Best Web Hosting Provider In India 2024
ఈ నెల 5 స్వచ్ఛందంగా త‌ర‌లివ‌చ్చేందుకు విద్యార్ధి సంఘాలు, తల్లిదండ్రులు సిద్ధం
అనంతపురం: కూటమి ప్రభుత్వంలో అన్యాయానికి గురవుతున్న విద్యార్థులకు అండగా ఉండేందుకు ఈనెల 5న (బుధవారం) వైయ‌స్‌ఆర్‌ కాంగ్రెస్‌ పార్టీ ఆధ్వర్యంలో తలపెట్టిన ఫీజు పోరు కార్య‌క్ర‌మానికి అన్ని వ‌ర్గాల నుంచి మద్దతు వెల్లువెత్తుతోంది. సోమ‌వారం అనంతపురం జిల్లాలో అన్ని విద్యార్థి సంఘాలు ఫీజు పోరుకు సంఘీభావం తెలుపుతూ..ఐక్యంగా ఉద్య‌మించేందుకు ముందుకు వ‌చ్చాయి. వైయ‌స్ఆర్‌సీపీ అనంతపురం జిల్లా టాస్క్‌ఫోర్స్‌ సభ్యులు, బీసీ సెల్ రాయలసీమ జోనల్‌ ఇన్‌చార్జ్‌ రమేష్‌ గౌడ్ నేతృత్వంలో ఐక్య విద్యార్థి సంఘాల నాయకుల సమావేశం ఏర్పాటు చేశారు. ఈ సమావేశంలో ఏఐఎస్‌బీ జిల్లా ప్రధాన కార్యదర్శి పాపిరెడ్డిపల్లి ఫృథ్వీ, పీఎస్‌యూ రాష్ట్ర అధ్యక్షులు మంజుల నరేంద్ర, జీవీఎస్‌ఎస్‌ జాతీయ ఉపాధ్యక్షులు మల్లికార్జున నాయక్‌, గిరిజన విద్యార్థి నాయకులు లక్ష్మీపతి నాయక్‌, ఏఐఎస్‌బీ జిల్లా అధ్యక్షులు బిల్లే జగదీష్‌, ఎస్వీఎస్‌ఎఫ్‌ బీసీ చక్రధర్‌ యాదవ్‌, హర్ష, ఎంఎస్‌ఎఫ్‌ రాష్ట్ర అధ్యక్షులు జెన్నే చిరంజీవి, బీసీ ఎస్‌ఎఫ్‌ జిల్లా అధ్యక్షులు కేశవ గౌడ్ తదితరులు హాజరయ్యారు. ఈ సందర్భంగా టాస్క్‌ఫోర్స్‌ సభ్యులు రమేష్‌గౌడ్‌ మాట్లాడుతూ.. కూటమి ప్రభుత్వం రూ.3900 కోట్ల ఫీజు రీఎంబర్స్‌మెంట్‌, వసతి దీవెన బకాయిలను విడుదల చేయాలని డిమాండ్‌ చేస్తూ.. ఈనెల 5న అనంతపురంలోని జెడ్పీ కార్యాలయం వద్ద నుంచి ర్యాలీ ప్రారంభమవుతుందన్నారు. సప్తగిరి సర్కిల్‌, సూర్య నగర్‌ మీదుగా కలెక్టరేట్‌ వరకు చేరుకుని జిల్లా కలెక్టర్‌కు వినతిపత్రం అందివ్వనున్నట్లు తెలిపారు. ప్రభుత్వ పాఠశాలల్లో ఇంగ్లీషు మీడియం విద్యను కూటమి ప్రభుత్వం రద్దు చేసేందుకు ప్రయత్నిస్తోందని ఆవేదన వ్యక్తం చేశారు. ప్రభుత్వ పాఠశాలల్లో ఆంగ్ల మాధ్యమం వద్దంటూ తెలుగు మహాసభల్లో కూటమి నేతలు, మేధావులు అని చెప్పుకునే మాజీ సుప్రీంకోర్టు జడ్జి ఎంవీ రమణ, రామోజీరావు కోడలు శైలజా కిరణ్ తదితరులు మాట్లాడటం ఎంత వరకు సబబు అని ప్రశ్నించారు. కేవలం ఇలాంటి తెలుగు మహాసభల్లో మాత్రమే తెలుగు ముద్దు.. ఇంగ్లీష్‌ వద్దు.. అంటారు కానీ, స్వయానా రామోజీరావు కోడలు శైలజా కిరణ్ నడుపుతున్న రమాదేవి పబ్లిక్ స్కూలులో తెలుగు సబ్జెక్టు లేకుండా జర్మన్, ఫ్రెన్స్, రష్యన్ మొత్తం ఇంగ్లీష్‌లోనే మాట్లాడేలా నడుపుతున్నది నిజం కాదంటారా.. ధనవంతుల పిల్లలు ఇంగ్లీషులో మాట్లాడాలి.. పేద పిల్లలు ఇంగ్లీషులో చదవకూడదా అంటూ రమేష్‌ గౌడ్ ప్రశ్నించారు. కేవలం ఎస్సీ, ఎస్టీ, బీసీ, మైనార్టీ, అగ్రవర్ణాలకు చెందిన పేద పిల్లలు ఇంగ్లీష్‌ మీడియంలో చదువుకోకుండా.. డబ్బున్నటువంటి, మీలాంటి ఇళ్లలో పాచి పనులు చేయాలా.. అంటూ నిలదీశారు. గతంలో చంద్రబాబు ప్రభుత్వం రూ.1780 కోట్ల ఫీజు రీయింబర్స్మెంట్ బకాయిలు పెట్టిపోతే వైఎస్‌ జగన్‌ సీఎం కాగానే ఆ బకాయిలను విడుదల చేసిన విషయాన్ని గుర్తు చేశారు. వైసీపీ ప్రభుత్వ హయాంలో రాష్ట్రవ్యాప్తంగా 37 వేల పైచిలుకు పాఠశాలలను నాడు`నేడు పథకం కింద అభివృద్ధి చేసి.. కార్పొరేట్‌ దీటుగా ఆంగ్ల మాధ్యమాన్ని ప్రవేశపెట్టి పేద విద్యార్థులకు పెద్దపీట వేసిన ఘనత వైఎస్‌ జగన్‌మోహన్‌రెడ్డికే దక్కిందన్నారు. ప్రస్తుతం కూటమి ప్రభుత్వం అధికారంలోకి వచ్చి 8 నెలలు అవుతున్నా ఒక్క రూపాయి కూడా చెల్లించలేదన్నారు. తాజాగా ఫీజులు చెల్లించాలని కళాశాలల యాజమాన్యాలు విద్యార్థులపై ఒత్తిడి తెస్తున్నారని తెలిపారు. లేకపోతే పరీక్షలకు సైతం అనుమతించేది లేదని తేల్చి చెబుతున్నారన్నారు. దీంతో విద్యార్థులు, వారి తల్లిదండ్రులు ఆందోళన చెందుతున్నట్లు చెప్పారు. కొన్ని చోట్ల ఫీజుల ఒత్తిడి తట్టుకోలేక ఆత్మహత్యలు చేసుకుంటున్న పరిస్థితి నెలకొందని ఆవేదన వ్యక్తం చేశారు. ఇలాంటి తరుణంలోనే విద్యార్థులకు అండగా వైఎస్‌ఆర్‌ సీపీ ఆధ్వర్యంలో ‘ఫీజు పోరు’ నిర్వహించనున్నట్లు చెప్పారు. జిల్లా వ్యాప్తంగా ఉన్న విద్యార్థులు, వారి తల్లిదండ్రులు, స్వచ్ఛందంగా తరలిరావాలని కోరారు. సమావేశంలో వైసీపీ నాయకులు బెస్త వెంకటేష్, చంద్ర, నరసింహులు, నాగేంద్ర, వైసీపీ ఎస్సీ సెల్ జిల్లా ఉపాధ్యక్షులు లబ్బె రాఘవ, వంశీ, మోహన్, గణేష్, మారుతి, బాలాజీ, వినీత్, రోహిత్ కుమార్, చిన్న, హరీష్, మణికంఠ, విద్యార్థి విభాగం నగర అధ్యక్షులు కైలాష్‌, వైసీపీ నాయకులు, విద్యార్థి నాయకులు తదితరులు పాల్గొన్నారు.
