Ration Cards : రైతు భరోసా, ఇందిరమ్మ ఆత్మీయ భరోసా, రేషన్ కార్డుల ప్రక్రియ కొనసాగుతోందని మంత్రి తుమ్మల నాగేశ్వరరావు తెలిపారు. రైతు భరోసా తొలివిడతలో మండలానికి ఒక గ్రామం చొప్పున రైతు భరోసా సొమ్ము విడుదల చేసినట్లు చెప్పారు. సోమవారం రాష్ట్ర వ్యాప్తంగా 4,41,911 మంది రైతుల అకౌంట్లలో రైతు భరోసా డబ్బులు జమ చేసినట్లు పేర్కొన్నారు. రాష్ట్రంలోని 577 మండలాల్లోని 9,48,333 ఎకరాలకు రూ.530 కోట్ల నగదు రైతుల ఖాతాల్లో జమ చేసినట్లు చెప్పారు. అర్హులైన ప్రతి ఒక్కరికీ రైతు భరోసా అందిస్తామని మంత్రి తుమ్మల తెలియజేశారు.

మొదటి రోజు 15,414 కొత్త రేషన్ కార్డులు జారీ

501 గ్రామాల్లో ఇందిరమ్మ ఆత్మీయ భరోసా పథకాన్ని ప్రారంభినట్లు మంత్రి తుమ్మల తెలిపారు. మొదటి రోజు 20,336 మంది భూమిలేని కూలీల ఖాతాల్లో రూ.6 వేల చొప్పున జమచేశామన్నారు. రాష్ట్ర వ్యాప్తంగా మొదటి రోజు 15,414 కొత్త రేషన్‌ కార్డులు జారీ చేసినట్లు మంత్రి చెప్పారు. కొత్త కార్డుల్లో 51,912 మందికి ఫిబ్రవరి నుంచి రేషన్‌ పంపిణీ చేస్తామన్నారు. మొదటి రోజు మండలానికి ఒక గ్రామం చొప్పున కొత్త రేషన్‌ కార్డులు జారీ చేశామని తెలిపారు. పాత రేషన్‌ కార్డుల్లో సవరణలు చేసి 1.03 లక్షల మంది పేర్లు చేర్చారన్నారు.

రైతు భరోసా అర్హతలు – దరఖాస్తు విధానం

పంట పెట్టుబడి సాయం కోసం తెలంగాణ ప్రభుత్వం రైతు భరోసా స్కీమ్ ను ప్రారంభించింది. గణతంత్ర దినోత్సవం సందర్భంగా ఈ స్కీమ్ ను అందుబాటులోకి తీసుకువచ్చింది. అర్హులైన అన్నదాతలకు ఏడాదికి రూ. 12వేల సాయం అందించనుంది.

1. రైతు భరోసా స్కీమ్ కింద ఎకరాకు రూ. 12000 పంట పెట్టుబడి సాయం అందిస్తారు.
2. భూభారతి(ధరణి)లో నమోదైన వ్యవసాయ యోగ్యమైన భూములకే పంట పెట్టుబడి సాయం అందుతుంది.
3. వ్యవసాయానికి యోగ్యం కాని భూములు, అంటే రాళ్లు, రప్పలు, గుట్టలు, రోడ్ల నిర్మాణంలో కోల్పోయిన భూములు, మైనింగ్ చేస్తున్న భూములు, నాలా కన్వర్షన్ అయిన భూములు, రియల్ ఎస్టేట్ వెంచర్లు చేసిన భూములు, పరిశ్రమలకు తీసుకున్న భూములు, రైతుల నుంచి ప్రభుత్వం సేకరించిన భూములకు రైతు భరోసా వర్తించదు.
4. ఆర్వోఎఫ్ఆర్ పట్టాదారులు కూడా రైతు భరోసాకు అర్హులవుతారు.
5. డీబీటీ (నగదు బదిలీ) పద్ధతిలో రైతు భరోసా సహాయాన్ని రైతుల ఖాతాల్లో జమ చేస్తారు.
6. రైతు భరోసా స్కీమ్ కు ఆఫ్ లైన్ లో దరఖాస్తులను స్వీకరిస్తారు.
7. గతంలో రైతుబంధు వచ్చిన రైతులు రైతు భరోసాకి దరఖాస్తు చేసుకోవాల్సిన అవసరం లేదు.
8. పట్టాదారు పాసుపుస్తకం, ఆధార్, బ్యాంక్ అకౌంట్, అప్లికేషన్ ఫారం జీరాక్స్ లు అందజేయాల్సి ఉంటుంది.
9. రైతు భరోసా అకౌంట్ వివరాలను జనవరి 30వ తేదీలోపు మండల వ్యవసాయశాఖ అధికారులకు అందజేయాల్సి ఉంటుంది.