Best Web Hosting Provider In India 2024
రెడ్ క్రాస్ నుంచి వైయ‌స్ఆర్‌సీపీ నేతల సభ్యత్వం రద్దు చేయడం దారుణం
మంత్రి నారాయణకు అడ్డుగా ఉన్నార‌నే ఎమ్మెల్సీ చంద్ర‌శేఖ‌రెడ్డిని త‌ప్పించారు
మాజీ మంత్రి కాకాణి గోవ‌ర్ధ‌న్‌రెడ్డి ఆగ్ర‌హం
నెల్లూరు: రెడ్ క్రాస్ ప్రాథమిక సభ్యత్వం నుంచి వైయ‌స్ఆర్‌సీపీ సానుభూతి పరులను తొలగించే అధికారం కలెక్టర్కు లేదని మాజీ మంత్రి కాకాణి గోవ‌ర్ధ‌న్‌రెడ్డి పేర్కొన్నారు. రెడ్ క్రాస్ వ్యవహారంలో అధికార పార్టీ నేతల ఆదేశాలను కలెక్టర్‌ పాటిస్తున్నారని ఆయన విమర్శించారు. గురువారం ఎమ్మెల్సీ చంద్ర‌శేఖ‌ర్‌రెడ్డితో క‌లిసి కాకాణి గోవ‌ర్ధ‌న్‌రెడ్డి మీడియాతో మాట్లాడారు.
ఎమ్మెల్సీ చంద్ర‌శేఖ‌ర‌రెడ్డిపై క‌క్ష‌సాధింపు చ‌ర్య‌లు:
కలెక్టర్‌ హోదాలో కూర్చొనే అర్హత ఆనంద్‌ కి ఉందో లేదో ఆయన ఆత్మపరిశీలన చేసుకోవాలని కాకాణి సూచించారు. ఇండియన్‌ రెడ్ క్రాస్ జాతీయ చైర్మన్‌ గా బీజేపీ ఎంపీనే ఉన్నారని, రాజకీయ నేతలు ఉండకూడదనే నిబంధన ఎక్కడా లేదన్నారు. ఎమ్మెల్సీ పర్వతరెడ్డి చంద్రశేఖర్‌పై కక్ష సాధింపు చర్యలకు దిగుతున్నారని, రెడ్‌క్రాస్‌ వివాదాస్పదం కాకూడదనే చైర్మన్‌ పదవికి చంద్రశేఖర్‌రెడ్డి రాజీనామా చేశారని, రెడ్ క్రాస్ విలువ పెంచేలా ఆయన వ్యవహరించారన్నారు. రెడ్ క్రాస్ హాస్పిటల్ అభివృద్ధి చెందడానికి కారకులు ఎమ్మెల్సీ చంద్రశేఖర్ రెడ్డి అని, ఉచితంగా సేవలు అందిస్తున్న రెడ్ క్రాస్‌ని మంత్రి నారాయణ వాడుకుని సొమ్ము చేసుకోవాలని చూస్తున్నారు. మంత్రి నారాయణకి అడ్డుగా ఉన్న చంద్రశేఖర్‌రెడ్డిని కావాలనే తొలగించారు. రెడ్ క్రాస్ విషయంలో గత కలెక్టర్లకు రాని ఇబ్బంది, ఇప్పుడు కలెక్టర్‌కి ఏమొచ్చిందో అర్థం కావడం లేదు. రెడ్ క్రాస్ ద్వారా టీడీపీ నేతలే సేవల చెయ్యాలనే ఆలోచనలో కలెక్టర్‌ ఆనంద్‌ ఉన్నారు. వైయ‌స్ఆర్‌సీపీ సానుభూతి పరుల సభ్యత్వాన్ని రద్దు చేయడంపై న్యాయపోరాటం చేస్తామ‌ని కాకాణి గోవ‌ర్ధ‌న్‌రెడ్డి తెలిపారు.
రెడ్‌క్రాస్‌ను నాశనం చేస్తున్నారు: ఎమ్మెల్సీ చంద్ర‌శేఖ‌ర‌రెడ్డి
రెడ్‌క్రాస్‌ సంస్థలో వైయ‌స్ఆర్‌సీపీ సభ్యుల సభ్యత్వాన్ని రద్దు చేయడాన్ని ఎమ్మెల్సీ చంద్రశేఖర్‌రెడ్డి తప్పుబట్టారు. నెల్లూరు రెడ్ క్రాస్‌లో ఐదు వేల మంది సభ్యత్వం ఉంటే వాటిలో 90 శాతం మంది పొలిటికల్ పార్టీ వారే ఉన్నారని, వైయ‌స్ఆర్‌సీపీ వారికి మాత్రమే సభ్యత్వం రద్దు చేయడం దారుణమన్నారు. మంత్రి నారాయణకు రెడ్ క్రాస్ మీద అవగాహన లేదని, కాబట్టే కుట్రలు చేస్తున్నారని విమర్శించారు. ఆయన కనీసం ఇందులో సభ్యత్వం కూడా తీసుకోలేదన్నారు. నారాయణ మెడికల్‌ కాలేజ్‌ లోకీలకంగా ఉండే విజయ్‌ కుమార్‌ అనే వ్యక్తిని రెడ్ క్రాస్ లోమెంబర్‌గా చేర్చి, దాన్ని నాశనం చేయాలని మంత్రి చూస్తున్నారన్నారు. మంత్రి నారాయణ అనుచరులతో కొత్త బాడీని ఏర్పాటు చేయాలని కలెక్టర్‌ ఆనంద్‌ ప్రయత్నం చేస్తున్నారని చంద్రశేఖర్‌రెడ్డి మండిపడ్డారు.