వైయ‌స్ఆర్‌సీపీ ఫీజు పోరుకు మద్దతిస్తున్నాం : పాపిరెడ్డిపల్లి ఫృథ్వీ, జిల్లా ప్రధాన కార్యదర్శి, ఏఐఎస్‌బీ
వైయ‌స్ఆర్‌సీపీ ఫీజు పోరుకు తమ బ్లాక్‌ మద్దతు తెలుపుతోందని ఏఐఎస్‌బీ జిల్లా ప్రధాన కార్యదర్శి పాపిరెడ్డిపల్లి ఫృథ్వీ తెలిపారు. పెండిరగ్‌లో ఉన్న ఫీజు రీఎంబర్స్‌మెంట్‌, వసతి దీవెన వెంటనే విడుదల చేయాలని డిమాండ్‌ చేశారు. నారా లోకేశ్‌ యువగళంలో తాము అధికారంలోకి వస్తే.. విద్యార్థుల సమస్యలన్నీ పరిష్కరిస్తామని హామీనిచ్చి.. అధికారంలోకి వచ్చిన తర్వాత ఎందుకు ఆ హామీలు నెరవేర్చలేదని ప్రశ్నించారు. ఫీజు రీఎంబర్స్‌మెంట్‌, వసతి దీవెన విడుదల చేయకపోవడంతో పేద విద్యార్థులు విద్యకు దూరమయ్యే పరిస్థితులు ఏర్పడుతున్నాయని వాపోయారు. ఈ క్రమంలో వైసీపీ చేపట్టబోయే ఫీజు పోరుకు తాము సంపూర్ణ మద్దతు తెలుపుతున్నట్లు చెప్పారు.
ఇచ్చిన హామీలు నెరవేర్చాలి : జెన్నే చిరంజీవి, రాష్ట్ర అధ్యక్షులు, ఎంఎస్‌ఎఫ్‌
నారా లోకేశ్‌ యువగళం పేరుతో పాదయాత్ర చేస్తున్న సమయంలో విద్యార్థుల సమస్యలు పరిష్కరిస్తామని, ఫీజు రీఎంబర్స్‌మెంట్‌, వసతి దీవెన కల్పిస్తామని హామీనిచ్చారని, ప్రస్తుతం కూటమి ప్రభుత్వంలో విద్యాశాఖ మంత్రిగా నారా లోకేష్‌ ఉన్నారని, ఆయన ఇచ్చిన హామీలను వెంటనే నెరవేర్చాలని ఎంఎస్‌ఎఫ్‌ రాష్ట్ర అధ్యక్షులు జెన్నే చిరంజీవి డిమాండ్‌ చేశారు. ప్రస్తుతం విద్యార్థులకు ఫీజు రీఎంబర్స్‌మెంట్‌, వసతి దీవెన బకాయిలు పెండిరగ్‌లో ఉండటం వల్ల తీవ్ర ఇబ్బందులు ఎదుర్కొంటున్నారని, విద్యకు దూరం కావాల్సిన దుస్థితి వచ్చిందని ఆవేదన వ్యక్తం చేశారు. విద్యార్థుల కోసం వైయ‌స్ఆర్‌సీపీ తలపెట్టిన ఫీజు పోరుకు మద్దతు తెలుపుతూ.. రాష్ట్రవ్యాప్తంగా ఎంఎస్‌ఎఫ్‌ నాయకులు, విద్యార్థుల తల్లిదండ్రులు పాల్గొనాలని పిలుపునిచ్చారు.
