చంద్రబాబు ఫక్తు రాజకీయ వ్యాపారి

తాడేప‌ల్లి: చంద్రబాబు ఫక్తు రాజకీయ వ్యాపారి అని రాష్ట్ర సాంఘిక సంక్షేమ శాఖ మంత్రి మేరుగు నాగార్జున మండిప‌డ్డారు. పేదలను చంద్రబాబు ఎప్పుడైనా పట్టించుకున్నారా అని ఆయ‌న‌ ప్రశ్నించారు. బీసీలు జడ్జిలుగా పనికిరారని లేఖలు రాసింది చంద్రబాబు కాదా చెప్పాలన్నారు. చంద్రబాబు ఒక పొలిటికల్‌​ బ్రోకర్‌ అని మంత్రి ఫైరయ్యారు. సీఎం వైయ‌స్‌ జగన్‌ పాలనలో ఎస్సీ, ఎస్టీ, బీసీ,మైనార్టీలకు న్యాయం జరుగుతోందన్నారు. అంబేద్కర్‌ కోరుకున్న పాలన ఏపీలో ఉందని చెప్పారు. గతంలో ఇచ్చిన హామీల్లొ ఒక్కదానినైనా చంద్రబాబు నెరవేర్చారా అని  ప్రశ్నించారు.   బుధవారం తాడేపల్లిలో మంత్రి మీడియాతో మాట్లాడారు.  

మేరుగు నాగార్జున మీడియాతో ఇంకా ఏమన్నారంటేః

మా పార్టీ అభ్యర్థుల్ని మార్చితే మీకేంటి నొప్పి:
రాబోయే ఎన్నికలకు సంబంధించి మా పార్టీ అభ్యర్థుల మార్పుల చేర్పుల్లో మా నాయకులు శ్రీ వైఎస్‌ జగన్‌మోహన్‌రెడ్డి కొన్ని కీలక నిర్ణయాలు తీసుకుంటున్నారు. అభ్యర్థుల మార్పులు, చేర్పులనేవి మా పార్టీ అంతర్గత వ్యవహారం. ఎన్నికల వ్యూహంలో గెలుపు తంత్రం కోసం అభ్యర్థులను మార్చుకోవడం అనేది రాజకీయాల్లో పరిపాటిగా వస్తున్న విషయమే. అయితే, పచ్చ మీడియా అధినేతలు రామోజీరావు, రాధాకృష్ణ, టీవీ5 నాయుడుకు ఏం సంబంధం ఉందని వారు ఉలిక్కిపడుతున్నారు. ఎందుకో వారందరూ విపరీతమైన భయంలో ఉన్నారు. వారి వెన్నులో వణుకు, గుండెల్లో భయానికి కారణమేంటి..? మీ నాయకుడు చంద్రబాబు ఇక ఆంధ్రరాష్ట్ర రాజకీయాల్లో మిగలడనా..? తెలుగుదేశం పార్టీ ఆంధ్ర రాజకీయాల్లో కనుమరుగవుతుందనా..? మీరు వెన్నుదన్నుగా ఉన్న పార్టీ అధికారంలోకి ఇక రాలేదనా..? ఎందుకంత ఆందోళనతో మీరు ఉలిక్కిపడుతున్నారు..? ఒక రాజకీయ పార్టీగా ఎన్నికల సమరంలో మా అభ్యర్థుల్ని ఎవర్ని పెట్టుకుంటామో.. వారిని ఎలా గెలిపించుకుంటామో అనేది మా వ్యవహారం. అలాంటిది, మీకు సంబంధం లేని ఈ వ్యవహారంపై మీ పచ్చపైత్యపు రాతలెందుకు రాస్తున్నారు..? అని ప్రశ్నిస్తున్నాను. 

పచ్చమీడియా ఊడిగానికి తోడైన పురంధేశ్వరిః
        చంద్రబాబుకు పచ్చమీడియా పత్రికలు, చానళ్లు ఎటూ ఊడిగం చేస్తూనే ఉన్నాయి. రామోజీరావు, రాధాకృష్ణ, టీవీ5 నాయుడుతో ఆయన్ను గునపాలు పెట్టి పైకి లేపాలని ప్రయత్నిస్తున్నా.. చంద్రబాబు మాత్రం రాజకీయంగా అంగుళం కూడా పైకిలేచే పరిస్థితి కనిపించడంలేదు. వీళ్లందరితో పాటు కొత్తగా మరొకరు చేరారు. ఆమె ఎవరంటే, చంద్రబాబుకు బీ టీమ్‌ పురందేశ్వరి.

