మెగాస్టార్ చిరంజీవి తన సుదీర్ఘ కెరీర్లో ఎన్నో వైవిధ్యమైన సినిమాలు చేశారు. రకరకాల పాత్రలు పోషించారు. కొన్ని ప్రయోగాత్మక చిత్రాల్లోనూ నటించి మెప్పించారు. ఇప్పటికీ ఫుల్ జోష్‍తో సినిమాలు చేస్తున్నారు. ప్రస్తుతం కొందరు తెలుగు హీరోలు గ్లోబల్ రేంజ్‍లో పాపులర్ అయ్యారు. ఆర్ఆర్ఆర్ చిత్రంతో చిరంజీవి తనయుడు రామ్‍చరణ్ గ్లోబల్ స్టార్ అనే పేరు తెచ్చుకున్నారు. తండ్రిని మించిన తనయుడిగా కూడా ప్రశంసలు అందుకున్నారు. అయితే, ఓ సినిమా రద్దు కాకపోయి ఉంటే 1998లోనే చిరంజీవి గ్లోబల్ స్టార్ అయ్యే అవకాశం ఉండేది. ఆ వివరాలు ఇక్కడ చూడండి.

హాలీవుడ్ భాగస్వామ్యంతో..

1998లో చిరంజీవి హీరోగా అబు బాగ్ధాద్ గజదొంగ సినిమా షూటింగ్ మొదలైంది. ఇండియన్-హాలీవుడ్ భాగస్వామ్యంతో ఈ చిత్రం పట్టాలెక్కింది. ఈ మూవీ ఇంగ్లిష్ వెర్షన్‍కు భూషణ్ జెర్సీ, తెలుగు వెర్షన్‍కు సురేశ్ కృష్ణ దర్శకులుగా ఉన్నారు. తెలుగు, ఇంగ్లిష్‍తో పాటు హిందీలోనూ ఆ చిత్రాన్ని రిలీజ్ చేయాలని మేకర్స్ అనుకున్నారు. అలా అప్పట్లోనే గ్లోబల్ రేంజ్ మూవీకి ప్రణాళికలు రచించుకున్నారు. ఈ చిత్రానికి ఏఆర్ రహమాన్ సంగీత దర్శకుడిగా ఎంపికయ్యారు.

ఫస్ట్ షెడ్యూల్ తర్వాత స్టాప్

అబు బాగ్ధాద్ గజదొంగ మూవీ అప్పట్లోనే రూ.50కోట్ల బడ్జెట్‍తో నిర్మించేందుకు మేకర్స్ రెడీ అయ్యారు. అప్పట్లో ఇది అత్యంత భారీ బడ్జెట్. ఈ చిత్రానికి గ్రాండ్‍గా లాంచ్ కార్యక్రమం చేశారు. షూటింగ్ కూడా షురూ అయింది. అయితే, తొలి షెడ్యూల్ షూటింగ్ తర్వాత ఈ చిత్రం ఆగిపోయింది. మళ్లీ పట్టాలెక్కలేదు. కొన్ని పోస్టర్లు తప్ప ఈ మూవీ నుంచి ఇంకేం రాలేదు.

కారణం ఇదే

అబు బాగ్ధాద్ గజదొంగ చిత్రంలో ముస్లింల మనోభావాలను కించపరిచేలా సన్నివేశాలు ఉంటాయనే అభ్యంతరాలు వ్యక్తమయ్యాయి. ఖురాన్ పేపర్లను చింపి టీలో ముంచే సీన్ ఈ మూవీలో ఉంటుందని, వెంటనే ఈ చిత్రాన్ని ఆపేయాలని కొన్ని ముస్లిం సంఘాలు ఆందోళనలు కూడా చేపట్టాయి. కోర్టు వరకు ఈ అంశం వెళ్లింది. మొత్తంగా ఈ వివాదంతో అబు బాగ్ధాద్ గజదొంగ షూటింగ్ ఆగిపోయింది. సుమారు 20 శాతం షూటింగ్ జరిగినా.. రద్దయిపోయింది.

ఒకవేళ.. హాలీవుడ్ భాగస్వామ్యం ఉన్న అబు బాగ్ధాద్ గజదొంగ వివాదాలు లేకుండా పూర్తయి.. రిలీజై ఉంటే 2000కు ముందే మెగాస్టార్ చిరంజీవి గ్లోబల్ స్టార్ అయ్యే అవకాశం మెండుగా ఉండేది. హాలీవుడ్ రేంజ్‍కు వెళ్లేవారు. అయితే, టాలీవుడ్‍లో ఇండస్ట్రీ హిట్‍ల మోత మోగించి అగ్రహీరోగా సుమారు మూడు దశాబ్దాలుగా కొనసాగారు చిరూ. కోట్లాది మంది అభిమానులను సొంతం చేసుకున్నారు.

చిరంజీవి 156వ సినిమాగా విశ్వంభర రూపొందుతోంది. చిరూ హీరోగా నటించిన ఈ సోషియో ఫ్యాంటసీ మూవీ ఈ ఏడాదిలోనే రిలీజ్ కానుంది. ఈ చిత్రానికి వశిష్ట దర్శకత్వం వహించారు.

ఆగిపోయిన మరికొన్ని ప్రాజెక్టులు

దర్శకుడు రామ్‍గోపాల్ వర్మతో ‘వినాలని ఉంది’ అనే సినిమా కూడా చిరూ ఓకే చేశారు. 1988లో షూటింగ్ కూడా మొదలైంది. అయితే ఆ తర్వాత కథ నచ్చక చిరూ మధ్యలో వద్దనేశారు. లెజెండరీ డైరెక్టర్ సంగీతం శ్రీనివాసరావుతో ‘భూలోక వీరుడు’ అనే సైన్స్ ఫిక్షన్ ప్రాజెక్టుపై చిరూతో చర్చలు జరిగినా.. పట్టాలెక్కలేదు. కోదండ రామిరెడ్డితో చిరంజీవి చేయాల్సిన వజ్రాలదొంగ కూడా రద్దయింది.