కోల్‌కతా ట్రైనీ డాక్టర్ హత్యాచారం కేసులో సీల్దా కోర్టు తీర్పు వెలువరించింది. ఆర్జీ కర్ అత్యాచారం-హత్య కేసులో జనవరి 18న సంజయ్ రాయ్‌ని దోషిగా నిర్ధారించిన కోర్టు సోమవారం అతడికి శిక్షను వేసింది. దోషిగా తేలిన సంజయ్ రాయ్‌కి కోర్టు జీవిత ఖైదు విధించింది. దర్యాప్తు సంస్థ సీబీఐ న్యాయవాది ఉరిశిక్ష విధించాలని కోర్టును కోరారు.

సీల్దా కోర్టు న్యాయమూర్తి దోషి సంజయ్ రాయ్‌తో మాట్లాడుతూ మీపై ఏం ఆరోపణలు వచ్చాయో, మీపై ఎలాంటి ఆరోపణలు రుజువు అయ్యాయో గత రోజు చెప్పానని చెప్పారు. అయితే దీనిపై నిందితుడు సంజయ్ న్యాయమూర్తితో మాట్లాడుతూ.. నేనేమీ అత్యాచారం, హత్య చేయలేదు. నన్ను తప్పుగా ఇరికిస్తున్నారని చెప్పాడు. ‘నేను నిర్దోషిని. నన్ను చిత్రహింసలకు గురిచేశారు. వారు కోరుకున్నదానిపై నాతో సంతకం చేయించారు.’ అని సంజయ్ అన్నాడు.