Mahesh Babu Rajamouli Movie: మహేష్ బాబు, రాజమౌళి సినిమా కోసం ఫిల్మ్ సిటీలో రూ.100 కోట్ల సెట్

Mahesh Babu Rajamouli Movie: ప్రస్తుతం టాలీవుడ్‌లోనే కాదు పాన్ ఇండియా లెవల్లో ఎంతో ఆసక్తి రేపుతోంది మహేష్ బాబు, రాజమౌళి మూవీ. ఈ యాక్షన్ అడ్వెంచర్ డ్రామా ఎప్పుడెప్పుడు ప్రారంభం అవుతుందా అని ఫ్యాన్స్ ఆసక్తిగా ఎదురు చూస్తున్నారు. ఆర్ఆర్ఆర్ మూవీ తర్వాత చాన్నాళ్లపాటు ఆ మూవీ ప్రమోషన్లలోనే బిజీగా ఉన్న రాజమౌళి.. ప్రస్తుతం మహేష్ సినిమా ప్రీప్రొడక్షన్ పనుల్లో తీరిక లేకుండా ఉన్నాడు.

ప్రస్తుతం ఈ మూవీ షూటింగ్ కు సంబంధించి ఓ ఇంట్రెస్టింగ్ అప్‌డేట్ వచ్చింది. మహేష్ బాబు, రాజమౌళి మూవీ రామోజీ ఫిల్మ్ సిటీలో ప్రారంభం కానుంది. దీనికోసం ఏకంగా రూ.100 కోట్ల ఖర్చుతో ఓ భారీ సెట్ వేయనున్నట్లు తెలిసింది. మూవీలో ఎక్కువ భాగం షూటింగ్ ఈ సెట్లోనే జరగనున్నట్లు సమాచారం. రాజమౌళి సినిమాల్లో ఉండే భారీతనం ఇప్పుడతని నెక్ట్స్ మూవీలోనూ కనిపించనుందనడానికి ఇదే నిదర్శనం.

ఈ సెట్ తోపాటు ఆఫ్రికా, యూరప్ లలోనూ సినిమా షూటింగ్ జరగనుంది. ఇప్పటికే రాజమౌళి లొకేషన్లను కూడా ఫైనల్ చేశాడు. ప్రీప్రొడక్షన్ పనులు దాదాపు పూర్తి కావడంతో ఇక సినిమా షూటింగ్ ప్రారంభం కావడమే మిగిలింది. వచ్చే ఏడాది ఏప్రిల్లో షూటింగ్ మొదలు కానున్నట్లు ఇప్పటికే వార్తలు వచ్చాయి. ప్రస్తుతం మహేష్ గుంటూరు కారం మూవీ పూర్తి చేశాడు.

ఈ సినిమా జనవరి 12న సంక్రాంతి సినిమాగా రిలీజ్ అవుతోంది. అంతకుముందు మహేష్ వారం పాటు అమెరికాలో న్యూఇయర్ సెలబ్రేట్ చేసుకోనున్నాడు. జనవరి 5న తిరిగి వచ్చే అతడు.. గుంటూరు కారం ప్రమోషన్లలో పాల్గొననున్నాడు. ఆ సినిమా రిలీజైన తర్వాత ఇక మహేష్ తన తర్వాతి సినిమాపై దృష్టి సారించనున్నాడు. ఈ సినిమాను రెండు భాగాలుగా తీసుకురావాలని రాజమౌళి భావిస్తున్నట్లు సమాచారం.

మహేష్ తో సినిమా కోసం జక్కన్న ఇప్పటికే భారీ కసరత్తులు చేశాడు. అమెరికాలోని ప్రముఖ క్యాస్టింగ్, వీఎఫ్ఎక్స్ ఏజెన్సీలతో ఒప్పందాలు కుదుర్చుకున్నాడు. పాన్ ఇండియా కాదు పాన్ వరల్డ్ లెవల్లో తన నెక్ట్స్ మూవీని తీసుకురావడానికి రాజమౌళి సిద్ధంగా ఉన్నాడు. అయితే ఈ మూవీ ఎప్పుడు పూర్తయి ప్రేక్షకుల ముందుకు వస్తుందన్నది మాత్రం ఇప్పట్లో తెలిసే అవకాశం లేదు.