OTT Action Thriller: ఓ ఇంగ్లిష్ యాక్షన్ థ్రిల్లర్ సినిమా ఓటీటీలోకి స్ట్రీమింగ్ కు వచ్చింది. ప్రపంచ దేశాధినేతల సదస్సుపై ఉగ్రదాడి నేపథ్యంలో సాగే ఈ సినిమా గురువారం (ఏప్రిల్ 10) స్ట్రీమింగ్ కు వచ్చేసింది. రూ.50 కోట్ల బడ్జెట్ తో తెరకెక్కిన ఈ మూవీ తెలుగులోనూ అందుబాటులో ఉండటం విశేషం.

జీ20 మూవీ ఓటీటీ స్ట్రీమింగ్

అమెజాన్ ప్రైమ్ వీడియోలోకి స్ట్రీమింగ్ కు వచ్చిన ఈ అమెరికన్ యాక్షన్ థ్రిల్లర్ మూవీ పేరు జీ20. గురువారం నుంచి స్ట్రీమింగ్ అవుతోంది. ఈ సినిమా మొత్తాన్ని సౌతాఫ్రికాలో చిత్రీకరించారు. “ఆమెనే లక్ష్యంగా ఉండేది. కానీ ఇప్పుడామెనే ముప్పుగా మారింది” అనే క్యాప్షన్ తో ఈ జీ20 మూవీ స్ట్రీమింగ్ విషయాన్ని ప్రైమ్ వీడియో వెల్లడించింది. కొత్త ఒరిజినల్ మూవీ అంటూ ఈ జీ20ని ఆ ఓటీటీ పరిచయం చేసింది.

జీ20 మూవీ స్టోరీ ఏంటంటే?

జీ20 మూవీని పాట్రిసియా రెగెన్ డైరెక్ట్ చేసింది. ఈ యాక్షన్ థ్రిల్లర్ లో వయోలా డేవిస్, ఆంథోనీ ఆండర్సన్, మర్సాయి మార్టిన్ లాంటి వాళ్లు నటించారు. సౌతాఫ్రికాలోని కేప్ టౌన్ లో ఈ సినిమాను చిత్రీకరించారు. అక్కడ జీ20 సదస్సు జరుగుతుండగా ఉగ్రదాడి నేపథ్యంలో మూవీ సాగుతుంది.

ఈ దాడి నుంచి తనను, తన కుటుంబాన్ని, ప్రపంచాన్ని కాపాడటానికి అమెరికా అధ్యక్షురాలుగా ఉన్న డానియెల్ సటన్ ఏం చేసిందన్నది ఈ సినిమాలో చూడొచ్చు. ఈ జీ20ని థియేటర్లలో కాకుండా నేరుగా ప్రైమ్ వీడియోలోకి తీసుకొచ్చారు. ఈ మూవీ ప్రస్తుతం 240 దేశాల్లో అందుబాటులో ఉంది. ఇండియాలో ఆరు భాషల్లో స్ట్రీమింగ్ కు తీసుకొచ్చారు.

నెట్‌ఫ్లిక్స్‌లోకి మరో యాక్షన్ థ్రిల్లర్

అటు నెట్‌ఫ్లిక్స్ లోకి కూడా ఓ భారీ యాక్షన్ థ్రిల్లర్ మూవీ నేరుగా స్ట్రీమింగ్ కు వస్తోంది. ఆ భారీ బడ్జెట్ యాక్షన్ థ్రిల్లర్ మూవీ పేరు హావోక్ (Havoc). ఈ సినిమాను ఏప్రిల్ 25 నుంచి ఈ ఓటీటీ స్ట్రీమింగ్ చేయనుంది. ఎప్పుడో నాలుగేళ్ల కిందటే ఈ సినిమాను అనౌన్స్ చేయగా.. మొత్తానికి ఇప్పుడు ఓటీటీ స్ట్రీమింగ్ కు వస్తోంది.

హావోక్ ఓ యాక్షన్ థ్రిల్లర్ సినిమా. ఈ మూవీని గారెత్ ఇవాన్స్ డైరెక్ట్ చేశాడు. ఇందులో టామ్ హార్డీ, జెస్సీ మై లీ, ఫారెస్ట్ విటేకర్, టిమోతీ ఓలీఫెంట్ లాంటి వాళ్లు నటించారు. యూకే, అమెరికా దేశాలకు చెందిన సంస్థలు సంయుక్తంగా ఈ సినిమాను నిర్మించాయి. ఏకంగా 90 మిలియన్ డాలర్లు (సుమారు రూ.773 కోట్లు) బడ్జెట్ తో రూపొందించిన మూవీ ఇది.

ఓ డ్రగ్ డీల్ విషయంలో దెబ్బ తిన్న ఓ డిటెక్టివ్.. అండర్‌వరల్డ్ లోకి వెళ్లాల్సి వస్తుంది. అక్కడ చిక్కుకున్న ఓ రాజకీయ నాయకుడి కొడుకును బయటకు తీసుకురావడానికి అతడు ఎలాంటి ప్రయత్నం చేస్తాడన్నది ఈ హావోక్ సినిమాలో చూడొచ్చు. ఇందులో టామ్ హార్డీ.. వాకర్ అనే డిటెక్టివ్ పాత్రలో నటించాడు. ఈ సినిమాకు డైరెక్టర్ ఇవాన్స్ తో కలిసి టామ్ హార్డీ కూడా ఒక ప్రొడ్యూసర్ గా ఉన్నాడు.