Jack fruit curry: నాన్‌వెజ్ మరిపించే.. పనసకాయ మసాలా గ్రేవీ కర్రీ..

పనస పండు తొనలు తినడం వరకే కాకుండా పనస కాయతో నాన్‌వెజ్ మరిపించే కూర కూడా చేసుకోవచ్చు. ఈ కూర చపాతీ, అన్నంలోకి ఎలాగైనా బాగుంటుంది. కాస్త మసాలాలు చేసి గ్రేవీలో ఉడికిన కూర తింటే మీకు ఫేవరైట్ అయిపోతుంది. మసాలా కూడా సింపుల్ గా ఇంట్లోనే రెడీ అయిపోతుంది. ఈ కూర రుచిగా, సింపుల్ గా ఎలా చేసుకోవాలో చూసేయండి.

పనస కూర తయారీకి కావాల్సిన పదార్థాలు:

400 గ్రాముల పనస కాయ

2 చెంచాల నూనె

పావు చెంచా ఆవాలు

పావు చెంచా జీలకర్ర

2 బిర్యానీ ఆకులు

2 ఎండుమిర్చి

1 ఉల్లిపాయ, ముక్కలు

4 వెల్లుల్లి రెబ్బలు

ఇంచు అల్లం ముక్క

అరచెంచా ధనియాల పొడి

అరచెంచా పసుపు

పావు చెంచా మిరియాల పొడి

2 చెంచాల ఎండు కొబ్బరి

చిన్న దాల్చిన చెక్క ముక్క

2 లవంగాలు

అరచెంచా షాజీరా

తగినంత ఉప్పు

పనస కూర తయారీ విధానం:

1. కడాయి పెట్టుకుని వేడెక్కాక అరచెంచా నూనె వేసుకోవాలి. నూనె వేడెక్కాక మసాలా దినుసులన్నీ ఒక్కోటి వేసుకోవాలి. దాల్చిన చెక్క, బిర్యానీ ఆకు, షాజీర, లవంగాలు, వెల్లుల్లి, కొబ్బరి, అల్లం ముక్క వేసుకుని ఒక నిమిషం వేగనివ్వాలి.
2. చల్లారాక వీటన్నింటినీ మెత్తగా మిక్సీ పట్టుకుని పక్కన పెట్టుకోవాలి.
3. అదే కడాయిలో నూనె వేసుకుని వేడెక్కాక జీలకర్ర, ఆవాలు వేసుకుని చిటపటలాడనివ్వాలి. ఎండుమిర్చి కూడా వేసుకుని వేగనివ్వాలి.
4. ఉల్లిపాయ ముక్కలు కూడా వేసుకుని కాస్త రంగు మారేదాకా వేయించుకోవాలి.
5. ఆలోపు పనస ముక్కల్ని కత్తికి, చేతికి నూనె రాసుకుంటూ చిన్న చిన్న ముక్కలుగా కట్ చేసుకోవాలి.
6. వేగుతున్న ఉల్లిపాయ ముక్కల్లో ముందుగా మిక్సీ పట్టుకున్న మసాలా కూడా వేసుకుని కాసేపు నూనెలో వేగనివ్వాలి. అందులో పనస ముక్కలు కూడా వేసుకుని బాగా కలుపుతూ వేపుకోవాలి.
7. మూత పెట్టి ముక్కల్ని మగ్గనివ్వాలి. కాస్త మెత్త బడ్డాక ఉప్పు, ధనియాల పొడి, జీలకర్ర పొడి, పసుపు వేసుకుని ఉడకనివ్వాలి.
8. ఇప్పుడు కప్పున్నర నీళ్లు పోసి మూత పెట్టుకుని అవి ఇంకిపోయేదాకా కూర ఉడకనిచ్చి, చివరగా కొత్తిమీర చల్లుకుని దించేసుకుంటే సరి. పనసకాయ కూర రెడీ అయినట్లే.