Best Web Hosting Provider In India 2024
Illu Illalu Pillalu January 30th Episode: భ‌ర్తను కాపాడుకున్న ప్రేమ – హాస్పిట‌ల్ పాలైన ధీరజ్ – వేదావ‌తి విశ్వ‌రూపం
Illu Illalu Pillalu : ఇల్లు ఇల్లాలు పిల్ల‌లు జ‌న‌వ‌రి 30 ఎపిసోడ్‌లో ధీరజ్ రౌడీల‌కు దొరికిపోతాడు. ప్రేమ‌ను లేపుకుపోయి పెళ్లిచేసుకున్న ధీరజ్ ప్రాణాల‌ను తానే తీయాల‌ని విశ్వ అనుకుంటాడు. ధీర‌జ్‌ను క‌త్తితో పొడ‌వ‌బోతాడు. విశ్వ‌ను అడ్డుకున్న ప్రేమ భ‌ర్త ప్రాణాల‌ను కాపాడుతుంది.
ఊరి పెద్ద‌గా రామ‌రాజుకు అర్హ‌త లేద‌ని భ‌ద్రావ‌తి, సేనాప‌తి అవ‌మానిస్తారు. ఇంట్లోనే రామ‌రాజుకు విలువ లేద‌ని, తండ్రికి చెప్ప‌కుండా ఇద్ద‌రు కొడుకులు లేచిపోయి పెళ్లి చేసుకున్నార‌ని భ‌ద్రావ‌తి త‌క్కువ చేసి మాట్లాడుతుంది. భ‌ర్త‌కు త‌న క‌ళ్ల ముందే అవ‌మానం జ‌ర‌గ‌డం వేదావ‌తి స‌హించ‌లేక‌పోతుంది.
త‌న భ‌ర్త గురించి మాట జారితే బాగుంద‌ని సేనాప‌తికి వార్నింగ్ ఇస్తుంది. ఎవ‌రిని బాధ‌పెట్ట‌కుండా గౌర‌వంగా బ‌తికే మ‌నిషిని అవ‌మానించ‌డానికి మీకు మ‌న‌సు ఎలా వ‌చ్చింద‌ని నిల‌దీస్తుంది.
ఇంటి పేరు లేని అనాథ…
ఆ రోజు నువ్వు ఎలా చేశావో…నీ కొడుకులు ఇప్పుడు అలాగే త‌యార‌య్యార‌ని, ఇంకా ఏ ముఖం పెట్టుకొని మాట్లాడుతున్నావ‌ని చెల్లెలిని కోపంగా క‌సురుకుంటాడు సేనాప‌తి. రామ‌రాజుకు త‌న త‌ల్లిదండ్రులు ఎవ‌రు తెలియ‌దు. క‌నీసం ఇంటి పేరు కూడా లేని అనాథ. వీడి కుటుంబంలోని ఒక్క‌రు కూడా స‌రిగ్గా లేర‌ని తీసి ప‌డేస్తూ మాట్లాడుతుంది భ‌ద్రావ‌తి.
అరేయ్ రామ‌రాజు నీ స్థానంలో మ‌రొక‌రు ఉంటే ఈ పాటికే అవ‌మానంతో చ‌చ్చిపోయేవారు…కానీ నువ్వు మాత్రం సిగ్గు లేకుండా పెద్ద మ‌నిషిలా హార‌తి ఇవ్వ‌డానికి వ‌చ్చావ‌ని భ‌ద్రావ‌తి అంటుంది. ఆమె మాట‌ల‌తో కోపంతో ర‌గ‌లిపోతుంది వేదావ‌తి. కానీ ఆమెను అడ్డుకుంటాడు రామ‌రాజు. హార‌తి ఇవ్వ‌కుండానే గుడిలో నుంచి త‌న కుటుంబంతో క‌లిసి వెళ్లిపోతాడు. రామ‌రాజుపై గెలిచాన‌నే సంతోషంతో పొంగిపోతుంది వేదావ‌తి.
