9 నెలల పాటు ఐఎస్​ఎస్​లో చిక్కుకున్న వ్యోమగాములు సునితా విలియమ్స్​, బుచ్​ విల్మోర్​లు ఎట్టకేలకు భూమికి బయలుదేరారు. ఐఎస్​ఎస్​కి వీడ్కోలు పలికి, మరో ఇద్దరు వ్యోమగాములతో కలిసి వీరిద్దరు క్రూ-9లో భూమికి తిరిగివస్తున్నారు. ఇంతకి, వీరు 9 నెలల పాటు అంతరిక్షంలో ఎందుకు ఉండిపోవాల్సి వచ్చింది? వీరిని భూమి మీదకు తీసుకొచ్చేందుకు ఎలాంటి ప్రయత్నాలు జరిగాయి?

వ్యోమగాములు ఐఎస్​ఎస్​లో ఎలా చిక్కుకున్నారు?

8 రోజుల మిషన్​లో భాగంగా సునితా విలియమ్స్​, బుచ్​ విల్మోర్​లు బోయింగ్​ రూపొందించిన సరికొత్త స్టార్​లైనర్​ క్యాప్సూల్​లో జూన్​ 5న అంతరిక్షంలోకి వెళ్లారు. కానీ అదే క్యాప్సూల్​లో సమస్యల కారణంగా వారు అనుకున్న సమయానికి తిరిగి రాలేకపోయారు.

ఐఎస్​ఎస్​కి వెళ్లిన తర్వాత వ్యోమగాములు స్టార్​లైనర్​ని పరీక్షించారు. థ్రస్టర్స్​లోని టెఫ్లాన్​ సీల్స్​లో సమస్యలు కనిపించాయి. అవి దెబ్బతిన్నట్టు అర్థమైంది. ఈ విషయం నాసాకి వెల్లడించారు. ఆ క్యాప్సూల్​లో వ్యోమగాములు భూమికి తిరిగి రావడం ప్రమాదకరమని భావించింది నాసా. ఫలితంగా.. సునితా విలియమ్స్​, బుచ్​ విల్మోర్​లను వదిలేసి, స్టార్​లైనర్​ ఖాళీగా భూమికి తిరిగి వచ్చింది.

అంతరిక్షంలో చిక్కుకున్న అస్ట్రోనాట్స్​ని తీసుకొచ్చేందుకు అధికారులు పనిచేస్తున్నప్పటికీ, చాలా కాలం పాటు పురోగతి కనిపించలేదు. చివరికి, వారిని తీసుకొచ్చే బాధ్యతలను స్పేస్​ఎక్స్​కి అప్పగించింది నాసా.

ఈ మధ్యలో క్రూ-9లో భాగంగా మరో ఇద్దరు వ్యోమగాములు గతేడాది సెప్టెంబర్​లో ఐఎస్​ఎస్​కి వెళ్లారు. క్రూ-9లో రెండు సీట్లు ఖాళీగా ఉంచారు. ఇందులోనే ఇప్పుడు సునితా విలియమ్స్​, బుచ్​ విల్మోర్​లు తిరిగివస్తున్నారు.

నాసా బాధ్యతలు అప్పగించడంతో అందరి చూపు స్పేస్​ఎక్స్​ క్రూ-10 మిషన్​పై పడింది. కానీ ఇది కూడా చాలా రోజుల పాటు వాయిదా పడుతూ వచ్చింది. ఫలితంగా అంతరిక్షంలో సునితా విలయమ్స్​ ఇంకా ఎక్కువ సమయం గడపాల్సి వచ్చింది.

ఐఎస్​ఎస్​కి అతిథులుగా వెళ్లిన ఇద్దరు వ్యోమగాములు.. అక్కడ ఫుల్​టైమ్​ స్టేషన్​ క్రూగా మారిపోయారు. ఐఎస్​ఎస్​లో అనేక పరిశోధనలు చేశారు. పరికరాలను ఫిక్స్​ చేశారు. 62 గంటల పాటు 9 స్పేస్​వాక్స్​ చేశారు విలియమ్స్​. ఇదొక రికార్డ్​గా మారింది.

కాగా వాస్తవానికి ఫిబ్రవరిలో క్రూ-10 లాంచ్​ అవ్వాల్సి ఉంది. కానీ ఒక నెల పాటు వాయిదా పడింది. ఈ మధ్యలో, ఈ పూర్తి వ్యవహారంపై రాజకీయ దుమారం రేగింది. అమెరికా మాజీ అధ్యక్షుడు బైడెన్​.. రాజకీయ కారణాలతో వ్యోమగాములను ఐఎస్​ఎస్​లో వదిలేసినట్టు ప్రస్తుతు అధ్యక్షుడు డొనాల్డ్​ ట్రంప్​, స్పేస్​ఎక్స్​ సీఈఓ ఎలాన్​ మస్క్​ ఆరోపించారు. వ్యోమగాములను తాము భూమి మీదకు తీసుకొస్తామని హామీనిచ్చారు.

ఫిబ్రవరి నాటికి స్పేస్​ఎక్స్​ క్యాప్సూల్​ సిద్ధమవ్వలేదు. అందుకే దానిని మరొక క్యాప్సూల్​తో రిప్లేస్​ చేశారు. ఫలితంగా క్రూ-10 లాంచ్​ కొన్ని వారాల ముందుకు వచ్చింది.

చివరికి మార్చ్​ 12న మిషన్​ లాంచ్​కి అంతా రెడీ అయ్యింది. కానీ చివరి నిమిషంలో, సాంకేతిక లోపం కారణంగా మిషన్​ని రద్దు చేశారు. మళ్లీ నిరాశ! సునితా విలియమ్స్​ రాకపై మళ్లీ ఉత్కంఠ.

తిరుగు ప్రయాణం..

ఇక అమెరికా కాలమానం ప్రకారం మార్చ్​ 14న ఐఎస్​ఎస్​లో సునితా విలియమ్స్​, బుచ్​ విల్మోర్​తో పాటు స్పేస్​ఎక్స్​ క్రూ-9లోని ఇద్దరు సభ్యులను భర్తీ చేసేందుకు క్రూ-10 మిషన్​ ఐఎస్​ఎస్​కు బయలుదేరింది.

ఇప్పుడు, భారత కాలమానం ప్రకారం మార్చ్​ 18 ఉదయం 10 గంటల 30 నిమిషాల సమయంలో క్రూ-9లో సునితా విలియమ్స్​, బుచ్​ విల్మోర్​తో పాటు మరో ఇద్దరు వ్యోమగాములు భూమికి బయలుదేరారు.

భారత కాలమానం ప్రకారం మార్చ్​ 19, బుధవారం ఉదయం 8 గంటల 30 నిమిషాల ప్రాంతంలో వీరందరు ఫ్లోరిడా తీరం వద్ద నీటిలో దిగుతారు. అయితే, ఇందుకు వాతావరణం సహకరించాలి!