యోగాసనాలు వెన్నెముక ఆరోగ్యాన్ని మెరుగుపరుస్తాయి. మనం చేసే ప్రతి యోగాసనం వెన్నెముకను సమలేఖనం చేయడంతో పాటు, దానికి మద్దతు ఇచ్చే కండరాలను బలోపేతం చేయగల సామర్థ్యాన్ని కలిగి ఉంటుంది. మహిళలు తమ రోజువారీ కార్యకలాపాలు, ఉద్యోగ అవసరాల ఆధారంగా శరీరానికి సరిపడే యోగాసనాలను ఎంచుకోవాలి.

సూర్యనమస్కారాలతో ఉపయోగం

ఉదాహరణకు, డెస్క్ ఉద్యోగాలు చేసే వారికి శారీరక శ్రమ తక్కువ. అయినప్పటికీ ఎక్కువగా మనసు కేంద్రీకరించి పని చేయాలి. దీంతో శరీరంలో అసమతుల్యత ఏర్పడుతుంది. అటువంటి వారికి సూర్యనమస్కారాలు అత్యంత అనువైనవి. సూర్యనమస్కారాల క్రమం అనేది వెన్నెముక విస్తరణ, వంగడానికి కావాల్సిన సమతుల్య కలయిక ద్వారా శరీరంలోని అన్ని వ్యవస్థలను ప్రభావితం చేస్తుంది. సూర్య నమస్కారాలు వెన్నెముక సామర్థ్యాన్ని మెరుగుపరచడంతో పాటు వెన్నెముక, భుజాలు, చేతులు, కాళ్ళ కండరాలను బలపరుస్తాయి.

అదేవిధంగా, కటిచక్రాసన, మేరు వక్రాసన భంగిమలు వెన్ను దృఢత్వాన్ని పెంచుతాయి. దాంతో పాటు వెన్నెముక మృదుత్వాన్ని మెరుగుపరుస్తాయి. మహిళల విషయంలో, నడుము ప్రాంతాన్ని లక్ష్యంగా చేసుకునే భంగిమలు స్త్రీ జననేంద్రియ ఆరోగ్యాన్ని మెరుగుపరుస్తాయి. ఈ సందర్భంలో కొన్ని ముఖ్యమైన యోగాసనాల గురించి తెలుసుకుందాం.

– మలాసన(స్క్వాట్ పోజ్)

– బద్ద కోనాసన(సీతాకోకచిలుక భంగిమ)

– భుజంగాసన(నాగుపాము భంగిమ)

– శలభాసన(మిడుత భంగిమ)

– చక్రాసన (చక్ర భంగిమ)

వెన్నెముక ఆరోగ్యానికి హైడ్రేషన్ కీలకం

వెన్నెముకలోని ఇంటర్వర్‌టెబ్రల్ డిస్క్‌లు క్షీణించకుండా రక్షణ పొందాలంటే హైడ్రేటెడ్‌గా ఉండటం చాలా అవసరం. ఈ డిస్క్‌లు ప్రధానంగా నీటితో కలిగి ఉంటాయి. కాబట్టి, వెన్నెముక డిస్క్‌ల ఆరోగ్యాన్ని కాపాడుకోవాలంటే తగినంత నీరు తాగడం ముఖ్యం. డిస్కులు సమర్థవంతంగా పనిచేయడానికి, షాక్‌లను గ్రహించడానికి సరైన హైడ్రేషన్ అవసరం.

కొన్ని యోగాసనాలు, ముఖ్యంగా వెన్నెముక సాగదీయడం వంటివి, డిస్క్ హైడ్రేషన్‌ను నిర్వహించడంలో వెన్నెముక ఆరోగ్యాన్ని కాపాడటంలో సహాయపడతాయి. యోగా ద్వారా నియంత్రిత, సున్నితమైన వెన్నెముక కదలికలను ప్రోత్సహిస్తుంది. ఇది ఇంటర్వర్‌టెబ్రల్ డిస్క్‌ల సహజ పంపింగ్ చర్యను సులభతరం చేస్తుంది. ఈ పంపింగ్ చర్య ద్రవాలు (నీటితో సహా) డిస్క్‌ లోపలికి బయటకు కదలడానికి వీలు కల్పిస్తుంది. దీనివల్ల హైడ్రేషన్, పోషణ స్థాయిలు నిర్ధారితమవుతాయి.

– డా. సుభద్ర భూపతిరాజు, యోగా థెరపిస్ట్

వెన్నెముక & క్రీడల ఆరోగ్యం కోసం కేంద్రం ( CSSH )