తమిళ సూపర్ స్టార్ రజినీకాంత్ హీరోగా నటిస్తున్న కూలీ మూవీపై క్రేజ్ విపరీతంగా ఉంది. యాక్షన్ చిత్రాలతో వరుస బ్లాక్‍బస్టర్లు కొడుతున్న లోకేశ్ కనగరాజ్ ఈ చిత్రానికి దర్శకత్వం వహిస్తుండటంతో అంచనాలు మరింత భారీగా ఉన్నాయి. తెలుగు స్టార్ హీరో కింగ్ నాగార్జున కూడా ఈ మూవీలో ఓ కీలకపాత్ర పోషిస్తున్నారు. ఇంత హైప్ ఉన్న ఈ కూలీ మూవీకి ఓటీటీ డీల్ భారీగా జరిగినట్టు తాజాగా సమాచారం బయటికి వచ్చింది.

ఓటీటీ హక్కుల ధర ఇదే..

కూలీ సినిమా డిజిటల్ స్ట్రీమింగ్ హక్కులను అమెజాన్ ప్రైమ్ వీడియో ఓటీటీ ప్లాట్‍ఫామ్ దక్కించుకుందనే సమాచారం బయటికి వచ్చింది. ఈ మూవీ హక్కులు ఏకంగా రూ.120కోట్ల భారీ ధరకు అమ్ముడైనట్టు తెలుస్తోంది. చాలా క్రేజ్ ఉండటంతో ఈ కూలీ చిత్రానికి ఆ రేంజ్‍లో ఇచ్చేందుకు ప్రైమ్ వీడియో ముందుకు వచ్చింది.

గోల్డ్ స్మగ్లింగ్ మాఫియా చుట్టూ..

కూలీ చిత్రం నుంచి గతంలోనే ఓ టీజర్ వచ్చింది. ఈ సినిమా గోల్డ్ స్మగ్లింగ్ మాఫియా చుట్టూ సాగుతుందని ఆ టీజర్‌తోనే అర్థమైంది. గోల్డ్ హైలైట్ చేస్తూ ఈ టీజర్ సాగింది. లోకేశ్ కనగరాజ్ మార్క్ యాక్షన్ చిత్రంగానే ఉండనుంది. అయితే, లోకేశ్ కనగరాజ్ సినిమాటిక్ యూనివర్స్ (ఎల్‍సీయూ)లో ఈ చిత్రం భాగం కాదు.

కూలీ సినిమా చిత్రీకరణ ప్రస్తుతం జోరుగా సాగుతోంది. ఈ చిత్రంలో రజినీకాంత్, నాగార్జునతో పాటు కన్నడ స్టార్ ఉపేంద్ర, సౌబిన్ షాహిర్, శృతి హాసన్, సత్యరాజ్, రెబ్బా మోనిక జాన్ కీలకపాత్రలు పోషిస్తున్నారు. ఈ చిత్రంలో సైమన్ అనే పవర్ ఫుల్ రోల్ చేస్తున్నారు నాగ్. దీంతో తెలుగు ప్రేక్షకుల్లోనూ ఈ చిత్రంపై మంచి ఆసక్తి నెలకొని ఉంది.

కూలీ చిత్రం చిత్రం భారీ బడ్జెట్‍తో రూపొందుతోందని తెలుస్తోంది. సుమారు రూ.300కోట్ల బడ్జెట్ అవుతుందనే అంచనాలు ఉన్నాయి. ఈ చిత్రాన్ని సన్‍ పిక్చర్స్ పతాకంపై కళానిధి మారన్ ప్రొడ్యూజ్ చేస్తున్నారు. అనిరుధ్ రవిచందర్ సంగీతం అందిస్తున్నారు. ఈ చిత్రం ఈ ఏడాదిలోనే విడుదల కానుంది. ఆగస్టు కోసం ప్లాన్ చేస్తున్నట్టు టాక్ ఉంది. త్వరలోనే విడుదల తేదీ వెల్లడించే అవకాశం ఉంది.

పూజా హెగ్డే స్పెషల్ సాంగ్

కూలీ సినిమాలో బాలీవుడ్ స్టార్ హీరో ఆమిర్ ఖాన్ ఓ క్యామియో రోల్ చేస్తున్నారు. ఇటీవలే షూటింగ్‍లో పాల్గొన్నారు. స్టార్ హీరోయిన్ పూజా హెగ్డే ఈ చిత్రంలో ఓ స్పెషల్ సాంగ్‍లో చిందేయనున్నారు. ఈ విషయాన్ని ఇటీవలే మూవీ టీమ్ కన్ఫర్మ్ చేసింది.