భారతీయ వంటగదిలో కచ్చితంగా కనిపించే మసాలాాల్లో పసుపు ప్రధానమైనది. కూర నుంచి బిర్యానీ వరకు అన్నింట్లో చిటికెడు పసుపు పడాల్సిందే. దాని రంగు వంటకాలకు మంచి రూపాన్ని ఇస్తుంది. ఆయుర్వేదంలో పసుపును స్వచ్ఛమైన బంగారంలా చూస్తారు. ఇందులో ఉండే యాంటీ ఇన్ఫ్లమేటరీ, యాంటీ బ్యాక్టీరియల్, యాంటీ ఫంగల్, యాంటీ ఆక్సిడెంట్స్ అనేక వ్యాధులు, ఇన్ఫెక్షన్లు రాకుండా అడ్డుకుంటాయి. అందుకే కచ్చితంగా వంటకాల్లో పసుపును ఎక్కువగా ఉపయోగిస్తుంటారు. కానీ పసుపు వినియోగం పురుషులకు చాలా ప్రయోజనకరంగా ఉంటుంది. పసుపును తీసుకోవడం ద్వారా పురుషులకు సంబంధించిన అనేక సమస్యలను అధిగమించవచ్చు.

పురుషులకు పసుపు చేసే మేలు

వయసు పెరగడం, ఆఫీసులో అలసట, ఒత్తిడి కారణంగా పురుషుల్లో లిబిడో తగ్గే అవకాశం ఉంటుంది. ఇది వారి లైంగిక జీవితంపై ప్రతికూల ప్రభావాన్ని చూపుతుంది. అటువంటి పరిస్థితిలో, పసుపు తీసుకోవడం చాలా ప్రయోజనకరంగా ఉంటుంది. పసుపులో ఉండే మూలకాలు పురుషుల మానసిక ఆరోగ్యంపై మంచి ప్రభావాన్ని చూపుతాయని ఆరోగ్య నిపుణులు అంటున్నారు. దీన్ని రోజూ తీసుకోవడం వల్ల పురుషుల్లో లిబిడో పెరుగుతుంది. అదే సమయంలో పురుషుల లైంగిక పనితీరు స్థాయి కూడా పెరుగుతుంది.

టెస్టోస్టెరాన్ అనేది పురుష సెక్స్ హార్మోన్. ఇది వారి లైంగిక జీవితంపై గొప్ప ప్రభావాన్ని చూపుతుంది. ఇది వారి మానసిక స్థితి, వారి పనితీరులో ఎక్కువ పాత్ర పోషిస్తుంది. అంతేకాకుండా వారి శారీరక ఎదుగుదల కూడా ఈ హార్మోన్ పైనే ఆధారపడి ఉంటుంది. అయితే, తప్పుడు ఆహారం, జీవనశైలి కారణంగా, ఈ రోజుల్లో పురుషులలో టెస్టోస్టెరాన్ స్థాయిలు చాలా వేగంగా తగ్గుతున్నాయి. పసుపు ఆ స్థాయిలు పెంచడంలో సహాయపడుతుంది. ఆరోగ్య నిపుణుల అభిప్రాయం ప్రకారం, పసుపు వినియోగం రక్త ప్రవాహాన్ని మెరుగుపరుస్తుంది. టెస్టోస్టెరాన్ హార్మోన్ను పెంచడానికి సహాయపడుతుంది.

రోజులో మానసిక, శారీరక అలసట తర్వాత శరీరం అలసిపోతుంది. వయసు పెరుగుతున్న కొద్దీ బలహీనత, అలసట సమస్య మరింత పెరుగుతుంది. అటువంటి పరిస్థితిలో, పురుషులు తమ రోజువారీ ఆహారంలో పసుపును తప్పనిసరిగా చేర్చాలి. ఇది కండరాల దృఢత్వం, నొప్పి నుండి ఉపశమనం పొందటానికి పనిచేస్తుంది. పసుపు రక్త ప్రసరణను వేగంగా మెరుగుపరుస్తుంది. ఇది శరీరానికి పుష్కలంగా శక్తిని ఇస్తుంది. అలసట, బలహీనత వంటి సమస్యలను తగ్గిస్తుంది.

వీర్య కణాల నాణ్యత పెరుగుతుంది

పసుపులో ఉండే గుణాలు పురుషుల వీర్యకణాల నాణ్యతను మెరుగుపరుస్తాయని నమ్ముతారు. పసుపు తీసుకోవడం వల్ల వీర్యకణాలు పలుచగా కాకుండా ఉంటాయి. వీర్యం సన్నబడటంతో ఇబ్బంది పడే వారు పసుపు, తేనె తీసుకోవాలి. ఆయుర్వేదం ప్రకారం రోజూ ఉదయాన్నే పసుపు, తేనె మిశ్రమాన్ని సమాన మోతాదులో తీసుకోవడం వల్ల లైంగిక శక్తి కూడా పెరుగుతుంది.

పురుషులకు పసుపు వల్ల కలిగే ప్రయోజనాలు ఎంతో ఎక్కువ. ఇప్పుడు ప్రతిరోజూ ఎలా ఉపయోగించాలి అనే ప్రశ్న అందరికీ వస్తుంది. ఇందుకోసం రోజూ కూరగాయలో పసుపు కలుపుకుని తినవచ్చు. రాత్రి పడుకునే ముందు పసుపు పాలు తాగడం కూడా చాలా ప్రయోజనకరంగా ఉంటుంది. పసుపులో కర్కుమిన్ ఉంటుంది. పసుపుతో కొద్దిగా నల్ల మిరియాల పొడి తీసుకోవడం వల్ల చాలా ప్రయోజనం ఉంటుంది.

(గమనిక: అధ్యయనాలు, హెల్త్ జర్నల్స్ నుంచి సేకరించిన సమాచారాన్ని మీ కోసం ఇక్కడ అందిస్తున్నాం. ఇది కేవలం సమాచారం మాత్రమే. ఇది వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి సందేహాలుంటే వెంటనే వైద్యులను సంప్రదించండి.)