Wayanad landslides: వయనాడ్ విషాదం: కేరళ సీఎం రిలీఫ్ ఫండ్ కు ఇలా విరాళాలు ఇవ్వండి..

Wayanad landslides: కేరళలోని వయనాడ్ జిల్లాలో కొండచరియలు విరిగిపడి 300 మందికి పైగా మరణించగా, వందలాది మంది గల్లంతయ్యారు. ఆ ప్రకృతి విపత్తు జరిగి 5 రోజులైంది. సహాయ చర్యలు కొనసాగుతున్నాయి. మరణాల సంఖ్య పెరుగుతోంది. శిధిలాల కింద ఇంకా రెండు వందల మంది ఉండొచ్చని భావిస్తున్నారు. ప్రాణాలతో బయటపడిన వారు తమ ఇళ్లను, ఆత్మీయులను కోల్పోయారు. కేంద్ర, రాష్ట్ర ప్రభుత్వాలు కలిసి సహాయక చర్యలు చేపట్టి సాధారణ పరిస్థితులు నెలకొల్పేందుకు కృషి చేస్తున్నాయి.

సీఎం రిలీఫ్ ఫండ్

వయనాడ్ (Wayanad) జిల్లాలో కొండచరియలు విరిగిపడి తీవ్రంగా నష్టపోయిన వారి కోసం విరాళాలు సేకరించడానికి కేరళ ముఖ్యమంత్రి కార్యాలయం “ముఖ్యమంత్రి విపత్తు సహాయ నిధి (Chief Minister’s Disaster Relief Fund)”ని ప్రారంభించింది. సీఎం సహాయ నిధికి బ్యాంకు ఖాతా నంబరుతో సహా ప్రజలు విరాళాలు ఇవ్వగల వివిధ మార్గాలను వివరిస్తూ ముఖ్యమంత్రి కార్యాలయం నుంచి సోషల్ మీడియాలో పోస్టులు పెడుతున్నారు.

ఈ మార్గాల ద్వారా విరాళం ఇవ్వవచ్చు..

వయనాడ్ కొండచరియలు విరిగిపడిన బాధితులకు విరాళం ఇవ్వాలనుకుంటే వివరాలు ఇలా ఉన్నాయి.

• “ఖాతా నంబర్: 67319948232
• పేరు: ముఖ్యమంత్రి విపత్తు సహాయ నిధి (Chief Minister’s Disaster Relief Fund)
• బ్యాంకు: స్టేట్ బ్యాంక్ ఆఫ్ ఇండియా
• శాఖ: సిటీ బ్రాంచ్, తిరువనంతపురం
• ఐఎఫ్ఎస్సీ SBIN0070028
• స్విఫ్ట్ కోడ్: SBININBBT08
• ఖాతా రకం: సేవింగ్స్
• పాన్: AAAGD0584M.
• keralacmdrf@sbi యూపీఐ కి ఫోన్ పే, లేదా జీ పే, లేదా మరే యూపీఐ మార్గం ద్వారా అయినా విరాళం ఇవ్వవచ్చు.

సీఎం అభ్యర్థన

వయనాడ్ లోని ముండక్కై, చూరల్మాల, మెప్పాడిలో కొండచరియలు విరిగిపడిన నేపథ్యంలో కేరళ ముఖ్యమంత్రి పినరయి విజయన్ జూలై 31న ఎక్స్ లో సహాయ నిధి గురించి పోస్ట్ చేశారు. ‘స్టాండ్ విత్ వయనాడ్’ అనే క్యాంపెయిన్ లో ముఖ్యమంత్రి సహాయ నిధికి ఎలా విరాళం ఇవ్వాలో సమాచారాన్ని పంచుకున్నారు. ‘‘విపత్కర సమయాల్లో ఒకరికొకరు సహాయం చేసుకోవడం సంఘీభావం యొక్క స్వచ్ఛమైన రూపం. ఇది ఎవరూ ఒంటరిగా ప్రతికూలతను ఎదుర్కోకూడదని ఇచ్చే వాగ్దానం’’ అని ఆయన పోస్ట్ తో పాటు రాశారు.

ఐదో రోజు కొనసాగుతున్న గాలింపు

చర్యలు శనివారం ఐదో రోజుకు చేరుకోవడంతో కేరళలోని అత్యంత ఘోరమైన ప్రకృతి వైపరీత్యాల్లో ఒకటైన వయనాడ్ కొండచరియల శిథిలాల కింద చిక్కుకున్న వారిని కనుగొనేందుకు లేదా మృతదేహాలను వెలికితీసేందుకు అత్యాధునిక సాంకేతిక పరికరాలు, కుక్కలతో కూడిన సహాయక బృందాలు తమ ప్రయత్నాలను కొనసాగించాయి.

పెరుగుతున్న మరణాల సంఖ్య

జూలై 30న వయనాడ్లోని చురల్మలై, ముండక్కైలో కొండచరియలు విరిగిపడి మరణించిన వారి సంఖ్య శుక్రవారం నాటికి 308కి చేరుకుందని కేరళ ఆరోగ్య శాఖ మంత్రి వీణా జార్జ్ తెలిపారు. వారిలో 98 మంది పురుషులు, 87 మంది మహిళలు, 30 మంది చిన్నారులు సహా 215 మృతదేహాలు, 143 శరీర భాగాలను వెలికితీశారు. ఇప్పటి వరకు 212 మృతదేహాలు, 140 శరీర భాగాలకు పోస్టుమార్టం పరీక్షలు నిర్వహించగా, 148 మృతదేహాలను బంధువులు గుర్తించారు. ప్రస్తుతం వయనాడ్, కోజికోడ్, మలప్పురం జిల్లాల్లోని వివిధ ఆసుపత్రుల్లో 82 మంది చికిత్స పొందుతున్నారు. డిజాస్టర్ జోన్ నుంచి 504 మందిని ఆస్పత్రులకు తరలించగా, ఇప్పటి వరకు 205 మంది డిశ్చార్జ్ అయ్యారు.