అల్లు అర్జున్ బ్లాక్‌బస్టర్ సినిమా పుష్ప 2కు థియేటర్లు, ఓటీటీలో వచ్చినంత రెస్పాన్స్ టీవీ ప్రీమియర్ కు రాలేదు. పుష్ప 2 మూవీ ఏప్రిల్ 13న స్టార్ మా ఛానెల్లో టెలికాస్ట్ అయిన విషయం తెలిసిందే. అయితే ఈ సినిమాకు ఊహించినంత టీఆర్పీ రేటింగ్ మాత్రం రాకపోవడం గమనార్హం.

టీఆర్పీ తక్కువే కానీ..

ఐకాన్ స్టార్ అల్లు అర్జున్ పుష్ప 2తో చరిత్ర సృష్టించిన విషయం తెలుసు కదా. ఈ మూవీ ప్రపంచవ్యాప్తంగా రూ.1800 కోట్లకుపైగా వసూలు చేసింది. తర్వాత నెట్‌ఫ్లిక్స్ లోనూ దూసుకెళ్లింది. ఈ ఏప్రిల్ 13న స్టార్ మాలో టీవీ ప్రీమియర్ అయింది. దీనికి 12.61 టీఆర్పీ రేటింగ్ మాత్రమే నమోదైంది. ఇది కాస్త తక్కువే అని చెప్పాలి. కానీ రెండంకెల రేటింగ్ అందుకోవడం కాస్త ఊరట కలిగించే విషయం. పుష్ప 1 మూవీకి 22.54 రేటింగ్ వచ్చింది. దాంతో పోలిస్తే ఇది చాలా తక్కువే.

నిజానికి ఆ రోజు అదే సమయానికి జీ తెలుగులో సంక్రాంతికి వస్తున్నాం మూవీ కూడా టెలికాస్ట్ కావడం కూడా పుష్ప 2పై టీఆర్పీపై కాస్త ప్రభావం చూపించిందని అనుకోవచ్చు. తెలుగులో పరిస్థితి ఇలా ఉంటే.. ఈ సినిమా కన్నడ, తమిళం, మలయాళంలోనూ టీవీ ప్రీమియర్ అయింది. కన్నడలో అన్నింటి కంటే తక్కువగా 4.2 రేటింగ్ నమోదు కాగా.. మలయాళంలో 7.05, తమిళంలో 5.37 రేటింగ్స్ నమోదయ్యాయి.

బన్నీ ఆ సినిమాల కంటే చాలా తక్కువే

నిజానికి టీవీ ప్రీమియర్ టీఆర్పీ రేటింగ్స్ లో అల్లు అర్జున్ దే రికార్డు. అతడు నటించిన అల వైకుంఠపురంలో మూవీ క్రియేట్ చేసిన రికార్డు ఇప్పటి వరకూ చెక్కుచెదరలేదు. ఆ సినిమాకు ఏకంగా 29.4 రేటింగ్ రావడం విశేషం. ఇక పుష్ప 22.54తో రెండో స్థానంలో ఉంది. బన్నీ నటించిన దువ్వాడ జగన్నాథం మూవీకి కూడా 21.7 రేటింగ్ వచ్చింది. ఆ సినిమాలతో పోలిస్తే ఇప్పుడు పుష్ప 2కి వచ్చిన రేటింగ్ చాలా తక్కువే.

అయితే ఓటీటీకి క్రేజ్ పెరుగుతూ, క్రమంగా టీవీ ఛానెల్స్ కు ప్రేక్షకులు దూరమవుతున్న వేళ రెండంకెల టీఆర్పీని కూడా గొప్పగానే భావించాలి. మార్చి 1న ప్రీమియర్ అయిన సంక్రాంతికి వస్తున్నాం కూడా 15కుపైగా టీఆర్పీ సాధించింది. అంతకుముందే కాకుండా అదే సమయానికి ఓటీటీలోకి రావడం ఆ సినిమాకు మెరుగైన టీఆర్పీ నమోదు కావడానికి కారణంగా చెప్పొచ్చు.