Best Web Hosting Provider In India 2024
సాయంత్రం పూట తినేందుకు చేయదగ్గ సింపుల్ చిరుతిండి ఉప్పుండలు. వీటి కోసం కొత్త పదార్థాలేవీ అక్కర్లేదు. మీకు అందుబాటులో ఉండే వాటితోనే రెడీ అయిపోతాయి. తినేందుకు చాలా క్రిస్పీగా ఉప్పగా ఉండే ఈ ఉప్పుండల రెసిపీ ఎలాగో చూసేయండి. పిల్లలకు మంచి స్నాక్ ఇది.
ఉప్పుండల తయారీకి కావాల్సిన పదార్థాలు:
1 కప్పు బియ్యం పిండి
1 కప్పు మినపప్పు
అర చెంచా జీలకర్ర
పావు టీస్పూన్ ఇంగువ
2 చెంచాల నువ్వులు
అర చెంచాడు ఉప్పు
2 చెంచాల నెయ్యి లేదా బటర్
3 చెంచాల శనగపప్పు
డీప్ ఫ్రైకి సరిపడా నూనె
ఉప్పుండల తయారీ విధానం:
- ముందుగా ఉప్పుండల కోసం మినప్పప్పును సన్నం మంట మీద వాసన వచ్చేదాకా వేయించాలి.
- ఈ పప్పు చల్లారాక దాన్ని మిక్సీలో వేసుకుని వీలైనంత సన్నగా పిండి పట్టుకోవాలి.
- ఇప్పుడు కడాయిలో బియ్యం పిండి కూడా వేసుకుని సన్నం మంట మీద రెండు నిమిషాలు వేయించాలి. అస్సలు పిండి మాడిపోకూడదని గుర్తుంచుకోండి.
- ఈ పిండిని కూడా మినప్పప్పు పొడి ఉన్న పల్లెంలోకి తీసుకోండి. ఈ రెండు పిండ్లు కలిపి ఒకేసారి జల్లెడ పట్టండి.
- ఇప్పుడు శనగపప్పును కూడా పావుగంటసేపు నీళ్లలో నానబెట్టుకోవాలి.
- ఇప్పుడు ఒక వెడల్పాటి బౌల్‌లో బియ్యం పిండి, మినప్పప్పు పిండి, జీలకర్ర, ఇంగువ, నువ్వులు, ఉప్పు, నెయ్యి వేసుకుని కలుపుకోండి. అందులోనే నానబెట్టుకున్న శనగపప్పును కూడా వేసి పిండి కలుపుకోండి.
- కొద్దికొద్దిగా నీళ్లు పోసుకుని పిండిని ముద్దలాగా కలుపుకోండి. పాత్ర అంచులకు, చేతికి పిండి అంటుకోకుండా ఉండాలి.
- ఇప్పుడు చేయికి కాస్త నూనె రాసుకుని కలుపుకున్న పిండిని చిన్న చిన్న ఉండల్లాగా చేసుకోవాలి. వాటిని పావుగంట సేపు పక్కన పెట్టుకోండి.
- కడాయి పెట్టుకుని అందులో డీప్ ఫ్రైకి సరిపడా నూనె వేసుకోండి. నూనె వేడెక్కాక ముందుగా రెడీ చేసి పెట్టుకన్న ఉండల్ని వేసి వేయించుకోండి.
- కాసేపటికే ముదురు బంగారు వర్ణంలోకి మారి క్రిస్పీగా తయారవుతాయి. వాటిని బయటకు తీసుకుని చల్లారాక ఒక డబ్బాలో వేసుకుని నిల్వ చేసుకోండి. ఉప్పుండలు రెడీ అయినట్లే.
