బీహార్ అసెంబ్లీ ఎన్నికలకు మరో ఆరు నెలల సమయం ఉన్న నేపథ్యంలో ఎన్నికల ట్రెండ్స్ ను ట్రాక్ చేసే సీ-ఓటర్ ఒక సర్వే నిర్వహించింది. ఆ సర్వేలో వచ్చే బీహార్ అసెంబ్లీ ఎన్నికలకు సీఎం అభ్యర్థిగా జేడీయూ నేత నితీశ్ కుమార్ టాప్ ఛాయిస్ కాదని వెల్లడైంది. బీహార్ లో సుదీర్ఘకాలం ముఖ్యమంత్రిగా పనిచేసిన నితీశ్ కుమార్ గత పదేళ్లుగా ఈ పదవిలో కొనసాగుతున్నారు.

మూడో స్థానంలో నితీశ్

సీ ఓటర్ నిర్వహించిన సర్వేలో బిహార్ లో సీఎం పదవికి ప్రజలు అత్యధికంగా కోరుకుంటున్న వారి జాబితాలో నితీశ్ కుమార్ మూడో స్థానంలో నిలిచారు. ఆయన ప్రజాదరణ 3 పాయింట్లు తగ్గి 15 పాయింట్లకు చేరుకుంది. మరోవైపు, ఎన్నికల వ్యూహకర్తగా పేరు గాంచి, బిహార్ లో జన్ సురాజ్ పేరుతో సొంత పార్టీ పెట్టిన ప్రశాంత్ కిశోర్ ప్రజాదరణ పెరిగింది. సీఎం అభ్యర్థిగా ఆయన రెండో స్థానంలో నిలిచారు. ఆయన ప్రజాదరణ 14.9 పాయింట్ల నుంచి 17.2 పాయింట్లకు చేరుకుంది. తమ జన్ సురాజ్ పార్టీ తొలిసారి బీహార్ ఎన్నికల్లో పోటీ చేస్తుందని, అది కూడా మొత్తం 243 అసెంబ్లీ స్థానాల్లో పోటీ చేస్తుందని ఆయన చెప్పారు.

తొలి స్థానంలో తేజస్వీ యాదవ్

సీ-ఓటర్ సర్వేలో రాష్ట్రీయ జనతాదళ్ (ఆర్జేడీ) నేత తేజస్వి యాదవ్ తదుపరి బీహార్ ముఖ్యమంత్రి కావడానికి అత్యంత ఇష్టపడే అభ్యర్థి అని తేలింది. బిహార్ లో సీఎం పదవికి ప్రజలు అత్యధికంగా కోరుకుంటున్న వారి జాబితాలో తేజస్వీ యాదవ్ తొలి స్థానం దక్కించుకున్నప్పటికీ, ఆయన ప్రజాదరణ కూడా తగ్గడం విశేషం. ఆయన ప్రజాదరణ 40.6 నుంచి 35.5 కు తగ్గింది. కాగా, ఈ జాబితాలో నాల్గవ స్థానంలో బీహార్ ఉప ముఖ్యమంత్రి, బిజెపి నాయకుడు సామ్రాట్ చౌదరి ఉన్నారు. మరో బీహార్ మంత్రి మరియు బిజెపి మిత్రుడు చిరాగ్ పాశ్వాన్ బీహార్ ముఖ్యమంత్రి పదవికి ఐదవ ప్రజాదరణ పొందిన అభ్యర్థి.

ప్రజాదరణలో ఈ మార్పు ఎందుకు?

సి-ఓటర్ వ్యవస్థాపకుడు యశ్వంత్ దేశ్ ముఖ్ రాబోయే బీహార్ ఎన్నికలలో ముగ్గురు కీలక నాయకుల ప్రజాదరణలో వచ్చిన మార్పును విశ్లేషించి, ఈ మార్పుకు దోహదపడిన అంశాలను వివరించారు.

నితీశ్ కుమార్

నితీశ్ కుమార్ ను ఇంకా ఎన్డీఏ ముఖ్యమంత్రి అభ్యర్థిగా ప్రకటించకపోవడం ఒక కారణమన్నారు. అలాగే, ప్రజలు ఆయన ఆరోగ్యంపై ఆందోళనగా ఉన్నారన్నారు. అలాగే, గత పదేళ్లలో నితీశ్ స్థిరంగా ఒక కూటమితో ఉండకపోవడం వల్ల నితీశ్ కుమార్ విశ్వసనీయత తగ్గిందని విశ్లేషించారు.

తేజశ్వి యాదవ్

ఆర్జేడీ ఇంకా పూర్తి స్థాయి ఎన్నికల ప్రచారాన్ని చేపట్టలేదని యశ్వంత్ దేశ్ ముఖ్ పేర్కొన్నారు. బీహార్‌లో కాంగ్రెస్ పూర్తిగా తుడిచిపెట్టుకుపోకపోవచ్చునని దేశ్ ముఖ్ అన్నారు. కాంగ్రెస్ దూకుడు కొంతవరకు ఆర్జేడీ ని దెబ్బతీసే అవకాశం ఉందన్నారు.

ప్రశాంత్ కిషోర్

నితీష్ కుమార్, తేజస్వీ యాదవ్ సృష్టించిన “శూన్యతను” ప్రశాంత్ కిషోర్ ఉపయోగించుకుంటున్నారని దేశ్ ముఖ్ అన్నారు. అయితే, ఈ ప్రజాదరణ తప్పనిసరిగా ఓట్ల పెరుగుదల, సీట్లు గెలవడానికి ఉద్దేశించకపోవచ్చని ఆయన గుర్తించారు. ప్రశాంత్ కిషోర్ జాన్ సురాజ్‌ పార్టీకి “అభ్యర్థుల కొరత ఉండదు” అని దేశ్ ముఖ్ వ్యాఖ్యానించారు. ఏ కూటమి (NDA లేదా INDIA) నుండి అయినా ఎన్నికల టిక్కెట్లు పొందని వారు కిషోర్ పార్టీ లోకి వెళ్లవచ్చని ఆయన అన్నారు. బీహార్ అసెంబ్లీలోని మొత్తం 243 స్థానాలకు ఎన్నికలు ఈ సంవత్సరం అక్టోబర్-నవంబర్‌లలో జరుగుతాయి.