Best Web Hosting Provider In India 2024
కాలం మారుతున్న సమయంలో.. ముఖ్యంగా శీతాకాలం వచ్చేటప్పుడు ఇన్ఫెక్షన్లు, సీజనల్ వ్యాధులు సోకే ప్రమాదం ఎక్కువగా ఉంటుంది. చలికాలం ఇప్పుడిప్పుడే మొదలవుతోంది. ఈ కాలంలో వాతావరణం చల్లగా ఉండే కారణంగా అనారోగ్యం బారిన పడే అవకాశాలు పెరుగుతాయి. అందుకే రోగ నిరోధక శక్తిని పెంచుకోవాలి. కొన్ని రకాల విటమిన్లు శరీరంలో రోగ నిరోధక శక్తి అధికంగా చేస్తాయి. అందుకు కీలకమైన 6 విటమిన్లు ఏవో ఇక్కడ చూడండి.
విటమిన్-సీ
రోగ నిరోధక శక్తి (ఇమ్యూనిటీ)ని విటమిన్-సీ బలోపేతం చేస్తుంది. ఇమ్యూనిటీకి ముఖ్యమైన మైక్రోన్యూట్రియంట్‍గా ఈ విటమిన్‍ను భావిస్తారు. తెల్లరక్తకణాల ఉత్పత్తి, పనితీరులో ముఖ్యమైన యాంటీఆక్సిడెంట్‍గా విటమిన్ సీ ఉంటుంది. రోగాలు, ఇన్ఫెక్షన్ల ప్రమాదాన్ని ఈ విటమిన్ తగ్గించగలదు. అందుకే శీతాకాలంలో విటమిన్ సీ ఎక్కువగా ఉండే నారింజ, నిమ్మ లాంటి సిట్రస్ పండ్లు, బెర్రీలు, బ్రకోలీ, బంగాళదుంప, టమాటాలు లాంటివి తీసుకోవాలి.
విటమిన్- ఈ
విటమిన్-ఈ కూడా శక్తివంతమైన యాంటీఆక్సిడెంట్. రోగ నిరధక కణాలను కాపాడడంలో, ఫ్రీ రాడికల్స్‌ను నియంత్రించడంలో ఈ విటమిన్ కీలకపాత్ర పోషిస్తుంది. ఇమ్యూన్ కణాల పనితీరు మెరుగుపరిచి రోగ నిరోధక శక్తిని విటమిన్ ఈ పెంచుతుంది. సీజనల్ వ్యాధుల ప్రమాదాన్ని తగ్గిస్తుంది. ఆకుకూరలు, నట్స్, సీడ్స్, కోడిగుడ్లు, గుమ్మడి, చేపలు లాంటి వాటిలో విటమిన్-ఈ పుష్కలంగా ఉంటుంది.
విటమిన్-డీ
విటమిన్-డీ కూడా రోగ నిరోధక శక్తిని శరీరంలో పెంచగలదు. తెల్ల రక్త కణాల రకాలైన మోనోసైటిస్, మాక్రోఫేజెస్‍ల సామర్థ్యాన్ని, వ్యాధులతో పోరాడే శక్తిని ఈ విటమిన్ అధికం చేస్తుంది. జలుబు, దగ్గు లాంటి ఇన్ఫెక్షన్లు వచ్చే ప్రమాదాన్ని తగ్గించగలదు. పుట్టగొడుగులు, ఫ్యాటీ చేపలు, కోడిగుడ్డు సొన, సోయా మిల్క్ లాంటి వాటిలో విటమిన్ డీ పుష్కలంగా ఉంటుంది.
విటమిన్-బీ6
శరీరంలో రోగనిరోధక శక్తి కణాలను పెంచడంలో విటమిన్ బీ6 కీలకపాత్ర పోషిస్తుంది. ఇమ్యూనిటీని మెరుగుపరుస్తుంది. అప్పటికే ఏదైనా సీజనల్ వ్యాధి బారిన పడినా విటమిన్ బీ6 పుష్కలంగా ఉండే ఆహారాలు తీసుకుంటే త్వరగా కోలుకునేందుకు సహకరిస్తుంది. యాంటీబాడీల ఉత్పత్తిని కూడా ఈ విటమిన్ పెంచగలదు. కోడిగుడ్లు, బీన్స్, కాయధాన్యాలు, నట్స్, సోయా ఉత్పత్తులు, లీన్ మీట్స్, సాల్మోన్ చేపల్లో విటమిన్ బీ6 అధికంగా ఉంటుంది.
విటమిన్-ఏ
విటమిన్ ఏ కూడా శరీరంలో రోగ నిరోధక శక్తికి మేలు చేస్తుంది. శ్వాసకోశ ఇన్ఫెక్షన్లు, జీర్ణ సమస్యలు రాకుండా ఈ విటమిన్ రక్షణ కల్పించగలదు. తెల్ల రక్త కణాల ఉత్పత్తిలోనూ ముఖ్యమైన పాత్ర పోషిస్తుంది. ఇన్ఫెక్షన్లతో పోరాడేందుకు ఇన్యూనిటీ వ్యవస్థకు ఉపకరిస్తుంది. క్యారెట్లు, చిలకడదుంపలు, పాలకూర, కేల్, పాలు, చీజ్, బీఫ్ లివర్, గుమ్మడి, క్యాప్సికం లాంటి వాటిలో విటమిన్ ఏ ఎక్కువగా ఉంటుంది.
విటమిన్-బీ12
రోగ నిరోధక శక్తి పనితీరును విటమిన్ బీ-12 మెరుగుపరుస్తుంది. తెల్లరక్తకాణాల ఉత్పత్తికి కూడా తోడ్పడుతుంది. నాడీ వ్యవస్థకు ఈ విటమిన్ ఎక్కువగా మేలు చేస్తుంది. వైరల్ ఇన్ఫెక్షన్లపై పోరాడేందుకు సహకరిస్తుంది. సాల్మోన్, టునా చేపలు, చికెన్, పాలు, కోడిగుడ్లు, యగర్డ్, పాలల్లో విటమిన్ బీ12 పుష్కలంగా దక్కుతుంది.