బీజేపీ రాష్ట్ర అధ్యక్షురాలైన పురంధేశ్వరి కూడా చంద్రబాబు బ్రాంచి ఆఫీసుగా ప్రతీరోజూ వైఎస్‌ఆర్‌ కాంగ్రెస్‌ పార్టీ మీద, జగన్‌మోహన్‌రెడ్డి గారిపైన విషం కక్కుతూనే ఉన్నారు. ఆమె పరిస్థితి ఎక్కడదాకా వెళ్లిందంటే, ఎస్సీ, ఎస్టీ, బీసీ, మైనార్టీల గురించి మాట్లాతున్నారు. అమ్మా.. పురంధేశ్వరీ, ఎస్సీలపైన దాడుల చరిత్ర తెలుసుకోవాలంటే కారంచేడు ఘటనను గుర్తుకుతెచ్చుకో తల్లీ.. అక్కడ దళితుల ఊచకోత ఎలా జరిగిందో.. అగ్రకుల అహంకారంతో ఎస్సీలను ఏ విధంగా అణగదొక్కిందో తెలుసు కుంటే మంచింది. మరి, కారంచేడు ఘటనప్పుడు నువ్వెక్కడి పోయావు..? అలాంటి మీరు, ఈరోజు మా జగన్‌గారిని టార్గెట్‌ చేస్తూ ఎస్సీ, ఎస్టీల దాడుల గురించి మాట్లాడటం చాలా సిగ్గుచేటని తెలుసుకుంటే చాలా మంచిందని గుర్తుచేస్తున్నాను.

తండ్రికి వెన్నుపోటు పొడిచిన మరిది కోసం పురంధేశ్వరి పాట్లుః
    మీ నాన్న రెక్కల కష్టంతో నెలకొల్పింది తెలుగుదేశం పార్టీ. ఆ పార్టీని అప్పన్నంగా లాగేసుకునేందుకు మీ మరిది చంద్రబాబు, మీ నాన్నను ఎలా వెన్నుపోటు పొడిచాడో మీకు తెలుసు. పార్టీని, జెండాను, ఎన్టీఆర్ ట్రస్టును, దాని ఆస్తుల్ని కూడా లాక్కుంటే మూగబోయిన నీ గళం మళ్లీ ఇన్నాళ్లకు మరిది బాగు కోసం వినిపిస్తున్నదా..? ఆనాడు, మీ తండ్రి ఎన్టీ ఆర్‌ గారు కాంగ్రెస్‌కు వ్యతిరేకంగా రాష్ట్రంలో ఒక ప్రాంతీయ పార్టీగా తెలుగుదేశం పార్టీని స్థాపిస్తే.. ఈరోజు అదే కాంగ్రెస్‌తో తెలుగుదేశం పార్టీ దోస్తీ కట్టిన విషయం మీకు తెలియదా. మరోవైపు బీజేపీతో పొత్తుల కోసం ఆరాటపడుతుంది నిజం కాదా?. విలువలు, నైతికత, సిద్ధాంతం లేనటువంటి మీ మరిదికి సపోర్టు చేస్తున్న మిమ్మల్ని ప్రజలు ఏవిధంగా అర్ధం చేసుకోవాలి..?. దయ్యాలు వేదాలు వల్లించినట్టు..  మీరొచ్చి వైఎస్‌ఆర్‌ కాంగ్రెస్‌ పార్టీ గురించి మాట్లాడతారా..?  

చంద్రబాబు బతుకంతా పొత్తులతో అంటకాగడమే..
    నారా చంద్రబాబు నాయుడు రాజకీయ జీవితం చూస్తే.. ఆయన పొత్తు పెట్టుకోని పార్టీ ఏమైనా ఉందా..?. ఆయన కాంగ్రెస్‌తో, బీజేపీతో, కమ్యూనిస్టులతోనూ.. ఆఖరుకు జనసేన పార్టీతోనూ పొత్తులు పెట్టుకున్నాడు. ఎన్నికల కురుక్షేత్రంలో ప్రజల ముందు నిలబడి గెలిచే దమ్ముంటే..  మూకుమ్మడిగా పార్టీల్ని కూడగట్టి పొత్తులు పెట్టుకోవడం ఎందుకు..? అలాంటి దమ్మూ, ధైర్యం లేదుకనుకనే చంద్రబాబు పరిస్థితి పొత్తుల వ్యవహారమైంది. 

