Brahma Mudi Serial Today Episode: బ్రహ్మముడి సీరియల్‌ ఈరోజు ఎపిసోడ్‌‌లో గెస్ట్ హౌజ్ తాకట్టు ఎందుకు పెట్టామో తెలుసా అని రాజ్ నిజం చెప్పబోతుంటే.. కావ్య ఆపుతుంది. ఆగండి.. ఏం మాట్లాడుతున్నారు. అసలు మీకు ఏం సంబంధం ఉందని ఇందులో జోక్యం చేసుకుంటున్నారు అని కావ్య అనగానే.. అంతా షాక్ అవుతారు.

నీ కొడుకుని డమ్మీ చేసేసింది

అవును, గెస్ట్ హౌజ్ తాకట్టు పెట్టింది నేను. పది కోట్ల అప్పు తీసుకుంది నేను. మీరెందుకు మధ్యలో మాట్లాడుతున్నారు. ఏ.. ఈ ఇద్దరికి జవాబు చెప్పకపోతే తల తీసి మొలెస్తారా. ఆస్తి మొత్తం నా పేరు మీద ఉంది. చెప్పాలనిపిస్తే నేనే చెప్పాలి. లేదు అనిపిస్తే లేదు. మీరు మాట్లాడకండి అని కావ్య అంటుంది. దాంతో వదినా అంతా అయిపోయింది. నీ కోడలు నీ కొడుకుని డమ్మీని చేసిపారేసింది. తోలు బొమ్మను చేసి ఆడిస్తుంది అని రుద్రాణి రెచ్చగొట్టే ప్రయత్నం చేస్తుంది.

కానీ, సుభాష్ అడ్డుకుంటాడు. ఏ కారణంతో నా కొడుకును నా కోడలు ఆగమందో.. నా కొడుకు ఎందుకు సైలెంట్‌గా ఉన్నాడో నాకు అర్థమైంది. నేను కనుక్కుంటాను. నువ్ రెచ్చగొట్టకు అని సుభాష్ అంటాడు. అమ్మా ఆస్తి మొత్తం నీ మీద ఉంది. కానీ, అంత డబ్బు ఎందుకు అప్పు తీసుకున్నావ్. కంపెనీకి వచ్చే డెలిగేట్స్ కోసం తీసుకున్న గెస్ట్ హౌజ్ అది. తాకట్టు పెట్టాల్సిన అవసరం ఏమొచ్చింది. అది తెలుసుకునే హక్కు మాకు లేదా అని సుభాష్ అడుగుతాడు.

తాతయ్య గారు నన్ను నమ్మి ఆస్తి నా పేరు మీద రాశారు. దాన్ని తాకట్టు పెట్టే హక్కు నాకుంది. అవసరం అయితే అమ్మెసే హక్కు కూడా నాకు ఉంది. కానీ, ఏం చేసినా ఎందుకు అని అడిగే హక్కు మాత్రం ఈ ఇంట్లో ఎవరికీ లేదు అని కావ్య అంటుంది. దాంతో అంతా అవాక్కవుతారు. కావ్య అని గట్టిగా అరుస్తూ అపర్ణ లేస్తుంది. ఎంత ధైర్యం నీకు. నా భర్తనే ఎదిరించి మాట్లాడుతావా. హక్కు లేదంటావా నిన్ను అని కావ్యపై చేయి ఎత్తుతుంది అపర్ణ.

కనకం గారి కూతురి చేతిలో

కానీ, సుభాష్ ఆపుతాడు. వద్దు అని సైగ చేయడంతో అపర్ణ ఆగిపోతుంది. కళావతి పదా అని రాజ్ అంటాడు. రాజ్, కావ్య ఇద్దరు పైకి వెళ్లిపోతారు. ఏంటీ అన్నయ్య ఇది.. అసలు కావ్య నిన్ను అని ప్రకాశం అంటుంటే.. ఇప్పుడేం వద్దని సుభాష్ ఆపుతాడు. దాంతో ప్రకాశం మాట్లాడకుండా ఆగిపోతాడు. హక్కులు ఆవిడ చెప్పుల కింద కాలు రాసేసి పోయింది. పెద్దరికం కళ్లకు గంతలు కట్టుకుని కూర్చోవాల్సిన గతి పట్టింది. పెడితే తినాలి. తిడితే పడాలి. దుగ్గిరాల వారి వంశ చరిత్ర కనకం గారి కూతురి చేతిలో చిరిగిపోయే సమయం ఆసన్నమైందని రుద్రాణి అంటుంది.

