Crime Thriller OTT: తెలుగు క్రైమ్ థ్రిల్ల‌ర్ మూవీ హైడ్ అండ్ సీక్ థియేట‌ర్ల‌లో రిలీజైన మూడున్న‌ర నెల‌ల త‌ర్వాత ఓటీటీలోకి వ‌స్తోంది. ఈ మూవీలో విశ్వాంత్‌, రియాస‌చ్‌దేవ్‌, శిల్పా మంజునాథ్ హీరోహీరోయిన్లుగా న‌టించారు. బ‌సిరెడ్డి రానా ద‌ర్శ‌క‌త్వం వ‌హించారు. గ‌త ఏడాది సెప్టెంబ‌ర్‌లో ఈ మూవీ థియేట‌ర్ల‌లో రిలీజైంది.

ఆహా ఓటీటీలో…

హైడ్ అండ్ సీక్ మూవీ ఈ వార‌మే ఓటీటీలోకి వ‌స్తోంది. జ‌న‌వ‌రి 10 నుంచి ఆహా ఓటీటీలో ఈ క్రైమ్ థ్రిల్ల‌ర్ మూవీ స్ట్రీమింగ్ కాబోతోంది. ఈ విష‌యాన్ని ఆహా ఓటీటీ అఫీషియ‌ల్‌గాప్ర‌క‌టించింది. ఓ పోస్ట‌ర్‌ను రిలీజ్ చేసింది.ఈ పోస్ట‌ర్‌లో ముఖానికి ముసుగు ధ‌రించి చేతిలో ఆయుధం ప‌ట్టుకున్న ఓ వ్య‌క్తి క‌నిపిస్తోన్నాడు. అత‌డి వెనుకే కాగ‌డాలు, లైట్లు ప‌ట్టుకొని చాలా మంది నిల్చొని క‌నిపిస్తోన్నారు.

ఆన్‌లైన్స్ గేమ్స్‌కు బానిస‌లుగా మారితే…

ఆన్‌లైన్ గేమ్స్‌కు బానిస‌లుగా మారుతోన్న యువ‌త త‌మ జీవితాల్ని ఎలా నాశ‌నం చేసుకున్నార‌నే కాన్సెప్ట్‌తో ద‌ర్శ‌కుడు హైడ్ ఆండ్ సీక్ సినిమాను తెర‌కెక్కించాడు.

క్రైమ్ థ్రిల్ల‌ర్ ఎలిమెంట్స్‌కు మైథాల‌జీ అంశాల‌ను మిక్స్ చేస్తూ రెగ్యుల‌ర్ క‌మ‌ర్షియ‌ల్ మూవీస్‌కు భిన్నంగా ద‌ర్శ‌కుడు ఈ మూవీని చేయాల‌ని ప్ర‌య‌త్నించాడు. కాన్సెప్ట్ బాగున్నా స్క్రీన్‌ప్లేలో ఉత్కంఠ లోపించ‌డం, అన‌వ‌స‌ర‌పు స‌న్నివేశాల‌తో క‌థ‌ను సాగ‌తీడ‌యం సినిమాకు మైన‌స్‌గా మారింది.

మ‌ర్డ‌ర్ మిస్ట‌రీ…

శివ (విశ్వాంత్‌) తండ్రితో పాటు అత‌డి బావ ఆర్మీలో ప‌నిచేస్తారు. దేశం కోసం ప్రాణాలు అర్పిస్తారు. వారి బాట‌లోనే మెడిసిన్ పూర్తిచేసి ఆర్మీలో డాక్ట‌ర్‌గా జాయిన్ కావాల‌ని క‌ల‌లు కంటుంటాడు. త‌న‌తో పాటు క‌లిసి చ‌దువుకునే వ‌ర్ష (రియా స‌చ్‌దేవ్‌)ను ప్రేమిస్తుంటాడు. శివ స్నేహితుడు చందుతో పాటు ఇంటిప‌క్క‌నే ఉండే ఓ డెలివ‌రీ బాయ్ హ‌త్య‌ల‌కు గుర‌వుతారు. అవి సూసైడ్స్‌గా తేల్చిన పోలీసులు కేసును క్లోజ్ చేస్తారు.

ఆత్మ‌హ‌త్య‌లు కాద‌ని..హ‌త్య‌లు అంటూ అజ్ఞాత‌వ్య‌క్తి పేరుతో శివ పోలీసుల‌కు లెట‌ర్స్ రాస్తాడు. ఈ లెట‌ర్స్ కార‌ణంగా ఈ రెండు హ‌త్య‌ల్లో ప్ర‌ధాన అనుమానితుడిగా శివ‌నే మారుతాడు. పోలీస్ ఆఫీస‌ర్ వైష్ణ‌వి (శిల్పా మంజునాథ్‌) శివ కోసం వెత‌క‌డం మొద‌లుపెడుతుంది?

ఈ మ‌ర్డ‌ర్స్ కేసు నుంచి శివ ఎలా బ‌య‌ట‌ప‌డ్డాడు? అస‌లు ఈ హ‌త్య‌లు చేసింది ఎవ‌రు? నిజ‌మైన హంత‌కుడిని శివ ఎలా క‌నిపెట్టాడు అన్న‌దే హైడ్ అండ్ సీక్ మూవీ క‌థ‌.

కేరింత‌తో ఎంట్రీ…

హైడ్ అండ్ సీక్ మూవీకి లిజో కే జోష్ మ్యూజిక్ అందించాడు. తేజ‌స్వి మ‌దివాడ‌, ద‌యానంద్ రెడ్డి కీల‌క పాత్ర‌ల్లో క‌నిపించారు. కేరింత మూవీతో హీరోగా టాలీవుడ్‌లోకి అడుగుపెట్టాడు విశ్వాంత్‌. మ‌న‌మంతా, తోలు బొమ్మ‌లాట‌, క్రేజీ క్రేజీ ఫీలింగ్‌, ఓ పిట్ట‌క‌థ‌తో పాటు తెలుగులో హీరోగా ప‌దికిపైగా సినిమాలు చేశాడు. సంక్రాంతికి విడుద‌ల‌వుతోన్న రామ్ చ‌ర‌ణ్ గేమ్ ఛేంజ‌ర్‌లో విశ్వాంత్ ఓ కీల‌క పాత్ర‌లో క‌నిపించ‌బోతున్నాడు.