మంచి జరిగితేనే దీవించమన్న దమ్మున్న నేత జగన్‌
    వైఎస్‌ఆర్‌ కాంగ్రెస్‌ అధినేత, గౌరవ ముఖ్యమంత్రి శ్రీ వైఎస్‌ జగన్‌మోహన్‌రెడ్డి రేపటి ఎన్నికల్ని దృష్టిలో పెట్టుకుని ఆయన చేస్తున్న నినాదం ఏంటో తెలుసా..? మన ప్రభుత్వం ద్వారా మీకు లబ్ధి కలిగి, మీ కుటుంబానికి మంచి జరిగితేనే మాకు ఓటేసి ఆశీర్వదించమని కోరుతున్న దమ్మున్న నాయకులు జగన్‌గారు. నవరత్నాల సంక్షేమం రాష్ట్రంలోని ప్రతీ ఇంటింటికీ, గడప గడపకు అందించాము కనుకే, మేం ధైర్యంగా మా పార్టీ తరఫున పర్యటనలు చేస్తున్నాం. ప్రజలు మమ్మల్ని ఆశీర్వదించి అక్కున జేర్చుకుంటున్నారు. రాష్ట్రంలో ఏ గ్రామం వెళ్ళినా ఇలాంటి పరిస్థితి ఉంది గనుకే, మా నాయకులు జగన్‌ గారు రేపటి ఎన్నికల్లో ‘వై నాట్‌ 175’ అన్నారు. 

బాబుకు బుద్ధిచెప్పేందుకు సిద్ధంగా ఉన్న ఎస్సీలుః
        చంద్రబాబు విషయానికొస్తే.. సుదీర్ఘకాలం రాజకీయాల్లో ఉండి 14 ఏళ్లపాటు ముఖ్యమంత్రిగా పనిచేసి ఆయన ఏనాడైనా ఎస్సీ, ఎస్టీ, బీసీ, మైనార్టీల గురించి పట్టించుకున్నావా..? రాజకీయాల్లో మమ్మల్ని ఉద్దేశించి నువ్వు చేసిన హేళనలు, అసమానతలు మాకు గుర్తుకురావని అనుకుంటున్నావా..? ఇప్పుడు ఎన్నికలు సమీపిస్తుండగా, మళ్లీ మేము గుర్తుకొస్తున్నామా..? ఒకపక్క, మా జాతి సంక్షేమం కోసం పనిచేస్తూ నా ఎస్సీ, నా ఎస్టీ, నా బీసీ, నా మైనార్టీ అంటూ మా నాయకులు వైఎస్‌ జగన్‌మోహన్‌రెడ్డి గారు పనిచేస్తున్నారు. అన్నింటా మమ్మల్ని ముందం జలో నిలబెట్టి మాకు రాజ్యాంగ సాధికారతను కల్పిస్తుంటే.. నువ్వు మాపై లేని ప్రేమను చూపిస్తూ డ్యాన్సులు వేస్తున్నావు. దళితులపై నీకున్న చిత్తశుద్ధి ఏపాటిదో.. మాకు తెలియదనుకుంటున్నావా..?  ‘ఎస్సీల్లో ఎవరైనా పుట్టాలనుకుంటారా..?’ అని మమ్మల్ని అవమానిస్తూ నువ్వు మాట్లాడిన మాటలు చీము,నెత్తురున్న ఏ ఒక్క ఎస్సీ, ఎస్టీ కూడా మరిచిపోరు. మా కులాన్ని అవహేళన చేసినటువంటి నిన్ను అంత తేలిగ్గా వదులుతామా..? నీకు బుద్ధిచెప్పేందుకు ఎస్సీలంతా సిద్ధంగా ఉన్నారని గుర్తుంచుకో.. 

బీసీలు ఎప్పటికీ అణగారిన వర్గాల్లానే బతకాలని, వారిని హీనంగా చూసిన చంద్రబాబు.. తోకలు కత్తిరిస్తామని, అంతుచూస్తానంటూ బెదిరించాడు. బీసీలు జడ్జిలుగా పనికిరారని కేంద్రానికి ఉత్తరం రాసిన నువ్వు.. ఇప్పుడు మామీద దొంగ ప్రేమలు చూపుతుంటే మరిచిపోవడానికి బీసీలేమైనా అమాయకులా..? నీ రాజకీయ అనుభవంలో బీసీలకు నువ్వు చేసిన మేలేంటో చెప్పే దమ్ముందా చంద్రబాబూ..? అలాగే, మైనార్టీలనూ ఎదుగుబొదుగు లేకుండా అంతే అణగదొక్కావు. గిరిజనుల కోసం ఏ రోజూ నువ్వు ఒక్క క్షణం ఆలోచించలేదు. రాజకీయాల్లో ఎన్నికలు రాగానే మళ్లీ మమ్మల్ని అక్కునజేర్చుకోవాలని డ్యాన్సులేస్తూ, కపటనాటకాలేస్తే నీ పాపాల్ని మేము మరిచిపోమని చంద్రబాబు గుర్తుంచుకోవాలి.

