Mangalagiri AIIMS Jobs : మంగ‌ళ‌గిరి ఎయిమ్స్‌లో 39 న‌ర్సింగ్ ఆఫీస‌ర్ పోస్టులు భ‌ర్తీ చేసేందుకు నోటిఫికేష‌న్ విడుద‌ల అయింది. ద‌ర‌ఖాస్తు దాఖ‌లు చేసేందుకు మార్చి 17న ఆఖ‌రు తేదీగా నిర్ణయించారు. ఆస‌క్తి, అర్హత ఉన్న అభ్యర్థులు వెంట‌నే ద‌ర‌ఖాస్తు చేసుకోవాల‌ని కోరుతుంది. ద‌ర‌ఖాస్తును ఆన్‌లైన్‌లో చేసుకోవాల్సి ఉంటుంది.

ఈ పోస్టుల‌కు సంబంధించిన నోటిఫికేష‌న్‌ను ఎయిమ్స్, న్యూదిల్లీ నోటిఫికేష‌న్ విడుద‌ల చేసింది. ఎయిమ్స్ మంగ‌ళ‌గిరితో పాటు దేశంలోని 18 ఎయిమ్స్‌కు, ఆరు హాస్పటిల్స్‌కు నోటిఫికేష‌న్ విడుద‌ల అయింది. మొత్తం 1,794 న‌ర్సింగ్ ఆఫీస‌ర్ పోస్టుల‌ను భ‌ర్తీ చేస్తున్నారు. ఈ పోస్టుల భ‌ర్తీకి న‌ర్సింగ్ ఆఫీసర్ రిక్రూట్‌మెంట్ కామన్ ఎలిజిబిలిటీ టెస్ట్ (ఎన్‌వోఆర్‌సీఈటీ)ని నిర్వహిస్తారు.

మంగ‌ళ‌గిరి ఎయిమ్స్‌లో కేట‌గిరీల వారీగా పోస్టులు

మంగ‌ళగిరి ఎయిమ్స్‌లో మొత్తం 39 పోస్టులను భ‌ర్తీ చేస్తున్నారు.అందులో 15 పోస్టులు జ‌న‌ర‌ల్ కేట‌గిరీ (మ‌హిళ‌లు-4, పురుషులు-1, దివ్యాంగు మ‌హిళ‌లు-8, దివ్యాంగు పురుషులు-2), 9 పోస్టులు బీసీ కేట‌గిరీ (మ‌హిళ‌లు-5, పురుషులు-2, దివ్యాంగు మ‌హిళ‌లు-2), 9 పోస్టులు ఎస్సీ కేట‌గిరీ (మ‌హిళ‌లు-4, పురుషులు-2, దివ్యాంగు మ‌హిళ‌లు-3), 3 పోస్టులు ఎస్టీ కేట‌గిరీ (మ‌హిళ‌-1, పురుషులు-1, దివ్యాంగు మ‌హిళ‌-1), 3 పోస్టులు ఈడ‌బ్ల్యూఎస్ కేట‌గిరీ (పురుషులు-1, దివ్యాంగు మ‌హిళ‌-2) భ‌ర్తీ చేస్తున్నారు.

అర్హత‌లు

1. బీఎస్సీ (ఆన‌ర్స్) న‌ర్సింగ్‌/ బీఎస్సీ న‌ర్సింగ్ లేదా బీఎస్సీ (పోస్ట్ స‌ర్టిఫికేష‌న్‌)/ పోస్టు బేసిక్ బీఎస్సీ న‌ర్సింగ్

2. జ‌న‌ర‌ల్ న‌ర్సింగ్‌లో డిప్లొమా

3. స్టేట్/ ఇండియ‌న్ న‌ర్సింగ్ కౌన్సిల్‌లో రిజిస్ట్రేష‌న్ ఉండాలి.

4. క‌నీసం 50 బెడ్ల ఆసుప‌త్రిలో రెండేళ్ల అనుభ‌వం ఉండాలి.

