రి ఈ వ్యాఖ్యలు చేశారు.