ఓటీటీలో ఈ వీకెండ్ చూడటానికి చాలా సినిమాలు, వెబ్ సిరీసే ఉన్నాయి. అయితే సాధారణంగా శుక్రవారం వచ్చే బ్లాక్‌బస్టర్ సినిమాలు ఈసారి గురువారమే (ఏప్రిల్ 24) అడుగుపెడుతున్నాయి. వీటిలో ఒకటి మలయాళం మూవీ ఎల్2: ఎంపురాన్ కాగా.. మరొకటి తమిళ సినిమా వీర ధీర శూరన్. రెండూ బాక్సాఫీస్ దగ్గర సక్సెస్ సాదించినవే కావడం విశేషం.

ఎల్2: ఎంపురాన్ ఓటీటీ స్ట్రీమింగ్

అత్యధిక వసూళ్లు సాధించిన మలయాళ సినిమాగా చరిత్ర సృష్టించిన ఎల్2: ఎంపురాన్ డిజిటల్ ప్రీమియర్ కు సిద్ధమైంది. ఈ సినిమా గురువారం (ఏప్రిల్ 24) నుంచి జియోహాట్‌స్టార్ లో స్ట్రీమింగ్ కానుంది. అంటే బుధవారం అర్ధరాత్రి 12 దాటగానే ఈ సినిమా అందుబాటులోకి కాబోతోంది. ఈ సినిమా చుట్టూ ఎన్ని వివాదాలు చుట్టుముట్టినా.. బాక్సాఫీస్ దగ్గర సుమారు రూ.270 కోట్లు వసూలు చేసింది.

ఈ యాక్షన్ థ్రిల్లర్ మూవీ గతంలో వచ్చిన లూసిఫర్ సినిమాకు సీక్వెల్. పృథ్వీరాజ్ సుకుమారన్ డైరెక్షన్ లో మోహన్ లాల్ లీడ్ రోల్లో నటించిన మూవీ ఇది. ఇందులో గుజరాత్ అల్లర్లను చూపించడం కారణంగా వివాదం రేగింది. పెద్ద ఎత్తున వ్యతిరేకత, విమర్శలు రావడంతో ఏకంగా 27 కట్స్ తో థియేటర్లలో మళ్లీ ప్రదర్శించారు. దీంతో ఓటీటీలో ఈ సినిమాపై మరింత ఆసక్తి పెరిగింది.

వీర ధీర శూరన్ ఓటీటీ స్ట్రీమింగ్

తమిళ స్టార్ హీరో చియాన్ విక్రమ్ నటించిన మూవీ వీర ధీర శూరన్. ఈ సినిమా థియేటర్లలో రిలీజైన నెల రోజుల్లోపే ఓటీటీలోకి వస్తోంది. గురువారం (ఏప్రిల్ 24) నుంచి అమెజాన్ ప్రైమ్ వీడియోలో స్ట్రీమింగ్ కాబోతోంది. థియేటర్లలో మార్చి 27న రిలీజైన ఈ సినిమా బాక్సాఫీస్ దగ్గర రూ.65.3 కోట్లు వసూలు చేసి ఓ మోస్తరు విజయం సాధించింది.

ఇది యాక్షన్ క్రైమ్ మూవీ. అరుణ్ కుమార్ డైరెక్ట్ చేశాడు. విక్రమ్ తోపాటు ఎస్‌జే సూర్య, సూరజ్ వెంజరమూడు నటించారు. ఈ సినిమాకు థియేటర్లలో ప్రేక్షకుల నుంచి అద్భుతమైన రెస్పాన్స్ వచ్చింది. నిజానికి ఇది పార్ట్ 2. త్వరలోనే పార్ట్ 1 షూటింగ్ ప్రారంభం కాబోతోంది. ఈ సినిమా ఇప్పుడు ప్రైమ్ వీడియోలో ఎలా పర్ఫామ్ చేస్తుందో చూడాలి.