వ‌యో ప‌రిమితి

వ‌యో ప‌రిమితి 18 నుంచి 30 ఏళ్ల మ‌ధ్య‌ ఉండాలి. 2025 మార్చి 17 నాటికి వ‌య‌స్సును లెక్కిస్తారు. వ‌య‌స్సు స‌డ‌లింపు ఎస్సీ, ఎస్టీ అభ్యర్థుల‌కు ఐదేళ్లు, ఓబీసీ అభ్యర్థుల‌కు మూడేళ్లు, దివ్యాంగు అభ్యర్థుల‌కు ప‌దేళ్లు, దివ్యాంగు ఓబీసీ అభ్యర్థుల‌కు 13 ఏళ్లు, దివ్యాంగు ఎస్సీ, ఎస్టీ అభ్యర్థుల‌కు 15 ఏళ్లు, మాజీ సైనికోద్యుగుల పిల్లల‌కు మూడేళ్లు స‌డ‌లింపు ఉంటుంది.

అప్లికేష‌న్ ఫీజు

1. జ‌న‌ర‌ల్/ ఓబీసీ అభ్యర్థుల‌కు రూ.3,000

2. ఎస్సీ/ ఎస్టీ/ ఈడ‌బ్ల్యూఎస్‌కు రూ.2,400

3. దివ్యాంగు అభ్యర్థుల‌కు ఎటువంటి అప్లికేష‌న్ ఫీజుల లేదు.

వేత‌నం

అన్ని ర‌కాల అల‌వెన్సులు క‌లుపుకుని నెల‌వారీ వేత‌నం రూ.70,000 వ‌ర‌కు ఉంటుంది.

ముఖ్యమైన తేదీలు

1. ద‌ర‌ఖాస్తు దాఖ‌లు చేసేందుకు గ‌డువుః మార్చి 17 (సాయంత్రం 5 గంట‌ల లోపు)

2. ఎగ్జామ్‌కు హాజ‌ర‌య్యేందుకు ద‌ర‌ఖాస్తు ఆమోదించే స్టేట‌స్ తెలుసుకునేందుకు : మార్చి 25

3. రిజిస్ట్రేషన్ స్టేట‌స్‌, తిరస్కరించిన ఇమేజ‌స్‌/ఇతర లోపాల దిద్దుబాటు చివరి తేదీః ఏప్రిల్ 1 (సాయంత్రం 5 గంట‌ల లోపు)

4. ఆన్‌లైన్ ఎగ్జామ్ స్టేజ్‌- I : ఏప్రిల్ 12 (శ‌నివారం)

5. ఎగ్జామ్ స్టేజ్‌- II : మే 2 (శుక్ర‌వారం)

అప్లికేష‌న్ ఎలా దాఖ‌లు చేయాలి?

దర‌ఖాస్తును ఆన్‌లైన్‌లో చేయాలి. తొలిత అధికారిక వెబ్‌సైట్ డైరెక్ట్ లింక్ https://rrp.aiimsexams.ac.in/auth/registration ను క్లిక్ చేసి రిజిస్ట్రేష‌న్ చేసుకోవ‌చ్చు. అందులో పేరు, ఫోన్ నెంబ‌ర్‌, ఈమెయిల్ ఐడీ, ఆధార్ నెంబ‌ర్ ఎంట‌ర్ చేయాల్సి ఉంటుంది. అందులోనే పాస్‌వ‌ర్డ్‌ను క్రియేట్ కూడా ఉంటుంది. ఈ అధికారిక వెబ్‌సైట్ డైరెక్ట్ లింక్‌ https://rrp.aiimsexams.ac.in/auth/login ను క్లిక్ చేసి లాగిన్ అవ్వొచ్చు. ఈ ర‌కంగా ద‌ర‌ఖాస్తును మార్చి 17 సాయంత్రం 5 గంట‌ల్లోపు చేసుకోవ‌ల్సి ఉంటుంది.

రిపోర్టింగ్ : దీశ్వర‌రావు జ‌ర‌జాపు, హిందుస్తాన్ టైమ్స్ తెలుగు