Praja Palana : ఆరు గ్యారంటీల అమలుకు కేబినెట్ సబ్ కమిటీ, సీఎం రేవంత్ రెడ్డి కీలక ఆదేశాలు

Praja Palana : ప్రజాపాలన కార్యక్రమంపై సచివాలయంలో సీఎం రేవంత్‌ రెడ్డి అధ్యక్షతన సోమవారం సమీక్షా సమావేశం జరిగింది. ఈ సమావేశంలో మంత్రులు, అన్ని శాఖల ఉన్నతాధికారులు, ప్రజాపాలన నోడల్‌ ఆఫీసర్లు పాల్గొ్న్నారు. ఈ సమీక్షలో సీఎం రేవంత్ రెడ్డి అధికారులకు కీలక ఆదేశాలు ఇచ్చారు. ప్రజాపాలన అప్లికేషన్ల డేటా ఎంట్రీలో తప్పులు లేకుండా చూడాలని ఆదేశించారు. ఈ నెల చివరి డేటా ఎంట్రీకి పూర్తిచేస్తామని అధికారులు తెలిపారు.

కోటి దరఖాస్తులు

తెలంగాణలో ఆరు గ్యారంటీల అమలుకు ప్రభుత్వం ప్రజాపాలన పేరిట దరఖాస్తులు ఆహ్వానించిన సంగతి తెలిసిందే. డిసెంబర్ 28 నుంచి జనవరి 6 వరకు అభయ హస్తం హామీలపై దరఖాస్తులు స్వీకరించారు. ప్రజాపాలన కార్యక్రమంలో 1.05 కోట్ల దరఖాస్తులు వచ్చాయని మంత్రి పొంగులేటి శ్రీనివాస్ రెడ్డి తెలిపారు. ప్రజాపాలనపై సీఎం రేవంత్ రెడ్డి ఇవాళ సమీక్ష నిర్వహించారు. ఈ సమీక్ష అనంతరం మంత్రి పొంగులేటి మీడియాతో మాట్లాడారు.

కేబినెట్ సబ్ కమిటీ ఏర్పాటు

ఆరు గ్యారంటీల అమలుకు కేబినెట్ సబ్ కమిటీ ఏర్పాటు చేసినట్లు మంత్రి పొంగులేటి తెలిపారు. ప్రస్తుతం 30 వేల మంది ఆపరేటర్లతో ఈ అప్లికేషన్ల డేటా ఎంట్రీ జరుగుతోందన్నారు. ఆరు గ్యారంటీలను వంద రోజుల్లో అమలు చేస్తామని ఎన్నికల్లో చెప్పామన్నారు. 40 రోజుల్లో నెరవేరుస్తామని ఎక్కడా చెప్పాలేదన్నారు. ఆరు గ్యారంటీల అమలుకు సీఎం రేవంత్ రెడ్డి కేబినెట్ సబ్ కమిటీ నియమించారన్నారు. ఈ కమిటీ ఛైర్మన్ గా డిప్యూటీ సీఎం భట్టి విక్రమార్క వ్యవహరించనున్నారని తెలిపారు. సభ్యులుగా మంత్రి శ్రీధర్ బాబు, పొన్నం ప్రభాకర్, తాను ఉంటామని పొంగులేటి స్పష్టం చేశారు.