Best Web Hosting Provider In India 2024
మొదటి వర్షం అందరికీ ఇష్టమే. చాలా మంది వర్షం పడితే గెంతుతూ సంబరాలు చేసుకుంటారు. దీంతో వర్షాకాలంలో వ్యాధుల సంఖ్య కూడా పెరుగుతుంది. ముఖ్యంగా ఈ సీజన్‌లో శిశువుల ఆరోగ్యం పట్ల శ్రద్ధ వహించడం చాలా ముఖ్యం. పాఠశాలకు వెళ్లే పిల్లలను కూడా జాగ్రత్తంగా పంపాలి.
ఇప్పటికే తెలుగు రాష్ట్రాల్లో అనేక ప్రాంతాల్లో వర్షాలు కురుస్తున్నాయి. ఈసారి రుతుపవనాలు సకాలంలో వస్తాయని వాతావరణ శాఖ తెలిపింది. దీంతో ఎండలతో అలిసిపోయిన జనం కాస్త ఊరట చెందుతున్నారు. ఇప్పటికే చాలా ప్రాంతాల్లో వర్షాలు పడుతున్నాయి. మరోవైపు పాఠశాలలు మెుదలయ్యే రోజు దగ్గరకు వచ్చింది. వర్షాకాలంలో డెంగ్యూ, మలేరియా వంటి వ్యాధులు ప్రబలుతున్నాయి. ఈ సమయంలో మీరు పిల్లల ఆరోగ్యాన్ని జాగ్రత్తగా చూసుకోవడం చాలా ముఖ్యం.
ఈ సీజన్‌లో నీటి ద్వారా వచ్చే అంటువ్యాధులు పెరుగుతాయి. మీ బిడ్డ అనారోగ్యానికి గురయ్యే అవకాశం ఉంది. వర్షాకాలంలో వచ్చే వ్యాధుల నుండి బిడ్డను రక్షించుకోవడానికి అదనపు జాగ్రత్తలు తీసుకోవాలి.
రక్షణ కల్పించండి
పిల్లలు బయటికి వెళ్లేటప్పుడు, స్కూలుకు వెళ్తుంటే గొడుగులు, రెయిన్‌కోట్‌లు, రెయిన్‌బూట్‌లను ఉపయోగించండి. ఇది మీ పిల్లలను సురక్షితంగా ఉంచుతుంది. వర్షాకాలంలో రోజూ కురుస్తున్న వర్షం వల్ల చలి వాతావరణం ఏర్పడుతుంది. పిల్లలు వెచ్చగా ఉండాలంటే వీలైనంత వరకు కాటన్ దుస్తులు, జాకెట్లు ధరించండి. అలాగే శిశువు బట్టలు పూర్తిగా ఆరిపోయినప్పుడు మాత్రమే ఉపయోగించాలి. ఎందుకంటే, వర్షాకాలంలో బట్టలు తేమను పీల్చుకుంటాయి. ఇది ఫంగల్ వ్యాధులకు కారణమవుతుంది.
డైపర్లు ఎక్కువసేపు వేయకండి
వర్షాకాలంలో మీ బిడ్డ తడి డైపర్లను ఎక్కువసేపు ధరించనివ్వవద్దు. ఇతర కాలాల కంటే వర్షాకాలంలో పిల్లలు ఎక్కువగా మూత్ర విసర్జన చేస్తారు. మీరు డైపర్లను ఉపయోగిస్తుంటే, వాటిని మారుస్తూ ఉండండి. లేదంటే చర్మంపై దద్దుర్లు రావచ్చు. బట్టలు కాస్త తడిగా ఉన్నా చర్మంపై దద్దుర్లు వస్తాయి. మీ శిశువు వాడిన బట్టలు లేదా డైపర్లు తడిగా ఉంటే వెంటనే మార్చండి.
వ్యాధులు వచ్చే అవకాశం
వర్షాకాలంలో ఫ్లూ, జలుబు, తుమ్ములు, ఇతర లక్షణాలు సాధారణం. ముందుగా లక్షణాలను గుర్తించి వీలైనంత త్వరగా వైద్యులను సంప్రదించాలి. ప్రారంభ దశలో వ్యాధిని ఎదుర్కోవడానికి తగిన జాగ్రత్తలు తీసుకోండి.
దోమలు రాకుండా చేయండి
దోమ కాటు తీవ్రమైన అసౌకర్యాన్ని కలిగిస్తుంది. చర్మంలో ఎర్రటి వాపు ఉండవచ్చు. మీ బిడ్డ పడుకునే ప్రదేశంలో దోమతెరను అమర్చండి. బాగా నిద్రపోతున్నారో లేదో గమనించండి. పూర్తిగా కప్పబడిన దుస్తులను వేయండి. కిటికీలు, తలుపులు మూసివేయండి. సహజ దోమల వికర్షకం కలిగి ఉంటే దానిని ఉపయోగించవచ్చు. వర్షాకాలం మొదలైంది అంటే దోమలు పుట్టుకొస్తాయి. ఇంటి చుట్టూ ఎక్కడా నీరు నిలువకుండా చూసుకోవాలి.
రోజూ స్నానం అవసరం లేదు
వర్షాకాలంలో శిశువుకు రోజూ స్నానం చేయించాల్సిన అవసరం లేదు. ఎందుకంటే పిల్లవాడు రోజులో ఎక్కువ సమయం ఇంట్లోనే గడుపుతాడు. మీ బిడ్డకు వారానికి రెండు మూడు సార్లు స్నానం చేస్తే సరిపోతుంది. బయటికి వెళ్లి ఉంటే, గోరువెచ్చని నీటితో స్నానం చేయించండి.
వర్షంలో తడవొద్దు
వర్షాకాలంలో చాలా మందిని చిన్ననాటి జ్ఞాపకాలు వెంటాడతాయి. వర్షంలో తడుస్తూ కాగితపు పడవలు తయారు చేసి నీటిలో పడేస్తుంటారు. ఉరుములు, మెరుపులు మొదలైన సందర్భాల్లో కొందరు బయట ఉంటారు. అలాంటి సమయంలో అనారోగ్యానికి గురికావడం కూడా కాస్త ఎక్కువే. జాగ్రత్తలు తీసుకోవాలి. పైన పేర్కొన్న సూచనలను సరిగ్గా పాటించడం ద్వారా మీ పిల్లల ఆరోగ్యాన్ని జాగ్రత్తగా చూసుకోండి.
