అమెరికాలో కాల్పుల సంఘటనలు ఆగిపోయే సంకేతాలు కనిపించడం లేదు. ఇప్పుడు వర్జీనియాలోని స్పాట్సిల్వేనియా కౌంటీలో సామూహిక కాల్పులు జరిగాయి. ఇందులో ముగ్గురు మరణించారు. ఈ కాల్పుల్లో చాలా మంది గాయపడి ఆసుపత్రిలో చేరారు. ఈ సంఘటనపై పోలీసు అధికారులు దర్యాప్తు చేస్తున్నారు.

వర్జీనియాలోని స్పాట్సిల్వేనియా కౌంటీలోని టౌన్‌హౌస్ క్యాంపస్ వెలుపల కాల్పుల సంఘటన జరిగింది. ఇందులో ముగ్గురు మరణించారు. మంగళవారం సాయంత్రం 5:30 గంటల ప్రాంతంలో(స్థానిక సమయం) ఓల్డ్ గ్రీన్విచ్ సర్కిల్ ప్రాంతంలో ఈ దాడి జరిగింది. ఈ ప్రాంతం రాజధాని వాషింగ్టన్ డిసికి నైరుతి దిశలో 60 మైళ్ల దూరంలో ఉంది. స్పాట్సిల్వేనియా షెరీఫ్ కార్యాలయం మాట్లాడుతూ, కౌంటీలోని టౌన్ హౌస్ క్యాంపస్‌లో కాల్పులు జరుగుతున్నాయని 911కు కాల్ వచ్చిందని చెప్పారు. సమాచారం అందుకున్న వెంటనే పోలీసు బృందాన్ని సంఘటనా స్థలానికి పంపారు.

ప్రజలు ఆ ప్రాంతానికి దూరంగా ఉండాలని పోలీసులు కోరారు. కాల్పుల ఘటనపై అధికారులు దర్యాప్తు చేస్తున్నారు. ప్రస్తుతానికి ఎవరినీ అరెస్టు చేయలేదు. కాల్పుల్లో గాయపడిన వారిని స్థానిక ఆసుపత్రికి తరలించి చికిత్స అందిస్తున్నారు. బాధితుల గురించి అధికారులు ఎటువంటి అదనపు సమాచారం అందించలేదు. ఈ కాల్పుల్లో నలుగురు గాయపడ్డారని స్థానిక మీడియా నివేదికలు తెలిపాయి.

స్థానిక స్కానర్ రేడియో నివేదికల ప్రకారం.. చాలామంది అధికారులు అనుమానితుల కోసం చురుగ్గా వెతుకులాటలో పాల్గొంటున్నారని తెలిపింది. రాత్రి 9 గంటల వరకు అనుమానితులు ఎవరూ దొరకలేదని చెప్పారు.