Zee Telugu Special: వారం వారం సరికొత్త సినిమాలు ప్రత్యేక కార్యక్రమాలతో అలరించే జీ తెలుగు ఈ ఆదివారం (మార్చి 16) అదిరిపోయే లైనప్​తో వచ్చేస్తోంది. ఎవర్ గ్రీన్ బ్లాక్ బస్టర్ మూవీ సీతమ్మ వాకిట్లో సిరిమల్లె చెట్టు ఉదయం 9 గంటలకు టీవీ ప్రీమియర్ కానుంది.

విక్టరీ వెంకటేష్​, సూపర్​స్టార్​ మహేశ్ బాబు కలిసి నటించిన సీతమ్మ వాకిట్లో సిరిమల్లె చెట్టు సినిమా 2013లో విడుదలై మెగా బ్లాక్ బస్టర్ హిట్‌గా నిలిచిన విషయం తెలిసిందే. శ్రీకాంత్ అడ్డాల దర్శకత్వంలో ఈ సినిమాని దిల్ రాజు నిర్మించగా, మిక్కీ జే మేయర్ సంగీతం అందించారు. సమంత, అంజలి, ప్రకాష్ రాజ్, జయసుధ తదితరులు ముఖ్యపాత్రలు పోషించిన ఈ సినిమా ఆల్​టైమ్​ ఫ్యామిలీ ఎంటర్​టైనర్​గా రికార్డులు సృష్టించింది.

మరోసారి జీ తెలుగులో

రీ రిలీజ్ ట్రెండ్‌ను ఫాలో అవుతూ మార్చి 8న మరోసారి థియేటర్లలోకి వచ్చిన ఈ సినిమాకు తెలుగు ప్రేక్షకుల నుంచి మంచి స్పందన దక్కించుకుంది. ఇప్పుడు ఈ ఆదివారం (మార్చి 16) ఉదయం 9 గంటలకు జీ తెలుగులో మరోసారి సీతమ్మ వాకిట్లో సిరిమల్లె చెట్టు ప్రసారం కానుంది.

ఈ సినిమాతోపాటు హోలీ స్పెషల్ మెగా ఈవెంట్ అక్కడ అమ్మాయిలు-ఇక్కడ అబ్బాయిలు మధ్యాహ్నం 12:30 గంటలకు, మధ్యాహ్నం 3 గంటలకు డియర్ బ్రదర్ టెలివిజన్​ ప్రీమియర్​ను అందించేందుకు సిద్ధమైంది జీ తెలుగు ఛానెల్. హోలీ వేడుకల్లో భాగంగా జీ తెలుగు మార్చి 9న నరసరావు పేటలో అక్కడ అమ్మాయిలు-ఇక్కడ అబ్బాయిలు పేరున మెగా ఈవెంట్​ నిర్వహించింది.

కాలేజీ గ్రౌండ్‌లో

నరసరావుపేటలోని ఎస్ఎస్ఎన్ కాలేజీ క్రికెట్ గ్రౌండ్‌లో అభిమానుల కోలాహంతో ఘనంగా జరిగిన ఈ ఈవెంట్​ ఈ ఆదివారం ప్రసారం కానుంది. ఈ కార్యక్రమానికి ఎనర్జిటిక్ యాంకర్ రవి వ్యాఖ్యాతగా వ్యవహరించగా దీప్తి మన్నె-దర్శ చంద్రప్ప, ప్రీతి శర్మ-పృథ్వీలతో పాటు ఇతర జీ తెలుగు నటీనటులు హాజరై సందడి చేశారు.

అలాగే, మ్యాడ్ స్క్వేర్ సినిమా హీరోలు నార్నే నితిన్, సంగీత శోభన్, రామ్ నితిన్​తోపాటు అక్కడ అమ్మాయి‌‌ ఇక్కడ అబ్బాయి హీరో హీరోయిన్​ ప్రదీప్ మాచిరాజు, దీపికా పిల్లి ఈ వేడుకలో పాల్గొన్నారు. కమెడియన్ సద్దాం, సింగర్​ యశస్వి ప్రేక్షకులను అలరించారు. రంగులు, సంగీతం, ఆనందంతో నిండిన ఈ వేడుక అభిమానులకు తమ అభిమాన తారలను కలిసే అవకాశం అందించింది.

డియర్ బ్రదర్ టీవీ ప్రీమియర్

అంతేకాకుండా జయం రవి, ప్రియాంక అరుల్ మోహన్​ జంటగా నటించిన డియర్ బ్రదర్ సినిమాను ​టెలివిజన్​ ప్రీమియర్​గా అందిస్తోంది జీ తెలుగు. కుటుంబ కథాచిత్రంగా రూపొందిన ఈ సినిమాలో భూమిక చావ్లా, రావు రమేష్, నటరాజన్ సుబ్రమణ్యం, విటివి గణేష్ తదితరులు ముఖ్యపాత్రల్లో నటించారు.

ఎం.రాజేష్ దర్శకత్వంలో స్క్రీన్ సీన్ మీడియా ఎంటర్‌టైన్ మెంట్ ప్రైవేట్ లిమిటెడ్ నిర్మించిన ఈ సినిమాకు హారిస్ జయరాజ్ సంగీతం అందించారు. ఇలా రెండు సినిమాలు, హోలీ స్పెషల్ మెగా ఈవెంట్‌తో జీ తెలుగు ట్రిపుల్ బొనాంజా వినోదం అందించనుంది.