ఇది నిరుద్యోగుల పాలిట శాడిస్ట్‌ ప్రభుత్వం

తాడేపల్లి: డీఎస్సీ పేరుతో 1.87 లక్షల నిరుద్యోగులను ఈ ప్రభుత్వం దగా చేసిందని, రోజుకో ప్రకటన పేరుతో వాయిదాలు వేస్తున్న ఈ ప్రభుత్వం నిరుద్యోగుల పాలిట శాడిస్ట్‌ ప్రభుత్వమని వైయ‌స్ఆర్‌సీపీ విద్యార్థి విభాగం వర్కింగ్ ప్రెసిడెంట్‌ ఎ.రవిచంద్ర ఆగ్రహం వ్యక్తం చేశారు. తాడేపల్లి పార్టీ కేంద్ర కార్యాలయంలో గురువారం ర‌విచంద్ర మీడియాతో మాట్లాడారు. నిరుద్యోగులపై ఈ ప్రభుత్వానికి ఏ మాత్రం చిత్తశుద్ధి లేదని ఆక్షేపించారు. టీవీలు, పేపర్లకు లీకులిస్తూ టీచర్‌ ఉద్యోగాల భర్తీని నిరవధికంగా వాయిదా వేసే కుట్ర జరుగుతోందని ఆయన అనుమానం వ్యక్తం చేశారు. 

రవిచంద్ర ఇంకా ఏమ‌న్నారంటే..

– చెప్పే మాటలకు చేసే పనులకు సంబంధం లేకుండా కూటమి ప్రభుత్వం వ్యవహరిస్తోంది. డీఎస్సీ ద్వారా టీచర్‌ పోస్టులు భర్తీ చేస్తామంటూ చంద్రబాబు పెట్టిన మొదటి సంతకానికే దిక్కు లేకుండా పోయింది. 
– అధికారంలోకి రాగానే 25వేల టీచర్‌ పోస్టులు భర్తీ చేస్తామని ఎన్నికల్లో హామీ ఇచ్చిన చంద్రబాబు.. ఊరూరా తిరిగి ప్రచారం చేశాడు. అధికారం చేపట్టాక మెగా డీఎస్సీ పేరుతో 16,347 పోస్టులు మాత్రమే ప్రకటించారు.
– టీచర్‌ ఉద్యోగాలన్నీ భర్తీ చేస్తామంటూ జూన్‌ 13న మొదటి సంతకం చేసిన చంద్రబాబు.. దాదాపు 7 నెలలు గడుస్తున్నా ఇప్పటికీ డీఎస్సీ నోటిఫికేషన్‌ తేదీలు ప్రకటించకుండా కాలయాపన చేస్తున్నారు.  
– గత ప్రభుత్వంలో 6100 పోస్టుల భర్తీకి నోటిఫికేషన్‌ విడుదలై టెట్‌ రాసి, క్వాలిఫై అయిన అభ్యర్థులు ఎదురు చూస్తుంటే అధికారంలోకి వచ్చిన చంద్రబాబు, ఆ అర్హతను పరిగణించకుండా, ఆ టెట్‌ రద్దు చేసి
మెగా డీఎస్సీ పేరుతో మరోసారి టెట్‌ పరీక్ష నిర్వహించాడు.
– గత సెప్టెంబరు చివరి నాటికి డీఎస్సీ పూర్తి చేస్తామని చంద్రబాబు హామీ ఇచ్చారు. కానీ, ఆ హామీ కూడా నీటిమూటగా మారింది. 
– మొన్నటికి మొన్న అభ్యర్థుల విజ్ఞప్తి మేరకు 3 నెలలు సమయం ఇస్తున్నామన్న ప్రభుత్వం నవంబరు 6న నోటిఫికేషన్‌ ఇస్తున్నామని చివరి వరకు నమ్మించి మళ్లీ వాయిదా వేసింది. మరోసారి ఎస్సీ వర్గీకరణ పేరుతో వాయిదా వేస్తూ నిరుద్యోగుల జీవితాలతో చెలగాటం ఆడుతున్నారు. 
– తాజాగా జిల్లాలవారీగా ఖాళీల వివరాలు పంపాలంటూ, విద్యా శాఖను ఆదేశించి, మరోసారి మోసం చేసేందుకు సిద్దమయ్యారు.
– జిల్లాల్లో ఖాళీ పోస్టులపూ ప్రభుత్వానికి వగాహన లేకుండానే, 16వేల పోస్టులను భర్తీ  చేస్తామని ఈ ప్రభుత్వం ప్రకటించిందా? ఈ తతంగమంతా చూస్తుంటే డీఎస్సీ పేరుతో నిరుద్యోగులను దగా చేస్తున్నట్టు స్పష్టంగా అర్థమవుతుంది. 
– టెట్‌ అర్హత సాధించిన 1.87 లక్షల మంది నిరుద్యోగులు డీఎస్సీ నోటిఫికేషన్‌ కోసం ఎదురు చూస్తున్నారు. ఒక్కో పోస్టుకు 11,439 మంది పోటీ పడుతున్నారు.  
– బీఈడీ, డీఈడీ పూర్తి చేసిన అభ్యర్థులంతా తాము చేస్తున్న ప్రైవేటు ఉద్యోగాలు వదిలేసి, డీఎస్సీ నోటిఫికేషన్‌ వస్తుందనే ఆశతో, వేలకు వేలు ఖర్చు చేసి, భారమైనా సరే కోచింగ్‌ తీసుకుంటున్నారు.
– సీఎం చంద్రబాబు నిర్వహించాలని కానీ, నిరుద్యోగులకు ఉద్యోగాలు ఇవ్వాలని కానీ ఆలోచనే లేదు. ఇది నిరుద్యోగుల దగా ప్రభుత్వం. 
– కానీ ఈ ప్రభుత్వానికి సిగ్గులేకుండా మాది మంచి ప్రభుత్వం అని బాకాలు ఊదుకుంటూ వంద రోజుల్లో పూర్తి చేసిన హామీల్లో డీఎస్సీ ద్వారా 13,347 పోస్టులు భర్తీ చేశామని ప్రకటించుకోవడం విడ్డూరం.
– విద్యా శాఖ మంత్రిగా నారా లోకేశ్‌ ఘోరంగా విఫలమయ్యారు. డీఎస్సీ పరీక్ష నిర్వహణలోనే కాకుండా ఎస్‌ఏ.1 పరీక్షలు నిర్వహణలో కూడా వైఫల్యం చెందారు.  – పత్రికలు, టీవీలకు లీకులిచ్చి నిరుద్యోగులను మోసం చేయాలన్న ఆలోచన పక్క పెట్టి, ఇప్పటికైనా ఈ ప్రభుత్వం హామీ నిలబెట్టుకోవాలి. టీచర్‌ ఉద్యోగాలు భర్తీ చేయాలి.
– లేని పక్షంలో నిరుద్యోగుల పక్షాన పోరాడతామని రవిచంద్ర వెల్లడించారు.