JioTV Premium Plans: 14 ఓటీటీలు ఒకే ప్లాన్‌తో.. జియో టీవీ ప్రీమియం బంపర్ ఆఫర్

JioTV Premium Plans: ప్రముఖ టెలికాం కంపెనీ జియో తన కొత్త జియోటీవీ ప్రీమియం సబ్‌స్క్రిప్షన్ ప్లాన్స్ అనౌన్స్ చేసింది. ఈ కొత్త ప్లాన్స్ ప్రకారం ఏకంగా 14 ఓటీటీలను ఒకే ప్లాన్ తో పొందే అవకాశం కల్పించింది. దీంతోపాటు మూడు కొత్త ప్రీపెయిడ్ ప్లాన్స్ కూడా అనౌన్స్ చేయడం విశేషం. నెలవారీ, మూడు నెలలు, వార్షిక ప్లాన్స్ రూ.398 నుంచి ప్రారంభం కానున్నాయి.

ఈ జియో కొత్త ప్లాన్స్ తో కాల్స్, ఎస్ఎంఎస్ లతోపాటు ప్రముఖ ఓటీటీలు ప్రైమ్ వీడియో, సోనీ లివ్, జీ5, డిస్నీ ప్లస్ హాట్‌స్టార్ లాంటివి జియోటీవీ యాప్ ద్వారా పొందే వీలుంటుంది. శుక్రవారం (డిసెంబర్ 15) నుంచి ఈ కొత్త ప్లాన్స్ యూజర్లకు అందుబాటులోకి వచ్చాయి. ఈ మూడు ప్లాన్స్ కూడా రోజుకు 2 జీబీ డేటా, 100 ఎస్ఎంఎస్, అన్‌లిమిటెడ్ కాల్స్ అందిస్తాయి.

జియో కొత్త ప్రీపెయిడ్ ప్లాన్స్ ఇవే..

జియో కొత్తగా రూ.398, రూ.1198, రూ.4498 ప్లాన్స్ తీసుకొచ్చింది. వీటి కింద 28, 84, 365 రోజుల వేలిడిటీ లభిస్తుంది. ఈ మూడు ప్లాన్స్ తోనూ 14 ఓటీటీ ప్లాట్‌ఫామ్స్ కు యాక్సెస్ లభిస్తుంది. జియో సినిమా ప్రీమియం, డిస్నీ ప్లస్ హాట్‌స్టార్, సోనీ లివ్, జీ5, అమెజాన్ ప్రైమ్ వీడియో (మొబైల్), లయన్స్‌గేట్ ప్లే, డిస్కవరీ+, డాక్యుబే, సన్ఎన్ఎక్స్‌టీ, హొయ్‌చొయ్, ప్లానెట్ మరాఠీ, చౌపాల్, ఎపిక్ఆన్, కంచా లంకాలాంటి ఓటీటీల యాక్సెస్ లభిస్తుంది.

ఓటీటీలకు క్రమంగా డిమాండ్ పెరుగుతున్న ఈ కాలంలో అన్ని టెలికాం కంపెనీలు ప్రత్యేక ప్లాన్స్ తో ఉచితంగా వివిధ ఓటీటీల సబ్‌స్క్రిప్షన్లను యూజర్లకు అందిస్తున్నాయి. జియో యూజర్లకు ఇప్పటికే జియో టీవీ, జియో సినిమాలాంటి ఆ సంస్థకు చెందిన యాప్స్ ఫ్రీయాక్సెస్ ఉండగా.. తాజా ప్లాన్స్ ప్రముఖ ఓటీటీల సబ్‌స్క్రిప్షన్లు కూడా అందిస్తోంది.