Malhar certificate: మహారాష్ట్రలోని హిందూ మాంసం వ్యాపారులకు ప్రత్యేక గుర్తింపును ఇచ్చేలా ‘మల్హర్ సర్టిఫికేషన్’ను మహారాష్ట్ర ప్రభుత్వం ప్రవేశపెట్టింది. ‘‘ఇది 100 శాతం హిందూ సమాజం నడుపుతున్న సరైన మటన్ దుకాణాలను గుర్తించడానికి, కల్తీ లేకుండా చూడటానికి సహాయపడుతుంది’’ అని ఈ సందర్భంగా మత్స్య, ఓడరేవు అభివృద్ధి శాఖ మంత్రి నితీశ్ రాణే అన్నారు. ‘‘మహారాష్ట్రలోని హిందూ సమాజం కోసం ఈ రోజు మేము చాలా ముఖ్యమైన అడుగు వేశాం. ఈ సందర్భంగా Malharcertfication.com లాంచ్ చేశాం’ అని రాణే ఎక్స్ (గతంలో ట్విట్టర్)లో రాశారు. ఈ కార్యక్రమం వల్ల సమాజంలోని హిందు యువత ఆర్థికంగా బలోపేతం అవుతారన్నారు.

అంతా హిందువులే

మల్హర్ సర్టిఫికేషన్ 100% హిందువులు నడుపుతున్న మటన్ షాపులకు మాత్రమే ఇస్తామని ప్రభుత్వం తెలిపింది. ‘‘ఇక్కడ యాజమాన్యం, వర్కర్లు 100 శాతం హిందువులే ఉంటారు. అమ్మే వ్యక్తి కూడా హిందువే ఉంటాడు. మటన్ లో ఎక్కడా కల్తీ ఉండదు’ అని రాణే తెలిపారు. ప్రజలు సర్టిఫైడ్ షాపుల నుండి మాత్రమే మటన్ కొనుగోలు చేయాలని, ధృవీకరణ లేని షాపుల్లో కొనుగోలు చేయవద్దని ఆయన సూచించారు.

హిందూ యువతకు ఉపాధి

సాధ్యమైనంత వరకు మల్హర్ సర్టిఫికేషన్ ను ఉపయోగించాలని ఆయన సూచించారు. ‘‘మల్హర్ సర్టిఫికెట్ లేని షాపుల నుండి మటన్ కొనుగోలు చేయవద్దని నేను మీకు విజ్ఞప్తి చేస్తున్నాను. ఈ ప్రయత్నాలు ఖచ్చితంగా హిందూ సమాజంలోని యువతను ఆర్థికంగా బలోపేతం చేస్తాయి” అని రాణే పేర్కొన్నారు.

హలాల్ ఉండదు..

‘‘మల్హర్ సర్టిఫికేషన్ మాంసం వ్యాపారం చేసే హిందువులను ఒకే వేదిక కిందకు తీసుకురావడానికి ప్రయత్నిస్తుంది. అదే సమయంలో హిందువులు మరియు సిక్కులకు హలాల్ కాని మాంసం లభించే చూస్తుంది. ఝట్కా మాంసం ఉత్పత్తిలో హిందువులు మాత్రమే పాల్గొంటారని. ఆచారపరమైన వధను తొలగిస్తాం’’ అని రాణే చెప్పారు.

మల్హర్ సర్టిఫికేషన్ అంటే..

మల్హర్ సర్టిఫికేషన్ వెబ్సైట్ ప్రకారం, మల్హర్-సర్టిఫైడ్ మాంసం “తాజాది, శుభ్రమైనది, లాలాజలం కలుషితం లేనిది” మరియు ఇతర జంతు మాంసంతో కలపబడనిది. ఈ సర్టిఫికేషన్ కింద హిందూ ఖతిక్ కమ్యూనిటీకి చెందిన విక్రేతలకు మాత్రమే మాంసం విక్రయించే అధికారం ఉందని పేర్కొంది. ఇటీవలి కాలంలో హలాల్ కాని మాంసం ఉత్పత్తులకు డిమాండ్ పెరుగుతోంది. గత ఏడాది నవంబరులో ఎయిరిండియా హిందూ, సిక్కు ప్రయాణీకులకు నాన్ హలాల్ భోజనం అందించాలని నిర్ణయించింది.