‘రాత్రికి రాత్రే కోటీశ్వరులం అయిపోతే ఎంత బాగుంటుంది?’ అని మనలో చాలా మంది కలలు కంటూ ఉంటారు. కానీ అలా అవ్వాలంటే ఊహకు మించిన అద్భుతం జరగాలి. అదృష్టం కలిసిరావాలి. చిలీకి చెందిన ఓ వ్యక్తి జీవితంలో ఇదే జరిగింది! మరణించిన తండ్రికి సంబంధించిన ఒక బ్యాంక్​ పాస్​ బుక్​.. ఆ వ్యక్తిని రాత్రికి రాత్రే ధనవంతుడిని చేసేసింది. ఇంతకి ఏం జరిగిందంటే..

అసలేం జరిగింది..?

ఇది చిలీకి చెందిన ఎక్సిక్వియల్​ హినోజోసా అనే వ్యక్తి కథ. తన తండ్రి మరణించిన పదేళ్ల తర్వాత.. ఓసారి అయన వస్తువులను సర్దటం మొదలుపెట్టాడు ఎక్సిక్వియల్​. అప్పుడే, తన తండ్రికి చెందిన 6 దశాబ్దాల క్రితం నాటి పాత బ్యాంక్​ పాస్​ బుక్​ అతనికి దొరికింది. అది అతని అదృష్టాన్ని శాశ్వతంగా మార్చేసింది.

1960-70లో ఎక్సిక్వియల్​ తండ్రి ఒక ఇల్లు కొనడానికి డబ్బు పొదుపు చేశాడు. పాస్​ బుక్​ ప్రకారం ఎక్సిక్వియల్​ తండ్రి రూ. 1.4లక్షల వరకు పొదుపు చేశాడు. దాన్ని ఆయన ఎప్పుడూ వాడలేదు.

6 దశాబ్దాల వడ్డీ, ద్రవ్యోల్బణంతో అడ్జెస్ట్​ చేసిన తర్వాత ఆ 1.4లక్షలు కాస్తా రూ. 10కోట్లుగా మారింది.

ఎక్సిక్వియల్​ తండ్రి బ్యాంకు ఖాతా, పొదుపు గురించి కుటుంబంలో ఎవరికీ తెలియదు. ఆ తండ్రి మరణించిన పదేళ్ల వరకు ఆ పాస్​ బుక్​ని ఎవరూ చూడకపోవడం, ఇల్లు సర్దుతుండగా ఎక్సిక్వియల్​కి దొరకడం విశేషం.

కోటీశ్వరుడు అయిపోయానన్న సంతోషంలో బ్యాంక్​ నుంచి డబ్బులు విత్​డ్రా చేద్దామని ఎక్సిక్వియల్​ అనుకున్నాడు. అప్పుడే అతనికి షాక్​ తగిలింది! వాళ్ల నాన్న పొదుపు చేసి బ్యాంక్​ మూతపడిందని అతను తెలుసుకున్నాడు.

ఇలాంటి పరిస్థితుల్లో పాస్​ బుక్​ ఉన్నా పెద్ద ఉపయోగం లేదు. డబ్బు పోయినట్టే!

కానీ అదృష్టం అనేది ఎక్సిక్వియల్​ని వదల్లేదు! ఆ పాస్​ పుస్తకంలో ఒక కీలక విషయం ఉంది. “స్టేట్​ గ్యారంటీడ్​” అని ఒక స్టాప్​ దానిలో ఉంది. బ్యాంకు చెల్లింపులు చేయలేకపోతే ప్రభుత్వం ఇస్తుందనిఆ హామీ సూచించింది.

ఎక్సిక్వియల్​ ప్రభుత్వాన్ని సంప్రదించాడు. అయితే, చిలీ ప్రభుత్వం మొదట్లో ఈ హామీని నెరవేర్చేందుకు ప్రయత్నించలేదు.

అప్పటి నుంచి తన డబ్బు కోసం ఎక్సిక్వియల్​ ప్రభుత్వంతో సుదీర్ఘ పోరాటం చేశాడు.

“ఆ డబ్బు మా కుటుంబానిది. మా నాన్న ఎంతో కష్టపడి దాన్ని కాపాడుకున్నాడు,” అని చెప్పిన ఎక్సిక్వియల్​ పాస్ బుక్​ దొరికే వరకు ఆ కుటుంబానికి తెలియదని అన్నాడు.

కానీ మిలియనీర్ కావడానికి ఎక్వియెల్ ప్రయాణం అంత సులభం కాదు. అతనికి అనుకూలంగా అనేక కోర్టు తీర్పులు వచ్చినప్పటికీ, ప్రభుత్వం అడుగడుగునా అప్పీల్ వేస్తూ వెళ్లింది. చివరికి ఎక్సిక్వియల్​ న్యాయ పోరాటం దేశ అత్యున్నత న్యాయస్థానానికి చేరింది.

ఈ నిధులు తన తండ్రి కష్టపడి సంపాదించిన పొదుపు అని, దీనికి ప్రభుత్వ నిబద్ధత హామీ ఇచ్చిందని అతను వాదించాడు.

చివరికి 2022లో, చిలీ సుప్రీంకోర్టు అతనికి అనుకూలంగా తీర్పు ఇచ్చింది. అతనికి 1 బిలియన్ చిలీ పెసోలు (సుమారు రూ .10 కోట్లు) వడ్డీ, భత్యాలతో సహా పరిహారం చెల్లించాలని ప్రభుత్వానికి ఆదేశాలిచ్చింది.

ఇలా ఎక్సిక్వియల్​ అనే వ్యక్తి తండ్రి పాత పాస్​ బుక్​తో కోటీశ్వరుడయ్యాడు.

వాస్తవానికి ఈ ఎక్సిక్వియల్​ కథ రాయిటర్స్ మొదట 2022 లో ప్రచురించింది. కానీ ఈ స్టోరీ ఇప్పుడు సోషల్​ మీడియాలో వైరల్​గా మారింది.