గుర్తు పెట్టుకోండి. ఎవ్వరికీ ప్రశ్నించే హక్కు లేదు. ఎవ్వరికీ నిలదీసే అర్హత లేదు. మొగుడుని కూడా ఇంతమంది ముందు బొమ్మలా నిలబెట్టింది అంటే.. అమ్మో.. ఇది మాములు ఆడది కాదు. మన వంశాన్ని భ్రష్టు పట్టించడానికి వచ్చిన మహమ్మారి.. మహమ్మారి అమ్మో అనుకుంటూ వెళ్లిపోతుంది రుద్రాణి. మరోవైపు బాధగా గదిలోకి వెళ్తారు కావ్య, రాజ్. ఏవండి.. మీరు నన్నేం అడగరా.. ఏం అనరా. నేను మాట తూలానండి. దేవుడు లాంటి మావయ్య గారిని పట్టుకుని అడిగే హక్కు లేదని నోరు జారాను అని కావ్య బాధగా అంటుంది.

ఇది నాకే తెలియకుండా నోరు జారడం అని మీకు తెలియడం లేదా అని కావ్య అంటుంది. ఎందుకు అర్థం కాలేదు అని రాజ్ అంటే.. మరి నా మీద కోపం రాలేదా అని కావ్య అంటుంది. వచ్చింది. నీ మీద కాదు. మన నిస్సహాయత మీద. మనల్నీ మోసం చేసిన వాడి మీద. ఈ నిజాన్ని ఇంట్లో చెప్పకుండా మధ్యలో నిన్ను దోషిలా నిలబెడుతున్నా నా అసమర్థత మీద అని రాజ్ అంటాడు. అయ్యో అలా అనకండి. మీరెక్కడ అపార్థం చేసుకుంటారో అని నేనే గిల్టీగా ఫీల్ అవుతున్నాను అని కావ్య అంటుంది.

తప్పంతా మీదేసుకున్నావ్

నువ్వు మనిషివే కళావతి. అది గుర్తించడానికి నాకు నాకు చాలా కాలం పట్టింది. నిజం బయటపెట్టలేక, ఇంత భారం భరించలేక, ఇంట్లో వాళ్ల నిందలతో నువ్వెంత నలిగిపోతున్నావో తెలుసు. వాడిని పట్టుకునేందుకు వెళ్లాం. కానీ, ఆ దారి మూసుకుపోయింది. మనలో మిగిలిన ఆశ చచ్చిపోయింది. అంతా శూన్యంగా అనిపించింది. మనం తీసుకోని అప్పు ఎంతో కష్టంగా కట్టాల్సి వస్తుంది. ఇన్ని సమస్యల మధ్య దోషిలా నిలబడి సమస్య తీర్చాలి. అప్పటికీ నిజం చెప్పాలనుకున్నా. కానీ, నువ్వే ఆపి తప్పంతా నీమీద వేసుకున్నావ్ అని రాజ్ అంటాడు.

నీ వ్యక్తిత్వాన్ని కూడా చంపుకుని ఎవరికీ ఏ హక్కు లేదన్నావ్. తప్పులేదు. నువ్ అలా అనకుంటే నిలదీసే వాళ్ల నోళ్లు మూతపడేవి కాదు. ఇంటిల్లిపాదిని బాధపెట్టే బదులు మనసు కష్టపెట్టే మాట అన్నావ్. ఇప్పుడు కూడా నిన్ను అర్థం చేసుకోకుంటే నా అంత మూర్ఖుడు ఉండడు. మా నాన్న గురించి నాకు తెలుసు. మా నాన్న మాత్రం నిన్ను అపార్థం చేసుకోడని అనుకుంటున్నాను. కానీ, ఒక్కటి మాత్రం చెప్పాలనుకుంటున్నాను నువ్వు అత్తింటి కష్టాన్ని నీ కష్టంగా మార్చుకున్నావ్. ఆస్తులు కోల్పోతున్నప్పుడు అండగా నిలబడ్డావ్. భర్తగా నీకు నేను ఎప్పుడు ఏం చేయలేదు. కానీ, ఇకనుంచి నీ మనసు కష్టపెట్టకుండా చూసుకోవాలని నిర్ణయించుకున్నాను అని రాజ్ అంటాడు.

దాంతో రాజ్‌ను ప్రేమగా హగ్ చేసుకుంటుంది కావ్య. ఇప్పటివరకు మావయ్యను మాట అన్నాననే బాధపడ్డాను. ఇప్పుడు ఆ గిల్టీ పోయింది. మీనుంచి కావాల్సిన ఓదార్పు దొరికింది. ఇప్పుడు నాకు ధైర్యంగా ఉంది. ఇలాంటి సమస్యలు ఎన్ని వచ్చినా స్థిరంగా నిలబడగలనని ధైర్యం వచ్చింది చాలు అని కావ్య అంటుంది. మరోవైపు కల్యాణ్ పాటలు రాసుకుంటూ ఉంటాడు. ఇంతలో అనామిక అన్న మాటలు గుర్తుకు తెచ్చుకుంటాడు.