రౌడీల‌కు దొరికిన ధీరజ్…
ప్రేమ గురించిన ఆలోచ‌న‌లో మునిగిపోయిన ధీర‌జ్‌ను రౌడీలు చుట్టుముట్టి కొడ‌తారు. వాళ్లు కొట్టిన దెబ్బ‌ల‌కు ధీరజ్ స్పృహ కోల్పోతాడు. రౌడీల‌కు కాల్ చేసిన విశ్వ ఆ ధీరజ్ గాడిని చంపేశారా లేదా అని అడుగుతారు. వాడి చావు చూడ‌టం కోస‌మే సంక్రాంతి సంబ‌రాల‌కు వ‌చ్చాన‌ని, వాడి చావు వార్త వినాల‌ని ఎదురుచూస్తున్నాన‌ని అంటాడు. ధీరజ్ త‌మ‌కు దొరికిన సంగ‌తి చెబుతారు రౌడీలు. ధీర‌జ్‌ను త‌న చేతుల‌తోనే చంపుతాన‌ని విశ్వ అంటాడు.
త‌న చెల్లెలిని మోసం చేసి పెళ్లి చేసుకున్న వాడిపై నేనే స్వ‌యంగా ప్ర‌తీకారం తీర్చుకుంటాన‌ని అంటాడు. విశ్వ మాట‌ల‌ను ప్రేమ వింటుంది. ధీర‌జ్‌ను ఎలాగైనా కాపాడాల‌ని ఫిక్స‌వుతుంది.
నీ చావును ఆప‌లేరు…
ధీర‌జ్‌ను చంప‌డానికి విశ్వ వ‌స్తాడు. నీ చావును ఎవ‌రూ ఆప‌లేర‌ని ధీర‌జ్‌తో చెబుతాడు. నా చెల్లిని లేపుకెళ్లి పెళ్లి చేసుకోవ‌డానికి ఎంత ధైర్యం అని ధీర‌జ్‌ను కొడ‌తాడు విశ్వ. రామ‌రాజు గురించి త‌ప్పుగా మాట్లాడుతాడు. మా ఇంట్లో కూలి ప‌ని చేసే నీ బాబు మా చిన్న‌త్త‌ను లేపుకెళ్లి పెళ్లి చేసుకున్నాడు. ఈ రోజు నువ్వు చేసింది అదే క‌దా అని ధీర‌జ్‌తో అంటాడు విశ్వ.
మా కుటుంబానికి జ‌రిగిన అవ‌మానం అంత నీ వ‌ల్లే అని కోపంతో ధీర‌జ్‌ను ర‌క్తం వ‌చ్చేలా చిత‌క్కొడ‌తాడు విశ్వ. నీ ప్రాణాలు తీసి మా చెల్లెలిని మా ఇంటికి తీసుకెళ్లిపోతాన‌ని, పాతికేళ్లుగా మ‌న‌శ్శాంతి లేకుండా మేము ఎలా బ‌తికామో ఇక నుంచి మీరు అలాగే బ‌తికేలా చేస్తాన‌ని క‌త్తి తీస్తాడు విశ్వ.
ప్రేమ ఎంట్రీ…
అప్పుడే అక్క‌డికి వ‌చ్చిన ప్రేమ…విశ్వ‌ను అడ్డుకుంటుంది. ధీర‌జ్‌ను చంపేసి నిన్ను మ‌న ఇంటికి తీసుకెళ‌తాన‌ని ప్రేమ‌తో అంటాడు విశ్వ. నిన్ను లేపుకుపోయి పెళ్లిచేసుకొని ప్రాణాలు తీసే దుర్మార్గుడిగా న‌న్ను ధీరజ్ ఇలా త‌యారు చేశాడ‌ని విశ్వ కోపంగా అంటాడు. నువ్వు మ‌న ఇంటికి రావాలి, అంద‌రితో సంతోషంగా ఉండాలి…అంతే కాకుండా ధీరజ్ కార‌ణంగా పోయిన మ‌న ఇంటి ప‌రువు తిరిగి రావాల‌ని కోపంగా క‌త్తితో ధీర‌జ్‌ను పొడ‌వ‌బోతాడు విశ్వ.
