అమెరికాలో సరైన ఉద్యోగ అవకాశాలు లేక ఇబ్బంది పడుతున్న భారతీయ విద్యార్థులపై ‘ట్రంప్​’ పిడుగు పడింది! అమెరికా అధ్యక్షుడిగా బాధ్యతలు చేపట్టిన డొనాల్డ్​ ట్రంప్​.. ఇమ్మిగ్రేషన్​పై తన వైఖరిని స్పష్టంగా తెలియజేయడంతో భారతీయ విద్యార్థుల్లో ఆందోళనలు పెరిగాయి. ఈ నేపథ్యంలో డిపోర్టేషన్​ ప్రమాదం నుంచి తప్పించుకునేందుకు.. చాలా మంది తమ పార్ట్​-టైమ్​ ఉద్యోగాలను వదులుకుంటున్నారు.

అమెరికాలో భారతీయ విద్యార్థుల కష్టాలు..!

విదేశీ విద్యార్థుల పార్ట్​-టైమ్​ ఉద్యోగాలపై అమెరికాలో చాలా నిబంధనలు ఉంటాయి. ఎఫ్​-1 వంటి వీసాలపై అమెరికాకు వెళ్లేవారికి క్యాంపస్​లో మాత్రమే వారానికి 20 గంటలు పని చేసే అవకాశం లభిస్తుంది. కానీ చాలా మంది ఖర్చుల కోసం పార్ట్-​ టైమ్​ ఉద్యోగాలు కూడా చేస్తుంటారు. ఈ విషయం బయటపడితే దేశం నుంచి వెళ్లిపోవాల్సిన ప్రమాదం కూడా ఉంటుంది.

ఇమ్మిగ్రేషన్​పై అమెరికా అధ్యక్షుడు ట్రంప్​ చాలా కఠినంగా ఉంటారు. ఆయన మొదటి అధ్యక్ష కాలంలోనే ఇది చాలా స్పష్టంగా కనిపించింది. ఇక రెండో టర్మ్​లో మరిన్ని కఠిన చర్యలు చేపట్టే అవకాశం లేకపోలేదు. ఫలితంగా.. ట్రంప్​ అధికారంలోకి రాకముందే, భారతీయ విద్యార్థుల్లో చాలా మంది తమ పార్ట్​-టైమ్​ ఉద్యోగాలను వదిలేశారు. ఇప్పుడు ఇది కొనసాగుతోంది.

“నెలవారీ ఖర్చుల కోసం కాలేజ్​ అయిపోయిన తర్వాత నేను చిన్న కేఫ్​లో పనిచేసేవాడిని. గంటకు 7 డాలర్లు వచ్చేవి. ప్రతిరోజు 6 గంటలు పనిచేసేవాడి. చాలా బాగుండేది. కానీ గత వారం ఆ పార్ట్​-టైమ్​ జాబ్​ని క్విట్​ చేశాను. ఈ అనధికారిక పని గురించి ఇమ్మిగ్రేషన్​ అధికారులకు తెలిస్తే కష్టమవుతుందని పార్ట్​-టైమ్​ ఉద్యోగాన్ని ఆపేశాను. రిస్క్​ తీసుకోలేను! పైగా ఇక్కడ చదువుకునేందుకు రూ. 43లక్షల వరకు అప్పుతీసుకుని వచ్చాను,” అని అమెరికాలోని ఓ భారతీయ విద్యార్థి వెల్లడించాడు.

వేలాది మంది భారతీయ విద్యార్థులు అమెరికాలోని రెస్టారెంట్లలో, గ్యాస్​ స్టేషన్లలో, రీటైల్​ స్టోర్స్​లో పనిచేస్తూ.. తమ రెంట్​, గ్రాసరీ, ఇతర జీవన ఖర్చులకు డబ్బులు సమకుర్చుంటారు. కానీ ట్రంప్​ యంత్రాంగంపై భయంతో విద్యార్థులు ఇప్పుడు రిస్క్​ తీసుకోవాలని అనుకోవడం లేదు.

సేవింగ్స్​ నుంచి తీసి, అప్పు చేసి..!

అమెరికాలో పార్ట్​- టైమ్​ ఉద్యోగాలని వదిలేసిన విద్యార్థులు.. పరిస్థితులను ఎప్పటికప్పుడు పరిశీలిస్తున్నారు. కొన్ని నెలల గ్యాప్​ తర్వాత, అన్ని బాగుంటే, మళ్లీ పార్ట్​ టైమ్​ జాబ్స్​లో చేరవచ్చని అభిప్రాయపడుతున్నారు. ప్రస్తుతానికైతే సేవింగ్స్​ని వాడుకుంటున్నారు. లేదా ఇండియాలోని కుటుంబసభ్యుల నుంచి, ఫ్రెండ్స్​ నుంచి అప్పులు చేస్తున్నారు.

“ఎంత అప్పు చేసినా ఇక్కడ బతికేందుకు సరిపోవడం లేదు.” అని టెక్సాస్​లోని ఓ భారతీయ విద్యార్థి ఆవేదన వ్యక్తం చేశాడు. “మళ్లీ మళ్లీ తల్లిదండ్రులను డబ్బులు అడగాలంటే బాధగా ఉంది. ఇప్పటికే వారు చాలా ఖర్చు చేశారు. గిల్టీగా ఉంది. కానీ నాకు వేరే ఆప్షన్​ లేదు,”అని వివరించాడు.

“ఇప్పటివరకు దాచుకున్న వాటిల్లో చాలా వరకు ఖర్చు అయిపోయింది. నా రూమ్​మేట్​ నుంచి డబ్బులు తీసుకుంటున్నాను. ఇలా ఎంత కాలం ఉంటానో తెలియదు,” అని సదరు విద్యార్థి తెలిపాడు.

ప్రస్తుత అనిశ్చితి పరిస్థితులు.. అమెరికాలోని భారతీయ విద్యార్థుల్లో చాలా మందిని మానసికంగా ప్రభావితం చేస్తోంది. అటు ఆర్థిక పరిస్థితి, ఇటు మెంటల్​ హెల్త్​ని మేనేజ్​ చేసుకోలేకపోతున్నారు.