నా ముందే కోపం రాదా

దాంతో సరిగ్గా రాయలేకపోతాడు. అది చూసిన అప్పు అడుగుతుంది. రేపు ఉదయంలోపు ఒక పాట రాయాలి. కానీ, రాయలేకపోతున్నాను. అనామిక అన్నమాటలు పదే పదే గుర్తుకు వస్తున్నాయి. అమ్మాయి గురించి ఫీల్‌తో రాయాలి. అనామిక గుర్తుకు వస్తే ఎలా రాయాలి అని కల్యాణ్ అంటాడు. కవి అంటే అంతేగా. ఎలా ఉన్నా, ఎక్కడ ఉన్నా రాయాలి. ఈ మధ్య నాకంటే నీకు ఎక్కువ కోపం వస్తుందనుకుంటా అని అప్పు అంటుంది. నా ముందే నా భార్యను అంటే కోపం రాదా అని కల్యాణ్ అంటాడు.

రేపు పోలీస్ అయ్యాక నేను మారిపోతానేమో అని అప్పు అంటుంది. లేదు. తప్పు చేస్తే ఎవరిని సహించవు. చివరికి నేను అయినా సరే అరెస్ట్ చేయడానికి ఆలోచించవు అని కల్యాణ్ అంటాడు. చాలు ఇక. అన్నం తిను అని అప్పు అంటుంది. ఈ రాత్రికి నేను తినలేను. వద్దని కల్యాణ్ అంటాడు. అనామిక మీద కోపం. ఎవరిమీదో కోపాన్ని అన్నం మీద చూపించాలా. సరే నేను కూడా తినను. రేపు పొద్దున్న నేను వెళ్తాను అని తెలుసు. మనకున్న కాస్తా టైమ్‌ను ఇలా పాడు చేయాల అని అప్పు అంటుంది.

నేను తినను, దాంతో ట్రైనింగ్‌కు కూడా వెళ్లలేను, ఆలోచించుకో అని వెళ్లిపోతుంది అప్పు. తర్వాత కాసేపటికి భోజనం పట్టుకుని అప్పు దగ్గరికి కల్యాణ్ వెళ్తాడు. అప్పుడు అప్పు అలకతో ఉంటుంది. కల్యాణ్ బతిమిలాడేసరికి అప్పు తింటుంది. ఇద్దరు ఒకరినొకరు తినిపించుకుంటారు. మరోవైపు సుభాష్ ఇంటి గేట్ వద్ద ఆలోచిస్తూ ఉంటాడు. ప్రకాశం వచ్చి పలకరిస్తాడు. నిన్ను ఇలాంటి పరిస్థితులో చూస్తానని అనుకోలేదు. నాన్న తర్వాత నాన్నలాంటివాడివి. అలాంటి నీకే ఎదురుచెప్పింది. అందరిలో నీతో అమర్యాదగా మాట్లాడింది కావ్య అని ప్రకాశం అంటాడు.

అవమానం ఎలా భరిస్తున్నావో

ఆ క్షణంలో నీ మనసు ఎంత చిన్నబుచ్చుకుందో, ఎంత గాయపడిందో నేను అర్థం చేసుకోగలను. కానీ, ఏం చేయను. కావ్య డబ్బను ఏం చేస్తుందో అంతుచిక్కని రహస్యంగా ఉంది. ఏం అడిగినా హక్కు లేదంటూ ఇష్టమొచ్చినట్లు ప్రవర్తిస్తుంది. ఒకప్పుడు నాకు అవమానం జరిగితే అండగా నువ్వు ఉన్నావనుకున్నాను. ఈరోజు అదే పరిస్థితుల్లో నువ్వు నిలబడ్డావ్. ఈ అవమానం ఎలా భరిస్తున్నావో తెలియట్లేదు కానీ, నా భార్య అడిగే ప్రశ్నలకు సమాధానం చెప్పలేకపోతున్నాను అని ప్రకాశం అంటాడు. ఆ మాటలను కావ్య వింటుంది.

తర్వాత డైనింగ్ టేబుల్‌ వద్ద మా సుభాష్ అన్నయ్యనే హక్కు లేదంటే పాపం పిల్లి కూనలా నోరు మూసుకున్నాడు. మా వదిన ఏమనకుండా నోరు మూసుకుంది. అందుకేనేమో ఇక్కడికి రాలేదు. ఇంతమంది ముందు పరువు పోయింది కదా అని రుద్రాణి అంటుంది. తర్వాత నందగోపాల్ హత్య వెనుక ఎవరో ఉన్నారనిపిస్తుందని కావ్య అంటుంది. అక్కడితో నేటి బ్రహ్మముడి సీరియల్ ఎపిసోడ్ ముగుస్తుంది.