పాకిస్థాన్‌లో ఓ షాకింగ్ కేసు వెలుగుచూసింది. ఇటీవల అమెరికా నుంచి వచ్చిన ఓ పాకిస్థానీ వ్యక్తి తన 15 ఏళ్ల కుమార్తెను కాల్చి చంపాడు. ఇటీవలే వీరి కుటుంబం బలూచిస్థాన్ తిరిగి వచ్చింది. నిందితుడైన తండ్రి తన నేరాన్ని అంగీకరించాడని పోలీసు అధికారులు తెలిపారు. తన కుమార్తె చేస్తున్న టిక్‌టాక్ వీడియోలతో కలత చెందానని నిందితుడు చెప్పాడు. కూతురు వీడియోలు చేసేందుకు పొట్టి బట్టలు వేసుకునేదని పేర్కొన్నాడు. సమాజంలో పరువు పోతుందనే భయంతో ఆవేశంతో ఈ దారుణానికి పాల్పడ్డానని ఒప్పుకొన్నాడు.

పోలీసులు ప్రశ్నించగా

దాదాపు 25 సంవత్సరాలుగా యునైటెడ్ స్టేట్స్‌లో నివసించిన అన్వర్ ఉల్-హక్ కుటుంబం ఇటీవలే పాకిస్థాన్‌లోని బలూచిస్థాన్ ప్రావిన్స్‌కు వచ్చింది. మంగళవారం క్వెట్టాలోని ఒక వీధిలో కాల్పులు జరిగాయి. మెుదట్లో తండ్రి అన్వర్ గుర్తుతెలియని ముష్కరులు అమెరికాలో జన్మించిన తన 15 ఏళ్ల కుమార్తెను కాల్చి చంపారని చెప్పాడు. ఆ తర్వాత పోలీసులకు అనుమానం వచ్చి ప్రశ్నించగా.. నేరాన్ని అంగీకరించడాని పోలీసు అధికారి బాబర్ బలోచ్ చెప్పారు.

మరో పోలీసు అధికారి జోహైబ్ మొహ్సిన్ మాట్లాడుతూ.. ‘ఆమె దుస్తులు, జీవనశైలిపై కుటుంబ సభ్యులకు అభ్యంతరాలు ఉన్నాయని ఇప్పటివరకు మా దర్యాప్తులో తేలింది. ఆయన ఫోన్ మా దగ్గర ఉంది. పరువు హత్య సహా అన్ని కోణాల్లో దర్యాప్తు చేస్తున్నాం. దాదాపు 25 ఏళ్లు వీరు అమెరికాలో ఉన్నారు.’ అని తెలిపారు.

పాకిస్థాన్ వచ్చాక కూడా చేస్తుందని

నిందితుడికి అమెరికా పౌరసత్వం ఉందని అధికారులు తెలిపారు. తన కుమార్తె అమెరికాలో ఉన్నప్పుడు సోషల్ మీడియా ప్లాట్‌ఫామ్ టిక్‌టాక్‌లో వీడియోలు చేయడం ప్రారంభించిందని తండ్రి చెప్పాడు. పాకిస్థాన్‌కు తిరిగి వచ్చిన తర్వాత కూడా ఆమె ఇలాంటి వీడియోలను షేర్ చేస్తూనే ఉందని పోలీసులకు తెలిపాడు. ఈ హత్యకు సంబంధించి నిందితుడితో పాటు అతని బావమరిదిని కూడా అరెస్టు చేసినట్లు పోలీసులు చెప్పారు.

అశ్లీల కంటెంట్ సమస్య

పాకిస్థాన్‌లో 54 మిలియన్ల మంది ప్రజలు టిక్‌టాక్‌ని ఉపయోగిస్తున్నారు. కంటెంట్ నియంత్రణపై ప్రభుత్వం ఇటీవలి సంవత్సరాలలో వీడియో షేరింగ్ యాప్‌ను చాలాసార్లు బ్లాక్ చేసింది. సోషల్ మీడియా ప్లాట్‌ఫారమ్‌తో అశ్లీల కంటెంట్ అనే పదంతో సమస్యను ఎదుర్కొంటుంది పాకిస్థాన్.

ఏటా వెయ్యి మంది

స్వతంత్ర మానవ హక్కుల కమిషన్ ఆఫ్ పాకిస్థాన్ ప్రకారం, ప్రతి సంవత్సరం పాకిస్తాన్‌లో 1,000 మంది మహిళలు సమాజం లేదా కుటుంబ సభ్యుల చేతుల్లో గౌరవం దెబ్బతినడం వల్ల చనిపోతున్నారు. పారిపోవడం, సోషల్ మీడియా కంటెంట్‌ను పోస్ట్ చేయడం, పురుషులతో స్నేహం చేయడం లేదా మహిళలకు సంబంధించిన సాంప్రదాయిక విలువలకు వ్యతిరేకంగా ఏదైనా ఇతర ఉల్లంఘనలకు సంబంధించిన విషయాలు ఇందులో ఉన్నాయి.