బాలీవుడ్ స్టార్ అభిషేక్ బచ్చన్ ప్రధాన పాత్రలో ‘ఐ వాంట్ టు టాక్’ చిత్రం రూపొందింది. ఈ చిత్రంలో క్యాన్సర్ వ్యాధితో పోరాడుతున్న వ్యక్తి పాత్రను ఆయన పోషించారు. ఈ మూవీకి సూజిత్ సిర్సార్ దర్శకత్వం వహించారు. ఈ సినిమా గతేడాది నవంబర్ 22వ తేదీన థియేటర్లలో రిలీజ్ అయింది. అయితే ఈ ఎమోషనల్ డ్రామా మూవీకి పెద్దగా కలెక్షన్లు దక్కలేదు. డిజాస్టర్‌గా నిలిచింది. ఐ వాంట్ టు టాక్ చిత్రం ఇప్పుడు ఓటీటీలో రెగ్యులర్‌ స్ట్రీమింగ్‍కు రానుంది.

స్ట్రీమింగ్ ఎప్పుడు.. ఎక్కడ?

ఐ వాంట్ టు టాక్ మూవీ ఇప్పటికే అమెజాన్ ప్రైమ్ వీడియో ఓటీటీలో రెంటల్ విధానంలో అందుబాటులోకి వచ్చింది. అయితే, ఇప్పుడు రెంట్ లేకుండా రెగ్యులర్ స్ట్రీమింగ్‍కు వచ్చేందుకు సిద్ధమవుతోంది. జనవరి 17వ తేదీన ఈ చిత్రం అమెజాన్ ప్రైమ్ వీడియో ఓటీటీలో రెంట్ లేకుండా అందుబాటులోకి రానుంది. దీంతో ప్రైమ్ వీడియో సబ్‍స్క్రైబర్లందరూ ఈ చిత్రాన్ని చూడొచ్చు.

నిజ జీవితం ఆధారంగా..

ఐ వాంట్ టు టాక్ చిత్రంలో అభిషేక్ బచ్చన్‍తో పాటు అహియా బమ్రూ లీడ్ రోల్ చేశారు. ఈ చిత్రంలో జానీ లివర్, పర్ల్ డే, జయంత్ కృప్లానీ, క్రిస్టిన్ గోడార్డ్, సాయివిష్ణు దూశెట్టి, స్మిత్ పటేల్ కీలకపాత్రలు పోషించారు. ఈ సినిమాను డైరెక్టర్ సూజిత్ తెరకెక్కించారు. క్యాన్సర్ వ్యాధితో పోరాటం చేసిన అర్జున్ సేన్ అనే వ్యక్తి నిజ జీవితం ఆధారంగా ఈ సినిమాను రూపొందించారు. అర్జున్ పాత్రను అభిషేక్ పోషించారు. చిన్నతనం నుంచి కూతురితో సరైన రిలేషన్ లేని తండ్రికి క్యాన్సర్ రావడం, అతడు 100 రోజులే జీవిస్తాడని తెలియడం, ఆ తర్వాత వారిద్దరి మధ్య పరిస్థితుల చుట్టూ ఈ మూవీ ఎమోషనల్‍గా సాగుతుంది.

బాక్సాఫీస్ డిజాస్టర్

ఐ వాంట్ టు టాక్ సినిమా బాక్సాఫీస్ వద్ద డిజాస్టర్ అయింది. ఈ సినిమాకు మొత్తంగా సుమారు రూ.40కోట్ల బడ్జెట్ అయినట్టు అంచనా. ఈ చిత్రం రూ.2కోట్ల కలెక్షన్ల మార్క్ కూడా దాటలేకపోయింది. ఈ సినిమా ఫుల్ రన్‍లో కేవలం రూ.1.25కోట్ల వసూళ్లను దక్కించుకున్నట్టు అంచనా. ఈ చిత్రం కమర్షియల్‍గా అల్ట్రా డిజాస్టర్ అయింది. అభిషేక్ బచ్చన్‍కు మరో ప్లాఫ్ పడింది. ఈ చిత్రంలో ఆయన నటనకు ప్రశంసలు వచ్చినా.. కలెక్షన్లు మాత్రం రాలేదు.

ఐ వాంట్ టు టాక్ చిత్రాన్ని రైజింగ్ సన్ ఫిల్మ్స్, కినో వర్క్స్ బ్యానర్లపై శీల్ కుమార్, రోనీ లహరి, కుమార్ ఠాకూర్, కరణ్ వాద్వా ప్రొడ్యూజ్ చేశారు. ఈ చిత్రానికి జార్జ్ జోసెఫ్, తబా చాకే మ్యూజిక్ అందించారు.