OTT Movies: థ్రిల్లర్ జానర్ మూవీస్ ఇష్టపడే ఓటీటీ ప్రేక్షకుల కోసం శుక్రవారం (జనవరి 31) రెండు సినిమాలు రాబోతున్నాయి. జీ5, ఆహా వీడియో ఓటీటీ ప్లాట్‌ఫామ్స్ లోకి ఈ రెండు మూవీస్ వస్తున్నాయి. వీటిలో ఒకటి కాఫీ విత్ ఎ కిల్లర్ కాగా.. మరొకటి ఐడెంటిటీ. కామెడీ థ్రిల్లర్, మర్డర్ మిస్టరీ థ్రిల్లర్ జానర్లలో రూపొందిన ఈ మూవీస్ ప్రేక్షకులను అలరించే అవకాశాలు ఉన్నాయి.

ఐడెంటిటీ ఓటీటీ రిలీజ్ డేట్

ఓటీటీలోకి మలయాళం మర్డర్ మిస్టరీ థ్రిల్లర్ మూవీ ఐడెంటిటీ (Identity) వచ్చేస్తోంది. శుక్రవారం (జనవరి 31) నుంచి జీ5 ఓటీటీలో ఈ మూవీ స్ట్రీమింగ్ కానుంది. మలయాళంతోపాటు తెలుగులోనూ స్ట్రీమింగ్ అవుతున్న ఈ సినిమాను ఇక్కడి ప్రేక్షకులు కూడా ఎంజాయ్ చేయొచ్చు. టొవినో థామస్, త్రిష నటించిన మూవీ ఇది.

ఈ ఏడాది జనవరి 2న రిలీజ్ కాగా.. నెల రోజుల్లోపే ఓటీటీలోకి వస్తోంది. జనవరి 24న తెలుగులోనూ థియేటర్లలో రిలీజైంది. ఈ సినిమాకు ఐఎండీబీలో 9 రేటింగ్ ఉండటం విశేషం. రూ.12 కోట్ల బడ్జెట్ తో తెరకెక్కిన ఈ సినిమా బాక్సాఫీస్ దగ్గర రూ.18 కోట్లు మాత్రమే వసూలు చేసి నిరాశ పరిచింది. అయితే ఇలాంటి థ్రిల్లర్ సినిమాలను బాగా ఎంజాయ్ చేసే ఓటీటీ ప్రేక్షకులు.. ఈ ఐడెంటిటీని ఆదరిస్తారన్న నమ్మకంతో మేకర్స్ ఉన్నారు.

గతేడాది అన్వేషిపిన్ కండెతుమ్ అనే మర్డర్ మిస్టరీ థ్రిల్లర్ చేసిన టొవినో థామస్.. ఈ ఏడాది మొదట్లోనే ఈ ఐడెంటిటీతో వచ్చాడు. ఈ సినిమా ఓ పోలీస్ ఆఫీసర్, ఓ జర్నలిస్ట్, ఓ స్కెచ్ ఆర్టిస్ట్ చుట్టూ తిరుగుతుంది. ఈ ముగ్గురూ కలిసి ఓ మర్డర్ మిస్టరీని ఎలా పరిష్కరిస్తారన్నది ఇందులో చూడొచ్చు.

కాఫీ విత్ ఎ కిల్లర్ ఓటీటీ రిలీజ్ డేట్

ఇక రెండేళ్ల తర్వాత ఓటీటీలోకి వస్తున్న మరో తెలుగు థ్రిల్లర్ మూవీ కాఫీ విత్ ఎ కిల్లర్. ఈ సినిమా కూడా శుక్రవారం (జనవరి 31) నుంచి ఆహా వీడియో ఓటీటీలో స్ట్రీమింగ్ అవుతుంది. ప్రముఖ సంగీత దర్శకుడు ఆర్పీ పట్నాయక్ డైరెక్ట్ చేసిన సినిమా ఇది. ఎప్పుడో రెండున్నరేళ్ల కిందటే షూటింగ్ పూర్తి చేసుకుంది.

ఇదొక కామెడీ థ్రిల్లర్ మూవీ. రవిబాబు, శ్రీనివాస్ రెడ్డిలాంటి వాళ్లు నటించిన ఈ కాఫీ విత్ ఎ కిల్లర్ మూవీ ఓ కెఫేలోనే సాగుతుంది. అక్కడ ఉన్న ఓ కిల్లర్, ఓ పోలీస్ ఆఫీసర్, కొందరు జాతకాలు, సినిమాల పిచ్చి ఉన్న వ్యక్తులు అక్కడ ఉంటారు. వాళ్ల మధ్యే ఈ మూవీ కథ తిరుగుతుంది. అక్కడున్న ఓ వ్యక్తిని అందరూ కమెడియన్ అనుకుంటే అతడో కిల్లర్ అనే తేలుతుంది. తర్వాత ఏం జరిగిందన్నది ఈ మూవీలో చూడొచ్చు.