ముందు న‌న్ను చంపేయ్‌…
మ‌ధ్య‌లోకి ప్రేమ వ‌స్తుంది. ధీర‌జ్‌ను చంపాలంటే ముందు న‌న్ను చంపామ‌ని అంటుంది. ధీర‌జ్‌ను తాను ఇష్ట‌ప‌డే పెళ్లి చేసుకున్నాన‌ని, అలాంట‌ప్పుడు ధీరజ్ న‌న్ను మోసం చేయ‌డం ఎలా అవుతుంద‌ని అడుగుతుంది. ధీరజ్ ఏమైనా చేస్తే తాను కూడా ప్రాణాల‌తో ఉండ‌న‌ని, నీ క‌ళ్ల ముందే చ‌చ్చిపోతాన‌ని విశ్వ‌తో చెబుతుంది ప్రేమ. క‌త్తిని త‌న మెడ‌పై పెట్టుకుంటుంది.
వెళ్లిపోయిన రౌడీలు…
క‌త్తిని కింద‌ప‌డేయ‌మ‌ని చెల్లిని బ‌తిమిలాడుతాడు విశ్వ. నువ్వు, నీతో పాటు ఈ రౌడీలు ఇక్క‌డి నుంచి వెళ్లిపోతేనే తాను క‌త్తి తీస్తాన‌ని ప్రేమ అంటుంది. చెల్లి అన్నంత ప‌ని చేస్తుంద‌ని భ‌య‌ప‌డిన ధీరజ్ అక్క‌డి నుంచి వెళ్లిపోతాడు.
వేదావ‌తి కంగారు…
ధీరజ్, ప్రేమ ఇంటికిరాక‌పోవ‌డంతో వేదావ‌తి కంగారు ప‌డుతుంది. ధీర‌జ్‌తో పాటు ప్రేమ‌కు చందు ఫోన్ చేస్తాడు. ఎన్నిసార్లు లిఫ్ట్ చేయ‌క‌పోవ‌డంతో వారి భ‌యం మ‌రింత పెరుగుతుంది. ధీరజ్ గురించి కంగారు ప‌డాల్సిన అవ‌స‌రం లేద‌ని, ఫోన్ కూడా చేయ‌ద్ద‌ని రామ‌రాజు అంటాడు. క‌న్న‌వాళ్ల‌ను మోసం చేసే చావు తెలివితేట‌లు ఉన్నాయ‌ని, వాడిని ఇంకా న‌మ్ముతున్న నిన్ను చూస్తుంటే జాలేస్తుంద‌ని వేదావ‌తితో కోపంగా రామ‌రాజు చెబుతాడు.
పుట్టింటితో గొడవ…
ఒంటి నిండా గాయ‌ల‌తో ర‌క్త‌మోడుతున్న ధీర‌జ్‌ను చూసి ప్రేమ త‌ల్ల‌డిల్లిపోతుంది. అత‌డిని హాస్పిట‌ల్ తీసుకెళుతుంది. ధీర‌జ్‌కు డాక్ట‌ర్లు ట్రీట్‌మెంట్ ఇస్తారు. రౌడీల‌ను పెట్టి ధీర‌జ్‌ను విశ్వ చంపాల‌ని చూసిన విష‌యం వేదావ‌తికి తెలిసిపోతుంది. కోపంతో పుట్టింటిపై గొడ‌వ‌కు వెళుతుంది. విశ్వ చెంప‌లు వాయిస్తుంది. అక్క‌డితో నేటి ఇల్లు ఇల్లాలు పిల్ల‌లు సీరియ‌ల్ ముగిసింది.
