అంతర్జాతీయ అంతరిక్ష కేంద్రం (ఐఎస్ఎస్)లో తొమ్మిది నెలలకు పైగా చిక్కుకుపోయిన అమెరికా వ్యోమగాములు సునితా విలియమ్స్​, బుచ్​ విల్మోర్​లు తిరిగి భూమి మీదకు రావడంపై నేషనల్ ఏరోనాటిక్స్ అండ్ స్పేస్ అడ్మినిస్ట్రేషన్ (నాసా) బిగ్​ అప్డేట్​ ఇచ్చింది! ఇద్దరు వ్యోమగాములు స్థానిక కాలమానం ప్రకారం మంగళవారం సాయంత్రం 5 గంటల 57 నిమిషాలకు ఫ్లోరిడా తీరం వద్ద దిగనున్నారు. ఇది భారత కాలమానం ప్రకారం బుధవారం అవుతుంది.

ఆదివారం తెల్లవారుజామున ఐఎస్ఎస్​కి చేరుకున్న స్పేస్ఎక్స్ క్రూ డ్రాగన్ క్రాఫ్ట్​లో మరో అమెరికన్ వ్యోమగామి, రష్యా వ్యోమగామితో కలిసి బుచ్ విల్మోర్, సునీతా విలియమ్స్​ స్వదేశానికి తిరిగిరానున్నారు.

భూమి మీదకు సునితా విలియమ్స్​..

గత ఏడాది జూన్ నుంచి సునితా విలియమ్స్​, బుచ్​ విల్మోర్​ ఐఎస్​ఎస్​లో ఉన్న విషయం తెలిసిందే. బోయింగ్ స్టార్​లైనర్​ని పరీక్షించిన తొలి వ్యోమగాములుగా విల్మోర్, విలియమ్స్ జూన్​లో అంతర్జాతీయ అంతరిక్ష కేంద్రానికి వెళ్లారు. అయితే, ప్రొపల్షన్ సిస్టమ్ పనిచేయకపోవడం వల్ల వారు స్పేస్​క్రాఫ్ట్​లో తిరిగి రావడం చాలా ప్రమాదకరంగా మారింది. అందుకే ఐఎస్​ఎస్​లో ఉండిపోయారు. వారిని అంతరిక్షంలోకి తీసుకెళ్లిన బోయింగ్​కు చెందిన స్టార్​లైనర్ క్యాప్సూల్ గత ఏడాదే భూమికి తిరిగి వచ్చింది. దీనికి బదులుగా స్పేస్​ఎక్స్ క్యాప్సూల్​లో వారిని భూమి మీదకు రప్పించాలని నాసా నిర్ణయించింది.

ఈ మేరకు ఫ్లోరిడాలోని కెన్నడీ స్పేస్ సెంటర్ నుంచి స్థానిక కాలమానం ప్రకారం రాత్రి మార్చ్ 14 రాత్రి​ 7.03 గంటలకు క్రూ-10 మిషన్​లో భాగంగా ఫాల్కన్ 9 రాకెట్ నలుగురు సభ్యుల బృందంతో నింగిలోకి ఎగిరింది. ఆ తర్వాతి రోజు అది ఐఎస్​ఎస్​కు చేరింది.

వాస్తవానికి మార్చ్​ 19 తర్వాతే సునితా విలియమ్స్​ భూమి మీదకు తిరిగి వస్తారని గతంలో నాసా చెప్పింది. కానీ ఇప్పుడు వారి రాకను ముందుకు జరిపింది. ఫలితంగా ఫ్లోరిడా తీరం వద్ద ఉన్న నీటిలో ఇద్దరు వ్యోమగాములు మంగళవారం సాయంత్రం స్ల్పాష్​డౌన్​ అవుతారు.

ఇప్పటివరకు ఐఎస్​ఎస్​లో ఉన్న వ్యోమగాములు.. కొత్తగా వచ్చిన వారికి బాధ్యతలు అప్పగించి, భూమి మీదకు వస్తారు.

“సునితా విలియమ్స్​ తిరుగు ప్రయాణాన్ని అప్డేట్​ చేశాము. అయినప్పటికీ ఐఎస్​ఎస్​ బాధ్యతల అప్పగింత సజావుగా సాగుతుంది. అదే సమయంలో వారం చివరిలో కనిపిస్తున్న ప్రతికూల వాతావరణానికి ముందే వ్యోమగాములు తిరిగి భూమి మీదకు రావడానికి ఈ డేట్​ ఉపయోగపడుతుంది,” అని నాసా వెల్లడించింది.

లైవ్ కవరేజ్ చూపించనున్న నాసా..

ఐఎస్ఎస్ నుంచి స్పేస్​ఎక్స్ క్రూ-9 భూమికి తిరిగి రావడం ప్రత్యక్ష కవరేజీని అందిస్తామని నాసా ఒక ప్రకటనలో తెలిపింది. మార్చ్​ 17, సోమవారం రాత్రి 10:45 గంటలకు డ్రాగన్ స్పేస్​క్రాఫ్ట్ హ్యాచ్​ క్లోజర్​ సన్నాహాలతో ఇది ప్రారంభమవుతుంది (భారతదేశంలో మార్చి 18 ఉదయం 8:30 గంటలకు).

సునితా విలియమ్స్​, బుచ్​ విల్మోర్​ రాక కోసం యావత్​ ప్రపంచం ఎంతో ఆసక్తిగా ఎదురుచూస్తోంది.