Rajamouli with Salaar Team: రాజమౌళికి డైరెక్షన్ తానే నేర్పించానంటున్న ప్రభాస్.. సలార్ టీమ్ ఇంటర్వ్యూ ప్రోమో చూశారా?

Rajamouli with Salaar Team: సలార్ మూవీ ప్రమోషన్లలో భాగంగా ప్రభాస్, ప్రశాంత్ నీల్, పృథ్వీరాజ్ సుకుమారన్ లతో రాజమౌళి చేసిన స్పెషల్ ఇంటర్వ్యూ త్వరలోనే అభిమానుల ముందుకు రానుంది. శనివారం (డిసెంబర్ 16) ఈ ఇంటర్వ్యూ జరగగా.. ఆదివారం (డిసెంబర్ 17) ప్రోమో రిలీజ్ చేశారు. ఇది చాలా ఇంట్రెస్టింగ్ గా సాగింది.

రాజమౌళికి డైరెక్షన్ నేర్పింది నేనే అంటూ ప్రభాస్ ఓ ఫన్నీ కామెంట్ చేయడం విశేషం. అంతేకాదు బాహుబలి 3 కూడా త్వరలోనే ఉండబోతున్నట్లు తెలుస్తోందని కూడా అతడు అన్నాడు. కేజీఎఫ్ కు, సలార్ కు ఉన్న లింకేంటని ప్రశాంత్ నీల్ ను రాజమౌళి అడగటం ఈ ప్రోమోలో చూడొచ్చు. అయితే దీనికి అతడు ఏం సమాధానం ఇచ్చాడన్నది మాత్రం పూర్తి ఇంటర్వ్యూలోనే తేలనుంది.

అయితే సలార్ రిలీజ్ కు ముందు మాత్రం ఈ ఇంటర్వ్యూనే అతిపెద్ద ప్రమోషన్ అని చెప్పొచ్చు. ప్రభాస్ కు కెరీర్లోనే అతిపెద్ద హిట్స్ అందించిన రాజమౌళి.. ఇప్పుడు అన్ని రికార్డులు బ్రేక్ చేస్తుందని భావిస్తున్న సలార్ మూవీ టీమ్ ను ఇంటర్వ్యూ చేయడం అభిమానుల్లో ఆసక్తి రేపుతోంది. ఈ ప్రోమోలో ప్రశాంత్ నీల్ వర్కింగ్ స్టైల్ పైనా ప్రభాస్, పృథ్వీరాజ్ సుకుమారన్ ఇంట్రెస్టింగ్ కామెంట్స్ చేశారు.

ఇద్దరు బెస్ట్ ఫ్రెండ్స్ స్టోరీయే సలార్ అని ప్రశాంత్ చెప్పగా.. ఖాన్సార్ సిటీయే హింసాత్మకమైన సిటీ అని ప్రభాస్ అన్నాడు. పూర్తి ఇంటర్వ్యూ మంగళవారం (డిసెంబర్ 19) రిలీజ్ చేయనున్నారు. ఇక సలార్ మూవీ తొలి టికెట్ రాజమౌళే అందుకున్న విషయం తెలిసిందే. వచ్చే శుక్రవారం (డిసెంబర్ 22) సలార్ రిలీజ్ కానుంది. ఇప్పటికే అడ్వాన్స్ బుకింగ్స్ ప్రారంభం కాగా.. షారుక్ ఖాన్ డంకీ మూవీతో పోటీ పడుతూ కలెక్షన్లు రాబడుతోంది.

సలార్ కు రూ.3.58 కోట్లు రాగా.. డంకీ రూ.4.45 కోట్లు వసూలు చేసింది. సలార్ కంటే ఒక రోజు ముందు అంటే డిసెంబర్ 21నే డంకీ రిలీజ్ కానుంది. అయితే ఆ సినిమా కేవలం హిందీ వెర్షనే కాగా.. సలార్ పాన్ ఇండియా స్థాయిలో ఐదు భాషల్లో రాబోతోంది.