మలయాళం క్రైమ్ థ్రిల్లర్ సినిమా అంటే అందులోని ట్విస్టులు, థ్రిల్స్ గురించి ప్రత్యేకంగా చెప్పాల్సిన పని లేదు. ఆ ఇండస్ట్రీ మేకర్స్ ఇవి వెన్నతో పెట్టిన విద్య. అయితే ఇప్పుడు చెప్పబోయే క్రైమ్ థ్రిల్లర్ మూవీది మరో లెవెల్. ఇలాంటి స్క్రీన్‌ప్లేతో కూడా సినిమా తీస్తారా అనిపించేలా ఇది సాగుతుంది. ఆ మూవీ పేరు కురుప్ (Kurup).

కురుప్ మూవీ స్టోరీ ఏంటంటే?

మలయాళ స్టార్ హీరో దుల్కర్ సల్మాన్, శోభిత ధూళిపాళ్ల నటించిన మూవీ కురుప్. 2021లో థియేటర్లలో రిలీజైంది. ఐఎండీబీలో 7 రేటింగ్ సాధించింది. రూ.35 కోట్ల బడ్జెట్ తో తెరకెక్కిస్తే.. రూ.78 కోట్లు వసూలు చేసింది. శ్రీనాథ్ రాజేంద్రన్ డైరెక్ట్ చేసిన ఈ మూవీ ఓ రియల్ స్టోరీ. కేరళ పోలీసుల కళ్లుగప్పి తిరుగుతున్న సుకుమార కురుప్ అనే వ్యక్తి జీవితం ఆధారంగా తెరకెక్కిన సినిమా ఇది. ఓ బయోగ్రఫికల్ పీరియడ్ క్రైమ్ థ్రిల్లర్ సినిమా ఎలా ఉండాలో అలాగే ఉంటుంది.

ఇండియన్ ఎయిర్ ఫోర్స్ లో ఉద్యోగం సంపాదించి, తక్కువ సమయంలో ఎక్కువ డబ్బు సంపాదించాలని ఆశపడే ఓ క్రిమినల్ గోపీకృష్ణ కురుప్ చుట్టూ తిరిగే కథ ఇది. ఇన్సూరెన్స్ డబ్బుల కోసం ఓ వ్యక్తిని హత్య చేశాడన్న ఆరోపణలతోపాటు ఆయుధాలను అడ్డదారిలో విక్రయించడం వరకు ఎన్నో నేరాల్లో నిందితుడిగా ఉన్న అతడు.. కేరళ పోలీసుల కళ్లుగప్పి తప్పించుకు తిరుగుతాడు.

అతని జీవితాన్ని కృష్ణదాస్ అనే ఓ రిటైర్ట్ పోలీస్ ఆఫీసర్ కోణంలో చూపించే ప్రయత్నం ఈ సినిమాలో చేశారు. అతని రిటైర్మెంట్ రోజు కురుప్ కు సంబంధించిన ఫైల్ ను కృష్ణదాస్ సబార్డినేట్ చూస్తాడు. అక్కడ మొదలయ్యే కథ.. కురుప్ ఎలా పోలీసులను బోల్తా కొట్టించి.. ఇండియా నుంచి పర్షియా వరకు వివిధ నేరాలకు పాల్పడ్డాడో చూపిస్తూ వెళ్తుంది.

ఆ కురుప్ స్టోరీయే ఈ మూవీ

40 ఏళ్లుగా కేరళ పోలీసుల కళ్లు గప్పి తిరుగుతున్న మోస్ట్ వాంటెడ్ క్రిమినల్ సుకుమార కురుప్ అలియాస్ గోపాలకృష్ణ కురుప్ కథే ఈ కురుప్ మూవీ. 1984లో అతడు మరో ముగ్గురితో కలిసి ఇన్సూరెన్స్ డబ్బుల కోసం చేసే హత్యతో కేరళ పోలీసుల దృష్టిలో పడతాడు.

ఈ కేసులో మిగిలిన ముగ్గురు పోలీసులకు చిక్కినా.. కురుప్ మాత్రం తప్పించుకుంటాడు. అతడు పోలీసులను ఎలా బోల్తా కొట్టించాడు.. ఎక్కడెక్కడ మారు పేర్లతో తిరిగాడు.. అనే విషయాలను ఈ కురుప్ మూవీ ప్రేక్షకుల ముందుకు తీసుకొచ్చే ప్రయత్నం చేసింది.

కురుప్ ఎలా ఉందంటే?

ఈ మూవీ ఫస్టాఫ్ చూస్తున్నంత సేపూ కాస్త గందరగోళంగానే అనిపిస్తుంది. అసలు ఏ సీన్ ఎందుకు వస్తుందో అర్థం కాదు. కానీ కాస్త ఓపిగ్గా సెకండాఫ్ వరకు వేచి చూస్తూ ఈ ప్రశ్నలకు సమాధానం దొరుకుతుంది. సుకుమార కురుప్ నేరాల పరంపర ఎలా సాగిందో తెలుస్తుంది.

ఈ సినిమాలో ఆ కురుప్ పాత్రలో దుల్కర్ సల్మాన్, అతని భార్య శారద పాత్రలో శోభిత నటించారు. దుల్కర్ చాలా సులువుగా ఈ పాత్రలో జీవించేశాడు. శోభిత స్క్రీన్ టైమ్ తక్కువే అని చెప్పాలి. అయితే ఈ మూవీలో వచ్చే ట్విస్టులు మంచి థ్రిల్ పంచుతాయి.

కురుప్ ఎక్కడ చూడాలి?

మలయాళ క్రైమ్ థ్రిల్లర్ మూవీ కురుప్ నవంబర్ 12, 2021లో థియేటర్లలో రిలీజైంది. ఆ తర్వాత కొన్ని రోజులకే ఓటీటీలోకి కూడా స్ట్రీమింగ్ కు వచ్చింది. ఈ సినిమా ప్రస్తుతం తెలుగులోనూ నెట్‌ఫ్లిక్స్ లో స్ట్రీమింగ్ అవుతోంది. మంచి మలయాళ క్రైమ్ థ్రిల్లర్ చూడాలనుకుంటే ఈ మూవీని అస్సలు మిస్ కావద్దు.