Nikhil Kamath : ‘బెంగళూరు భవిష్యత్తును మార్చేద్దాం’- ప్రజలకు నిఖిల్​ కామత్​ ఛాలెంజ్​..

జెరోధా సహ వ్యవస్థాపకుడు నిఖిల్ కామత్.. “నమ్మ బెంగళూరు ఛాలెంజ్-2024”ను ప్రకటించారు. టెక్ క్యాపిటల్ భవిష్యత్తు కోసం పనగరంలోని ప్రాబ్లమ్​ సాల్వర్స్​ ఈ ఛాలెంజ్​ని చేపట్టాలని పిలుపునిచ్చారు. బెంగళూరు భవిష్యత్తును అన్ని విధాలుగా తీర్చిదిద్దే ఆలోచనలతో ముందుకు వచ్చే ఛేంజ్ మేకర్లకు రూ.50 లక్షల గ్రాంట్లు ఇస్తున్నట్టు ప్రకటించారు.

“బెంగళూరు నాకు అన్నీఇచ్చింది. ఎన్ని సవాళ్లు ఉన్న ఈ నగరం ఒక ప్రత్యేకమైన స్థితిస్థాపకతను కలిగి ఉంది. బెంగళూరువాసులు, ముఖ్యంగా కేఫ్​లు, అర్థరాత్రి వర్క్ స్పేస్​లలో మేధోమథనం చేసేవారు దేనికైనా పరిష్కారాలను కనుగొనగలరని నేను నమ్ముతున్నాను. బెంగళూరు భవిష్యత్తును తీర్చిదిద్దేందుకు మరింత మంది ఛేంజ్ మేకర్లు అవసరం,” అని ఎక్స్​లో చేసిన పోస్ట్​లో నిఖిల్​ కామత్​ రాసుకొచ్చారు. ఈ నేపథ్యంలో నమ్మ బెంగళూరు ఛాలెంజ్​ని ప్రకటించారు.

నమ్మ బెంగళూరు ఛాలెంజ్ అంటే ఏటి?

నమ్మ బెంగళూరు ఛాలెంజ్ నగరంలోని ప్రజలను ఆచరణాత్మక, సృజనాత్మక ఆలోచనలతో ముందుకు రావడానికి ప్రోత్సహిస్తుంది! నగరంలో జీవితాన్ని మెరుగుపరచడానికి ఇది సహాయపడుతుందని కామత్​ భావిస్తున్నారు. అయితే, సమస్యల పరిష్కారానికి ఆలోచనలు ఇచ్చే వారు, వాటిని పాటించాలి కూడా! ఆ ఆలోచనలు ఆచరణాత్మకంగా ఉండాలి. ఈ ఛాలెంజ్ కోసం మొత్తం రూ.50 లక్షల గ్రాంటును కేటాయించి, షార్ట్ లిస్ట్ చేసిన ఐడియాలకు వాటిని అమలు చేస్తామని నిఖిల్​ కామత్​ అన్నారు.

ఎలా అప్లై చేసుకోవాలి?

ప్రభావవంతమైన ఆలోచనలు ఉన్నవారు అధికారిక వెబ్సైట్ (https://www.unboxingblr.com/namma-bengaluru-challenge) ద్వారా సవాలును స్వీకరించడానికి దరఖాస్తు చేసుకోవాలి. ప్రాజెక్టు గురించి, అది పరిష్కరించే సమస్య గురించి, ప్రతిపాదిత పరిష్కారం గురించి సమగ్ర సమాచారాన్ని అందించాలి. ప్రతిపాదిత పరిష్కారం బెంగళూరుకు ఎందుకు ముఖ్యమో వివరిస్తూ 5 నిమిషాలలోపు చిన్న ఇంట్రో వీడియోను సమర్పించాలి.

ప్రక్రియ..

సెలక్షన్​ ప్యానెల్ మీ ఆలోచనలను షార్ట్ లిస్ట్ చేస్తుంది. అభ్యర్థులను సెలక్షన్ ప్యానెల్​తో వర్చువల్ ఇంటర్వ్యూకు పిలుస్తారు. అభ్యర్థులతో ప్రతిపాదిత ఆలోచనలను ప్యానెల్ మరింత లోతుగా తవ్వనుంది. సెలక్ట్​ అయిన అభ్యర్థులు గ్రాంట్లు అందుకుంటారు. బెంగళూరును నివాసితులకు మెరుగైన ప్రదేశంగా మార్చడానికి మిషన్​ని ప్రారంభించమని అడుగుతారు.

మరోవైపు బీఎల్​ఆర్​ హుబ్బాలో భాగంగా డిసెంబర్​ 13న బెంగళూరు ఇంటర్నేషనల్​ సెంటర్​లో ప్రత్యేక ఈవెంట్​ జరగనుంది. దీని పేరు అన్​బాక్సింగ్​ బీఎల్​ఆర్​. నమ్మ బెంగళూరు ఛాలెంజ్​లో ఎంపికైన అభ్యర్థులు తమ ఆలోచనలను నిపుణులైన జ్యూరీకి సమర్పించాల్సి ఉంటుంది.

బెంగళూరు మహా నగరంలో ఉన్న అతిపెద్ద సమస్య ట్రాఫిక్​! బెంగళూరు ట్రాఫిక్​ గురించి దేశవ్యాప్తంగా మాట్లాడుకుంటారు. అదే సమయంలో నగరంలో నీటి కొరత కూడా అధికంగానే ఉంది. జెరోధా కో-ఫౌండర్​ నిఖిల్​ కామత్​ చేసిన ప్రకటనని అందరు అభినందిస్తున్నారు. మరి దీని ద్వారా ఎలాంటి ఫలితాలు వస్తాయో చూడాలి.