బీసీ హాస్టళ్లలో వసతులు కల్పించాలి : కేశవ, జిల్లా అధ్యక్షులు, బీసీ విద్యార్థి సంఘం
జిల్లాలో బీసీ వసతి గృహాలతోపాటు ఎస్సీ, ఎస్టీ, మైనార్టీ, ఉర్దూ వసతి గృహాల్లో కూడా మౌలిక సదుపాయాలు లేక విద్యార్థులు తీవ్ర ఇబ్బందులు పడుతున్నారని బీసీ విద్యార్థి సంఘం జిల్లా అధ్యక్షులు కేశవ పేర్కొన్నారు. అంతేకాకుండా ఫీజు రీఎంబర్స్‌మెంట్‌ బకాయిలు విడుదల చేయకపోవడంతో విద్యార్థులు అవస్థలు పడుతున్నారని, విద్యార్థుల తల్లిదండ్రులు ఆందోళనకు గురికావాల్సి వస్తోందన్నారు. వెంటనే కూటమి ప్రభుత్వం ఫీజు రీఎంబర్స్‌మెంట్‌ విడుదల చేయాలని డిమాండ్‌ చేశారు. వైయ‌స్ఆర్‌సీపీ నిర్వహించనున్న ఫీజు పోరుకు బీసీ విద్యార్థి సంఘం పూర్తి మద్దతు తెలుపుతోందని కేశవ తెలిపారు.
విద్యార్థుల సమస్యలు పరిష్కరించాలి : చంద్రశేఖర్‌ యాదవ్‌, జిల్లా అధ్యక్షులు, వైయ‌స్‌ఆర్‌ ఎస్‌యూ
అధికారంలోకి రాగానే ఫీజు రీయింబర్స్మెంట్ నిధులు విడుదల చేస్తామని హామీ ఇచ్చి.. అధికారంలోకి వచ్చాక విస్మరించారని వైయ‌స్‌ఆర్‌ విద్యార్థి విభాగం జిల్లా అధ్యక్షులు చంద్రశేఖర్‌ యాదవ్‌ ఆరోపించారు. విద్యార్థుల పట్ల కూటమి ప్రభుత్వ అనైతిక వైఖరిని ఖండిస్తూ.. వైఎస్‌ఆర్సీపీ అధినేత జగన్మోహన్‌ రెడ్డి ఆందోళనకు పిలుపునిచ్చినట్టు పేర్కొన్నారు. ప్రభుత్వ పాఠశాలల్లో ఇంగ్లీషు మీడియం విద్యను కూటమి ప్రభుత్వం రద్దు చేసేందుకు ప్రయత్నిస్తోందని ఆవేదన వ్యక్తం చేశారు. వైయ‌స్ఆర్‌సీపీ చేపట్టిన ఫీజు పోరు కార్యక్రమాన్ని విజయవంతం చేయాలని కోరారు.
ఫీజు బకాయిలు విడుదల చేయాలి : మల్లికార్జున నాయక్‌, జాతీయ ఉపాధ్యక్షులు, గిరిజన విద్యార్థి సంక్షేమ సంఘం
విద్యార్థుల ఫీజు బకాయిలను కూటమి ప్రభుత్వం వెంటనే విడుదల చేయాలని గిరిజన విద్యార్థి సంక్షేమ సంఘం జాతీయ ఉపాధ్యక్షులు మల్లికార్జున నాయక్‌ డిమాండ్‌ చేశారు. 5న వైయ‌స్ఆర్‌సీపీ ఆధ్వర్యంలో చేపట్టబోయే ఫీజు పోరుకు తాము సంపూర్ణ మద్దతు ఇస్తున్నామన్నారు. అలాగే రాష్ట్రవ్యాప్తంగా ఉన్న గిరిజన విద్యార్థులు పెద్ద ఎత్తున ఈ కార్యక్రమంలో పాల్గొని జయప్రదం చేయాలని పిలుపునిచ్చారు.
ఫీజు పోరుకు మద్దతిస్తున్నాం: మంజుల నరేంద్ర, పీఎస్‌యూ రాష్ట్ర అధ్యక్షులు
వైయ‌స్‌ఆర్‌ కాంగ్రెస్‌ పార్టీ ఆధ్వర్యంలో ఈనెల 5వ తేదీన నిర్వహించ తలపెట్టిన ఫీజు పోరుకు పీఎస్‌యూ పూర్తి మద్దతు ఇస్తున్నట్లు రాష్ట్ర అధ్యక్షులు మంజుల నరేంద్ర తెలిపారు. విద్యార్థుల సమస్యలు పరిష్కరించాలన్నారు. వెంటనే ఫీజు రీఎంబర్స్‌మెంట్‌, వసతి దీవెన బకాయిలు విడుదల చేయాలని కూటమి ప్రభుత్వాన్ని డిమాండ్‌ చేశారు.