బాబు ఒక పొలిటికల్‌ బ్రోకర్‌ః
చంద్రబాబు ఫక్తు రాజకీయ వ్యాపారి. ఆయనొక పొలిటికల్‌ బ్రోకర్‌. ఎమ్మెల్యేల సీట్ల విషయంలో డబ్బులు తీసుకుంటాడు. ఎంపీ అభ్యర్థుల ఎంపిక దగ్గర నుంచీ రాజ్యసభ సీట్లును కూరగాయల బేరంలా అమ్ముకుంటాడు. టీడీపీకి అనాదిగా పనిచేస్తున్న ఎస్సీ, ఎస్టీ, బీసీ, మైనార్టీ పేద నాయకుల్ని హీనంగా చూస్తాడు. ఎందరో ఎస్సీ నాయకులు  నీ హేయమైన ప్రవర్తనకు కన్నీళ్లు పెట్టుకుని బయటకు వచ్చిన సందర్భాలున్నాయి. అదే మా నాయకులు శ్రీ వైఎస్‌ జగన్‌గారు ఎస్సీ, ఎస్టీ, బీసీ, మైనార్టీ, కాపు సోదరుల్లో ఎవర్ని ఎమ్మెల్యేలు, ఎంపీలను చేద్దామా.. అని వెతికి మరీ మమ్మల్ని ముందుకు తెస్తున్నారు. ఈ పరిస్థితిని రాష్ట్రప్రజలంతా కూడా కళ్లారా చూస్తున్నారు. 

మీ కుట్రలన్నీ చివరికి నీటిమూటలే..
    చంద్రబాబు విషకూటమిలో పచ్చమీడియా ప్రధాన భూమిక పోషిస్తుంది. ఈ పచ్చమీడియా రోజూ కారుకూతలు రాస్తూ.. ఉన్నవి లేనట్టు, లేనివి ఉన్నట్టు.. జరగనివి కూడా జరిగినట్లు అభూతకల్పనలు, కట్టుకథలతో ప్రజల్ని మభ్యపెట్టాలని చూస్తున్నాయి. ప్రభుత్వానికి వ్యతిరేకంగా ఆయా వర్గాలను రెచ్చగొడుతూ..  కార్మిక సంఘాలతో ఉద్యమాలు చేయిస్తున్నారు. మీరెంత విషాన్ని నూరిపోసి, కుట్రలతో దొంగ ఉద్యమాలు చేయించినా.. అవన్నీ చివరికి నీటిమూటలుగానే తేలుతాయి. మీరు గుడ్డ కాల్చి మామీద వేయడానికి తప్పుడు కార్యక్రమాలు చేయిస్తున్నారనేది ఈ రాష్ట్ర ప్రజలు అంతా గమనిస్తూనే ఉన్నారు.

మళ్లీ సీఎంగా జగనన్నే అనేది ప్రజా నినాదంః
 పేదల ఆకలి చూసి తిండి పెట్టేది ఎవరు..? భావితరాల భవిష్యత్తు కోసం ఎవరు చూస్తున్నారు..? బడుగు, బలహీనవర్గాలను సామాజికంగా, ఆర్థికంగా, రాజకీయంగా నిలబెట్టి ప్రోత్సహించే నాయకుడు ఎవరనేది ప్రజల్లో చాలా స్పష్టత ఉంది. అందుకే, వైఎస్‌ఆర్‌సీపీకి రాష్ట్రంలో అడుగడుగునా ఆదర ణ లభిస్తోంది. మళ్లీ జగనన్ననే ముఖ్యమంత్రిగా తెచ్చుకునేందుకు అన్ని వర్గాల ప్రజలు ఎదురుచూస్తున్నారు. అందుకే, మళ్లీ సీఎం జగనన్ననే అనేది ప్రజా నినాదమైంది. మీ పచ్చమీడియా పైత్యం, ఎన్ని వెర్రితలలేసినా ప్రజలు మీ మాటల్ని, రాతల్ని నమ్మరు గాక నమ్మరు.