Naga Chaitanya Fans: టాలీవుడ్ హీరో నాగ చైతన్య తన కుర్ర అభిమానులను కలిశాడు. రీసెంట్ గా రిలీజైన నీ తండేల్ సినిమా చూశామంటూ తన కారు దగ్గరికి వచ్చిన పిల్లలతో అతడు సరదాగా మాట్లాడాడు. ఏం చదువుతున్నారు? ఏ స్కూల్లో చదువుతున్నారంటూ ప్రశ్నించాడు. మరి స్కూల్ కు ఎందుకు పోలేదని కూడా వాళ్లను అడిగాడు. ఈ వీడియో సోషల్ మీడియాలో వైరల్ అవుతోంది.

పిల్లలతో నాగ చైతన్య

నాగ చైతన్య తన కారును సొంతంగా డ్రైవ్ చేసుకుంటూ వెళ్తున్న సమయంలో కొందరు పిల్లలు కారు ఆపారు. నీ తండేల్ సినిమా చూశామంటూ వాళ్లు అతనితో చెప్పారు. దీంతో నీ పేరేంటి అంటూ వాళ్లందరినీ అడిగాడు. ఏం చదువుతున్నారు? ఎక్కడ చదువుతున్నారని ఆరా తీశాడు. అందులో ఒక పిల్లాడు తాను స్కూల్ కు వెళ్లడం లేదని, పోబుద్ధి కావడం లేదని, ఇప్పుడు షాప్ చూసుకుంటున్నానని సమాధానం ఇచ్చాడు.

పోబుద్ధి కావట్లేదా అని చైతూ కూడా అన్నాడు. ఆ తర్వాత ఆ పిల్లలందరికీ బాయ్ అని చెబుతూ వెళ్లిపోయాడు. అన్నా.. మళ్లీ సండే కలుద్దాం అని పిల్లలు చెప్పగా సరే అంటూ చైతూ ముందుకు కదిలాడు. ఈ వీడియోను ఆ పిల్లలే తమ దగ్గర ఉన్న మొబైల్లో షూట్ చేసి సోషల్ మీడియాలో పోస్ట్ చేయడంతో అది కాస్తా వైరల్ అయిపోయింది.

ఫ్యాన్స్ రియాక్షన్ ఇలా..

ఈ వీడియో చూసిన చైతన్య ఫ్యాన్స్ దీనిపై రియాక్ట్ అవుతున్నారు. ఓ పెద్దన్నలాగా నాగ చైతన్య పిల్లలతో మాట్లాడుతున్నాడు అనే క్యాప్షన్ తో ఈ వీడియోను ఓ యూజర్ పోస్ట్ చేశాడు. “అతడు అందరికీ ఎంతో గౌరవమిస్తాడు. అందుకే అందరూ అతన్ని ఇష్టపడతారు” అని ఓ వ్యక్తి కామెంట్ చేశారు. చై చాలా మంచోడు.. ఇప్పటికే ఎంతో సింపుల్ గా ఉండే స్టార్ కిడ్ బహుషా ఇతడే కావచ్చు అని మరొకరు అభిప్రాయపడ్డాడు.

చైతన్య ఈ మధ్యే తండేల్ మూవీతో కెరీర్లోనే అతిపెద్ద హిట్ కొట్టిన విషయం తెలిసిందే. ఈ సినిమా బాక్సాఫీస్ దగ్గర రూ.100 కోట్లకుపైనే వసూలు చేసింది. సాయి పల్లవి కూడా నటించిన ఈ మూవీ తర్వాత నెట్‌ఫ్లిక్స్ లోనూ దూసుకెళ్లింది. చైతన్య తాను తర్వాత నటించబోయే సినిమాల గురించి ఇంకా వెల్లడించలేదు. చాలా రోజుల తర్వాత తండేల్ రూపంలో దక్కిన సక్సెస్ ను ఎంజాయ్ చేస్తున్నాడు.