Bengaluru: బెంగళూరులో నిర్మాణంలో ఉన్న భవనం కూలి ముగ్గురి మృతి; శిధిలాల్లో మరికొందరు..!

Bengaluru news: బెంగళూరులోని బాబుసపాళ్య ప్రాంతంలో మంగళవారం కురిసిన భారీ వర్షాలకు నిర్మాణంలో ఉన్న భవనం కుప్పకూలిన ఘటనలో ముగ్గురు కార్మికులు మృతి చెందగా, ఆ శిధిలాల్లో పలువురు చిక్కుకున్నట్లు తెలుస్తోంది. ఈ ప్రమాదం జరిగిన తూర్పు బెంగళూరులోని బాబుసపాళ్య ప్రాంతానికి సహాయక బృందాలు చేరుకున్నాయని, శిథిలాలను తొలగించి చిక్కుకున్న వారిని బయటకు తీసేందుకు ప్రయత్నాలు జరుగుతున్నాయని బెంగళూరు పోలీసులు తెలిపారు.

సహాయ చర్యలు ముమ్మరం

రెండు అగ్నిమాపక, అత్యవసర విభాగం రెస్క్యూ వ్యాన్లను రంగంలోకి దింపినట్లు పోలీసులు తెలిపారు. ఇప్పటి వరకు ముగ్గురు కార్మికులను రక్షించారు. భవనం లోపల 17 మంది చిక్కుకున్నట్లు అనుమానిస్తున్నామని, ఇతర ఏజెన్సీల సహాయంతో సహాయక చర్యలు చేపడుతున్నామని సీనియర్ పోలీసు అధికారి ఒకరు తెలిపారు. గత మూడు రోజులుగా ఎడతెరిపి లేకుండా కురుస్తున్న వర్షాలతో (Bengaluru rains) నగరంలో పలు నివాస ప్రాంతాలు, రహదారులు మోకాలి లోతు నీటిలో చిక్కుకున్నాయి. జాతీయ విపత్తు ప్రతిస్పందన దళం (NDRF), రాష్ట్ర విపత్తు ప్రతిస్పందన దళానికి చెందిన ఐదు బృందాలను వరదల్లో చిక్కుకున్న ప్రజలను సురక్షిత ప్రాంతాలకు తరలించారు. బెంగళూరు (Bengaluru) లోని యలహంక పరిసర ప్రాంతాల్లో పలు ప్రాంతాలు జలమయం కావడంతో ఉత్తర బెంగళూరు అతలాకుతలమైంది.

ఆరుగంటల్లో 157 ఎంఎం వర్షపాతం

సోమవారం అర్ధరాత్రి నుంచి మంగళవారం ఉదయం 6 గంటల వరకు కేవలం ఆరు గంటల్లో యలహంకలో 157 మిల్లీమీటర్ల వర్షపాతం నమోదైందని, బెంగళూరు లోని యలహంకలోని కేంద్రీయ విహార్ నడుము లోతు నీటితో నదిని తలపించిందని బృహత్ బెంగళూరు మహానగర పాలికె (BBMP) తెలిపింది. లోతట్టు ప్రాంతాలు, చెరువుల సమీపంలోని పలు ఇళ్లు నీట మునిగాయి. ఇళ్లల్లోని గృహోపకరణాలు, వాహనాలు, ఎలక్ట్రానిక్ వస్తువులు ధ్వంసమయ్యాయి. పలు ప్రధాన రహదారులపై తీవ్ర ట్రాఫిక్ జామ్ అయింది. ఇదిలావుండగా, బెంగళూరు అభివృద్ధి శాఖను నిర్వహిస్తున్న ఉప ముఖ్యమంత్రి డీకే శివకుమార్ ఈ రోజు మాట్లాడుతూ, “దుబాయ్ మరియు ఢిల్లీలో ఏమి జరుగుతుందో మీరు మీడియాలో గమనించి ఉండవచ్చు. ఢిల్లీలో కాలుష్యం, కరవు పీడిత ప్రాంతమైన దుబాయ్ లో వర్షాలు కురుస్తున్నాయి. దేశంలోని చాలా ప్రాంతాల్లో ఇదే పరిస్థితి ఉంది. మనం మేనేజ్ చేస్తున్నాం. “మనం ప్రకృతిని ఆపలేము, కానీ మేము ఉన్నాము. మొత్తం టీమ్ నుంచి సమాచారం సేకరిస్తున్నాను. తన పర్యటన ముఖ్యం కాదని, తాను వెళ్తే మీడియా దృష్టిని ఆకర్షిస్తానని, అయితే పబ్లిసిటీ పొందడం కాదని, వర్ష బాధితులకు ఉపశమనం కలిగించడమే తన లక్ష్యమని ఆయన అన్నారు.